Panangparegta Kadagiti Payunir
1 Kasapulantayo amin ti pammaregta, ket nangnangruna nga apresiaren dagiti payunir no maseknan dagiti panglakayen kadakuada. Insurat ti maysa a payunir a babai: “Kayatko a maammuanyo nga apresiarek unay dagiti ‘lallakay’ iti kongregasionko. . . . Iti panawen a kasapulak unay ti tulong ken pammaregtada, kasla impaay ni Jehova kadakuada ti nainsiriban a sasao a nasken a mangngegak.”
2 Iti Enero, mitingen ti dua a miembro ti Service Committee dagiti amin a payunir, ket adda naipaay nga outline para iti daytoy a miting. Iti daytoy a miting, nasayaat a mapagsasaritaan no ania ti mabalin nga aramiden tapno maragpat ti oras dagiti payunir, yantangay ti promedio ditoy Pilipinas ket 54.1 laeng iti napalabas a tawen serbisio. Inton Disiembre 31, rumbeng a nakaireport koman dagiti regular a payunir iti saan a nababbaba ngem 280 nga oras. Dagidiay saan a nakaragpat iti daytoy rumbeng a maparegtada a mangbaliw iti eskediulda iti sumaganad a walo a bulan tapno maragpat ti tinawen a kalatda a 840 nga oras. Rumbeng a makomendaran dagidiay nakaragpat iti kalatda nga oras.
3 Nalaka laeng a maupay dagiti payunir no nababa ti orasda. Daytoy ti makagapu no apay a naisingasing iti Ti Ministeriotayo iti Pagarian nga Oktubre, 1998, panid 7, a regular a repasuen ti Sekretario ti aktibidad dagiti payunir ken pakaammuanna dagiti panglakayen, nangnangruna ti Manangaywan iti Serbisio, tapno matulongan dagiti payunir iti aniaman a parikutda sakbay a kumaro ti kasasaad ket agsardengda a payunir.
4 Awan duadua a maparegta ken mapaganaygay dagiti payunir iti daytoy tinawen a miting, a ‘maiburay kadakuada ti naespirituan a sagut’ tapno ‘mapatibkerda’ iti panagserbida kas payunir.—Rom. 1:11.