Ap-apresiarenyo Kadi ti Kinaanus ni Jehova?
1 No saan a nagan-anus ni Jehova iti napalabas a 10, 20, ken ad-adu pay a tawen, a dinan impalubos ti nasaksaknap a panangasaba, naammuanyo ngata koma ti kinapudno? Anian a yamantayo ta impalubosna a ‘makapagbabawi’ ti ad-adu pay a tattao. Nupay kasta, “umayto a kasla mannanakaw” ti naindaklan nga aldaw ti panangukom ni Jehova. (2 Ped. 3:9, 10) Gapuna, saan koma nga ipagarup a ti kinaanus ti Dios ket panangitantan iti panagpatingga daytoy a sistema dagiti bambanag.—Hab. 2:3.
2 Panangngaasi Kadagiti Tattao: Ditay matukod ti kinaanus ni Jehova. Ditay koma liplipatan ti nakairantaan dayta. (Jon. 4:1-4, 11) Makita ni Jehova ti nakapimpiman a kasasaad ti sangatauan ket maasian kadakuada. Kasta met ti panagrikna ni Jesus. Gapu ta naasian kadagiti tattao a kinasabaanna, kayatna a maisaknap pay ti trabaho a panagebanghelio tapno ad-adu pay ti maaddaan iti gundaway a manggun-od iti biag nga agnanayon.—Mat. 9:35-38.
3 No dumteng dagiti trahedia ken didigra, ditay kadi maasian kadagiti tattao a di makaammo iti kinapudno? Dagiti tattao itatta ket kasla “karkarnero nga awanan pastor” bayat nga ikagumaanda a daeran ken tarusan dagiti riribuk iti lubong. (Mar. 6:34) Babaen ti naregta a panangikasaba iti naimbag a damag, maliwliwatayo dagidiay nasingpet ti panagpuspusoda ken maipakitatayo ti apresasion iti kinaanus ni Jehova.—Ara. 13:48.
4 Naganat ti Trabahotayo: Itay napan a tawen 323,439 ti nabautisaran ken nasurok a 14,000,000 ti timmabuno iti Memorial. Anian a nagadu pay ti mabalin a makalasat iti pannakadadael daytoy nadangkes a sistema! Ditay ammo no kasanonto ti kaadu ti “dakkel a bunggoy.” (Apoc. 7:9) Ditay ammo no kasano pay kabayag ti annongentayo a panangasaba. Ngem ammo ni Jehova. Maikasaba ti naimbag a damag agingga iti kapkapnekanna, “ket iti kasta umayton ti panungpalan.”—Mat. 24:14.
5 Bassiten ti nabati a tiempo, ket asidegen ti aldaw ti Dios. (1 Cor. 7:29a; Heb. 10:37) Di pagduaduaan, “ti pannakaisalakantayo as-asidegen ngem idi tiempo a nagbalintayo a manamati.” (Roma 13:11) Ditay koma mariro iti panggep ti kinaanus ti Dios. Imbes ketdi, mangasabatayo a sigaganetget tapno ad-adu pay kadagidiay agtarigagay iti kinalinteg ti mangsagrap iti naindaklan nga asi ni Jehova.