Pammaneknek ti Nabileg a Pammati!
1. Ania dagiti makaburibor a pasamak nga impadto ni Jesus?
1 Dimngeg a naimbag dagiti apostol idi inlawlawag ni Jesus ti maipapan iti kaaddana ken iti panungpalan ti sistema ti bambanag. Makapasar ti sangatauan kadagiti makaburibor a pasamak kas iti gubat, kinakirang ti taraon, ginggined, ken angol. Kalpasanna, imbaga ni Jesus a dagiti pasurotna ket guraen, parigaten, ken papatayento dagiti tattao. Tumaud dagiti palso a mammadto ket iyaw-awanda ti adu ken lumamiis ti ayat ti kaaduan.
2. Apay a nakaskasdaaw a banag ti pannakaikaskasaba ti naimbag a damag iti intero a lubong?
2 Kalpasan ti panangdakamatna iti kasta a kasasaad, mabalin a nasdaaw dagiti apostol idi kinuna ni Jesus a ti naimbag a damag maipapan iti Pagarian ti Dios maikaskasabanto iti amin a mapagnaedan a daga. (Mat. 24:3-14) Makitkitatayo ita ti nakaskasdaaw a kaitungpalan dayta a makapagagar a padto. Nupay agbibiagtayo kadagiti napeggad a tiempo, sireregta nga iwarwaragawag dagiti Saksi ni Jehova ti naimbag a damag. Bayat a lumamlamiis ti ayat ti lubong, bumarbara met ti ayattayo. Iti laksid ti pananggura kadatayo ti “amin a nasion,” mangaskasabatayo iti dandani tunggal nasion.
3. Ania dagiti nakitam a makaparegta a bilang iti report iti intero a lubong?
3 Anian a makaparegta ti panangrepaso iti nagapuanan dagiti Saksi ni Jehova iti napalabas a tawen serbisio kas naipakita iti tsart iti panid 3 agingga iti 6! Iti nagsasaruno a 16 a tawen, nasurok a maysa a bilion nga oras ti nabusbos iti trabaho a panangasaba ken panangaramid iti adalan. Anian a pammaneknek ti nabileg a pammati! Ngimmato iti 5.8 porsiento ti bilang dagiti payunir, 3.1 porsiento ti ngimmatuan ti bilang dagiti agibumbunannag, ken 4.4 porsiento met ti ngimmatuan dagiti panangyadal iti Biblia. Nangatngato iti 20.1 porsiento ti bilang dagiti nabautisaran no idilig idi 2006 a tawen serbisio. Makaparagsak a makita a dandani pito a milionen a tattao ti simamatalek nga agserserbi ken Jehova. Dayta ti kangatuan pay laeng a bilang iti pakasaritaan ti tao! Bayat ti panangusigmo iti tsart, ania ti nakitam a nangnangruna a makaparegta kenka?
4. Ania dagiti karit a dinaeran ti maysa a lalaki sakbay a nabautisaran?
4 Nupay nangato dagiti nakitatayo a bilang, pulos a ditay koma liplipatan nga irepresentar dagita dagiti tattao a nangipaneknek iti pammatida. Alaentayo a pagarigan ni Guillermo a dimmakkel idiay Bolivia ken nayanak idi 1935. Siam pay laeng ti tawenna idi nangrugi nga agtrabaho iti plantasion ti coca. Manipud iti kinaubingna, agngalngalngalen kadagiti bulong ti coca tapno mailiwliwagna ti kinarigat ti panagtrabaho iti nadagsen. Idi bumaybayag, nalabesen ti panagin-inumna iti arak ken agsigsigarilion. Idi naammuanna ti maipapan kadagiti pagalagadan ni Jehova, insardeng ni Guillermo ti agsigarilio ken ti nalabes a panaginum. Ti kadakkelan a karit ket ti panangisardengna iti nakaugaliannan a panagngalngal kadagiti bulong ti coca. Nagkarkararag nga awanan sarday ket naisardengna daytoy a bisio. Awanen ti bisiona ken bautisadon a Saksi ni Jehova. “Nakaragragsakak ken saanakon a narugit,” kinunana.
5. Ania ti tartarigagayam?
5 Talaga nga interesado ni Jehova kadagiti tattao. Kayatna nga agbabawida amin. (2 Ped. 3:9) Kasta met laeng ti tartarigagayantayo. Sapay koma ta tignayennatayo ti pusotayo a mangaramid iti amin a kabaelantayo a tumulong kadagiti napudno ti panagpuspusoda a tattao a mangam-ammo ken mangayat ken Jehova kas kadatayo.