Dagiti Pakaammo

◼ Literatura a tukon iti Marso: Itampok ti libro nga Isursuro ti Biblia ken ikagumaanyo ti mangirugi kadagiti panagadal iti Biblia. Abril ken Mayo: Itukon ti indibidual a kopia Ti Pagwanawanan ken Agriingkayo! No sumarungkar kadagiti interesado, agraman kadagidiay timmabuno iti Memorial ngem saanda nga aktibo a makitimtimpuyog iti kongregasion, ikagumaanyo nga ipaima ti libro nga Isursuro ti Biblia nga addaan kalat a mangirugi iti panangyadal iti Biblia. Hunio: Itukon ti libro a Kinaragsak ti Pamilia.

◼ Iparegtami kadagiti amin nga agtarigagay nga ag-auxiliary pioneer iti Abril nga agplanoda itan ken itedda a nasapsapa dagiti aplikasionda. Daytoy ti tumulong kadagiti panglakayen a mangaramid kadagiti napateg nga urnos para iti panagserbi iti tay-ak ken tapno adda umdas a magasin nga usarenda. Mayanunsio iti kongregasion ti nagan dagidiay ag-auxiliary pioneer tapno maparegta met dagiti dadduma a makiraman iti daytoy nga espesial a bulan ti panag-auxiliary pioneer.

◼ Maparegta ti amin a basaenda dagiti naisingasing a teksto iti Biblia a nakaeskediul iti 2007 Calendar ken iti Panangsukimat Kadagiti Kasuratan iti Inaldaw, a mangrugi iti Mierkoles, Marso 28 ken agingga iti Martes, Abril 3, 2007. Dagitoy a salaysay ket mainaig kadagiti pasamak bayat dagiti maudi nga aldaw ni Jesus ditoy daga manipud idi Nisan 9 agingga iti 14, 33 K.P.

◼ Iti panangsukimat iti kuenta ti kongregasion iti daytoy a bulan kas naipakaammo iti Pebrero a Ti Ministeriotayo iti Pagarian, ti mamangulo a manangaywan siguraduenna a masukimat ti kuenta kadagiti bulan ti Disiembre, Enero, ken Pebrero.—Kitaenyo ti Instructions for Congregation Accounting (S-27).

◼ Apaman a maawat dagiti kongregasion dagiti kaudian a ruar Ti Pagwanawanan ken Agriingkayo!, iruarda koman dagitoy. Iti kasta, mabasa dagiti agibumbunannag ti linaon dagitoy sakbay nga itukonda iti ministerio iti tay-ak. Apaman a sumangpet Ti Ministeriotayo iti Pagarian, maibunong met koman daytoy, nalabit iti Panagadal iti Libro ti Kongregasion.

◼ No planoyo ti tumabuno kadagiti gimong ti kongregasion, asamblea, wenno kombension distrito iti sabali a pagilian, agsuratkayo iti sanga nga opisina a mangimatmaton iti trabaho iti dayta a pagilian no kayatyo ti agkiddaw iti impormasion maipapan kadagiti petsa, oras, ken lokasion. Nailista dagiti adres dagiti sanga nga opisina iti maudi a panid ti agdama a Tinawen a Libro.

◼ Baro a Publikasion a Magun-odan:

Baro a Lubong a Patarus ti Nasantuan a Kasuratan (nalapiot ti akkubna) —Cebuano