Makapabilegkayo Koma
1 Yantangay agbibiagtayo iti “napeggad a tiempo a narigat a pakilangenan,” kasapulantayo amin ti pammaregta. (2 Tim. 3:1) Uray idi umuna a siglo, indagadag ni apostol Pablo kadagiti kakabsatna a ‘surotenda koma ti bambanag a makapabileg iti maysa ken maysa.’ (Roma 14:19) Sinarungkaranna ti sumagmamano a kongregasion, ‘a pinabilegna dagiti kararua dagiti adalan, a pinarparegtana ida nga agtalinaed iti pammati.’ (Ara. 14:22) Kasapulantayo unay ti kasta a pammaregta ita.
2 Mapabilegtayo ti sabsabali babaen ti sasaotayo. No makipasettayo kadagiti gimong, ‘pabpabilgentayo ti maysa ken maysa.’ Mausartayo ti dilatayo iti positibo a pamay-an no mangiranudtayo kadagiti kapadasan, mangkomendar, wenno makisarita maipapan kadagiti naespirituan a bambanag. Ti kasta a panangusar iti dila ket ‘naimbag a pammabileg, a mangipaay iti mayannugot kadagiti agdengdengngeg.’—Efe. 4:29.
3 Isarita Dagiti Makapabileg a Bambanag: Iti Filipos 4:8, kinuna ni Pablo a nasken nga utobentayo dagiti bambanag a napudno, serioso a pakaseknan, nalinteg, nadalus, nakaay-ayat, naimbag ti pakasarsaritaanda, nanakman, ken nadayaw. Kanayon a napudno ti panagsasaritatayo no naibatay dayta iti Sao ti Dios. (Juan 17:17) Ti Nakristianuan a dedikasiontayo, dagiti maad-adaltayo kadagiti gimong, ken ti ministeriotayo iti tay-ak, ket bambanag a serioso a pakaseknan. Dagiti positibo a panagsasarita maipapan kadagiti prinsipio a linaon ti Sao ti Dios tulongannatayo nga agbalin a ‘masirib maipaay iti pannakaisalakan.’—2 Tim. 3:15.
4 Mabalintayo nga iyebkas ti apresasiontayo iti nadalus a kondukta dagiti kakongregasiontayo. Mabalintayo a komendaran dagiti nakaay-ayat a naimbag nga aramid dagiti kakabsattayo. (Juan 13:34, 35) Dagiti bambanag a nasayaat ti pakasaritaanda iramanna dagiti agkakaimbag a galad a kas iti pammati, rag-o, talna, ken nabayag a panagitured a mapaliiwtayo kadagiti kakabsat. Ti panangisarita kadagiti kasta a nanakman ken nadayaw a bambanag ket ‘naimbag a pakapabilgan’ dagiti sabsabali.—Roma 15:2.
5 Inaldaw a maipasangotayo kadagiti pakaringgoran ti lubong. Anian a makapagin-awa no iwaksitayo dagita a pakaringgoran ket siraragsak a makitimpuyogtayo kadagiti kakabsattayo! No kanayon a makaparegta ken makapabilegtayo, sipupudno nga ibaga kadatayo dagiti sabsabali: “Pinabang-arda ti espirituk.”—1 Cor. 16:18.