No Kasano a Wayawayaannatayo ti Kinapudno
1 Naminsan, kinuna ni Jesus kadagiti Judio a namati kenkuana: “Maammuanyonto ti kinapudno, ket ti kinapudno wayawayaannakayto.” (Juan 8:32) Agsasao idi maipapan iti wayawaya a nasaysayaat ngem kadagiti gagangay a wayawaya a sagsagrapen dagiti umili, wayawaya a magun-odan ti amin—nabaknang man wenno napanglaw, edukado man wenno awan adalna. Insuro ni Jesus ti kinapudno a mangwayawaya kadatayo iti pannakaadipen iti basol ken ipapatay. Kas inlawlawag ni Jesus, “tunggal managaramid iti basol ket adipen ti basol.” (Juan 8:34) Anian ti panangiliwtayo iti tiempo inton amin a natulnog a tattao “mawayawayaanto iti pannakaadipen iti panagrupsa ken maaddaan iti nadayag a wayawaya ti annak ti Dios”!—Roma 8:21.
2 Mangyeg iti kasta a wayawaya ti kinapudno maipapan ken ni Jesus ken iti pasetna iti pannakatungpal ti panggep ti Dios. Ramanen dayta ti pannakaammo maipapan iti impaayna a daton a pangsubbotna kadatayo. (Roma 3:24) Uray pay itan, no awaten ken sitatallugod nga agbiagtayo a mayannurot iti kinapudno a masarakan iti Biblia, mawayawayaantayo iti buteng, kinaawan namnama, ken iti amin a makadangran nga aramid.
3 Pannakawayawaya iti Buteng ken Kinaawan Namnama: Saantay a maawanan iti namnama gapu kadagiti kasasaad ditoy lubong agsipud ta maawatantayo no apay nga adda ti kinadakes ken ammotayo nga asidegen a mapukaw dayta ditoy daga. (Sal. 37:10, 11; 2 Tim. 3:1; Apoc. 12:12) Maysa pay, ti kinapudno wayawayaannatayo kadagiti di umiso a sursuro maipapan iti kasasaad dagiti natay. Ammotayo a saandatayo a madangran dagiti natay, saanda a matutuok iti agnanayon, ken saan nga alaen ti Dios dagiti tattao idiay langit babaen ti ipapatay.—Ecl. 9:5; Ara. 24:15.
4 Ti kasta a kinapudno ti nangliwliwa iti maysa a pagassawaan idi natay iti aksidente ti anakda. “Sa la mapunnuan ti pukaw iti biagmi inton makitami manen ti anakmi babaen ti panagungar,” kinuna ti ina. “Ngem ammomi a temporario laeng ti saem a sagsagabaenmi.”
5 Pannakawayawaya Kadagiti Makadangran nga Aramid: Ti kinapudno a masarakan iti Biblia mabalbaliwanna ti panagpampanunot ken personalidad ti maysa a tao, a mangwayawaya kenkuana kadagiti parikut a maliklikan. (Efe. 4:20-24) Ti kinamapagpiaran ken kinagaget matulonganna ti maysa a tao a lumung-aw iti kinapanglaw. (Prov. 13:4) Ti panangipakita iti managsakripisio nga ayat pasayaatenna ti relasiontayo kadagiti dadduma. (Col. 3:13, 14) Ti panangraem iti Nakristianuan a kinaulo kissayanna dagiti parikut iti pamilia. (Efe. 5:33–6:1) Ti panangliklik iti panagbartek, seksual nga imoralidad, tabako, ken makaadikto a droga saluadanna ti salun-at.—Prov. 7:21-23; 23:29, 30; 2 Cor. 7:1.
6 Marigatan idi ti maysa nga agkabannuag a lalaki a mangisardeng iti pannakaadiktona iti droga iti siam a tawen. Iti maysa nga aldaw, nakasabet iti maysa nga agibumbunannag a mangaskasaba iti lansangan. Nangala iti literatura, ket nayurnos ti panagsarungkar kenkuana iti pagtaenganna. Nairugi ti panagadal iti Biblia. Dua a bulan kalpasanna, insardengnan a namimpinsan ti agdroga, ket nabautisaran kalpasan ti walo a bulan a panagadalna. Nakipagadal met iti Biblia ti manong ken ti ipagna idi makitada a saanen nga agdrogdroga.
7 Tulonganyo Dagiti Dadduma a Gumun-od iti Wayawaya: Dagidiay nakayawan kadagiti di umiso a sursuro manipud kinaubingda mabalin a marigatanda a mangtarus iti wayawaya nga ipaay ti Sao ti Dios. Tapno madanon dagiti pusoda, kasapulan ti naisangsangayan a kinaanep ken nasayaat a panagsagana ti mannursuro. (2 Tim. 4:2, 5) Saan a panawen daytoy ti panagginad iti trabahotayo a ‘panangiwaragawag iti wayawaya kadagidiay nakautibo.’ (Isa. 61:1) Napateg ti Nakristianuan a wayawaya. Ti pananggun-od iti dayta kaipapananna ti biag nga agnanayon.—1 Tim. 4:16.