Makapabang-ar a Trabaho
1 Makapabang-ar ti mensahe ti Biblia kadagiti amin a mangawat ken agbiag a mayannurot iti dayta. (Sal. 19:7, 8) Wayawayaanna ida kadagiti di umiso a sursuro ken makadangran nga aramid ken mangted iti natalged a namnama iti masanguanan. Nupay kasta, saan laeng a dagidiay mangawat iti naimbag a damag ti magunggonaan. Mabang-aran met dagidiay mangiranud kadagiti makapabang-ar a kinapudno a masarakan iti Biblia.—Prov. 11:25.
2 Makapagin-awa ti Ministerio: Kinuna ni Jesus a dagidiay mangawat iti sangol ti panagbalin nga adalan ni Kristo, a pakairamanan ti trabaho a panangasaba ken panangaramid kadagiti adalan, ket ‘makasarak iti gin-awa a maipaay kadagiti kararuada.’ (Mat. 11:29) Nagin-awaan ni Jesus a mismo iti panangasabana kadagiti dadduma. Taraon ti kayarigan dayta kenkuana. (Juan 4:34) Idi imbaonna a mangasaba dagiti 70 nga adalan, nagrag-oda idi makitada ti panangsaranay ni Jehova kadakuada.—Luc. 10:17.
3 Adu a Kristiano ita ti mabangbang-aran met iti pannakiramanda iti trabaho a panangasaba. Kinuna ti maysa a kabsat a babai: “Makapabang-ar ti ministerio gapu ta daytoy ti mangmangted iti direksion ken panggep ti biagko. Mapalag-ananak kadagiti personal a problema ken inaldaw a pakaringgoran no rummuarak a mangasaba.” Kinuna ti sabali pay a naregta a ministro: “Ti ministerio . . . inaldaw nga ipalagipna kaniak a napaypayso ni Jehova ken ikkannak iti talna ken ragsak a di magun-odan iti aniaman a sabali a pamay-an.” Anian a pribilehio ti panagbalintayo a ‘katrabahuan ti Dios’!—1 Cor. 3:9.
4 Nalanay ti Sangol ni Kristo: Nupay nabalakadan dagiti Kristiano nga ‘umagawada a sipipinget,’ saan a namnamaen ni Jesus ti ditay kabaelan nga ited. (Luc. 13:24) Kinapudnona, siaayat nga aw-awisennatayo a ‘makisinnangol kenkuana.’ (Mat. 11:29, footnote iti New World Translation of the Holy Scriptures—With References) Dagidiay maipaspasango kadagiti narigat a kasasaad makapagtalekda a makaay-ayo unay iti Dios ti amin-kararua a panagserbida, uray no limitado.—Mar. 14:6-8; Col. 3:23.
5 Anian a makapabang-ar ti agserbi iti Dios a mangapresiar iti aniaman nga aramidentayo a maipaay iti naganna! (Heb. 6:10) Sapay koma ta kanayon nga ikagumaantayo nga ited kenkuana ti amin a kabaelantayo.