Dagiti Pakaammo

◼ Literatura a tukon iti Marso: Itukontayo ti baro a libro nga, Ania a Talaga ti Isursuro ti Biblia? Abril ken Mayo: Indibidual a kopia ti Pagwanawanan ken Agriingkayo! No sumarungkar kadagiti interesado, agraman kadagidiay tumabtabuno iti Memorial wenno iti dadduma pay a teokratiko nga okasion ngem saan nga aktibo a makitimtimpuyog iti kongregasion, ipamaysa ti panangirugi kadagiti panangyadal iti Biblia babaen ti panangusar iti libro nga Ania a Talaga ti Isursuro ti Biblia? Hunio: Itukon ti libro nga Agsursuroka iti Naindaklan a Mannursuro. No kuna ti bumalay nga awan annakna, itukon ti libro a Kinaragsak iti Pamilia.

◼ Yantangay lima ti ngudo ti lawas ti Abril, nasayaat dayta a bulan para iti panag-auxiliary pioneer. Agplano koma itan dagiti agibumbunannag nga agtarigagay nga ag-auxiliary pioneer inton Abril sa itedda a nasakbay ti aplikasionda. Tumulong daytoy kadagiti panglakayen a mangaramid kadagiti kasapulan nga urnos iti panangasaba iti tay-ak ken mangisagana iti umdas a magasin a mausar. Mayanunsio iti kongregasion ti nagan dagiti naaprobaran nga ag-auxiliary pioneer.

◼ Maangay ti Memorial inton Mierkoles, Abril 12, 2006. No gagangay a Mierkoles ti gimongyo, maangay koma dayta iti sabali nga aldaw. Maiparegta iti amin a basaenda dagiti naisingasing a teksto ti Biblia a nayeskediul iti 2006 Calendar ken iti Panangsukimat Kadagiti Kasuratan iti Inaldaw, a mangrugi inton Abril 7 ken agngudo iti aldaw ti Memorial, Abril 12.

◼ Apaman a maawat dagiti kongregasion dagiti kaudian a ruar ti Pagwanawanan ken Agriingkayo!, iruarda koman dagitoy. Iti kasta, mabasa dagiti agibumbunannag ti linaon dagitoy sakbay nga itukonda iti ministerio iti tay-ak. Apaman a sumangpet Ti Ministeriotayo iti Pagarian, maibunong met koman daytoy kadagiti agibumbunannag, nalabit iti Panagadal iti Libro ti Kongregasion.

◼ Mausigto ti video a Noah—He Walked With God iti maysa a Gimong ti Serbisio inton Mayo. No kasapulan, mapedido koma daytoy babaen ti kongregasion iti kabiitan a panawen.

◼ No planoyo ti tumabuno kadagiti gimong ti kongregasion, asamblea, wenno kombension distrito iti sabali a pagilian, agsuratkayo iti sanga nga opisina a mangimatmaton iti trabaho iti dayta a pagilian no kayatyo ti agkiddaw iti impormasion maipapan kadagiti petsa, oras ken lokasion. Nailista dagiti adres dagiti sanga nga opisina iti maudi a panid ti agdama a Tinawen a Libro.

◼ Baro nga Audiocassette a Magun-odan:

What Does the Bible Really Teach? (5 a cassette)—Ingles

◼ Baro a Compact Disc a Magun-odan:

What Does the Bible Really Teach? (7 a CD)—Ingles