Mangasaba a Sigaganetget!
1. Ania ti indagadag ni Pablo a masapul nga ipangagtayo ita?
1 “Ikasabam ti sao, naganetgetka koma iti dayta.” (2 Tim. 4:2) Apay a napateg kadatayo ita ti idagdagadag ni Pablo? Kasano a makaapektar dagita a sasao iti biagtayo ken iti biag ti sabsabali?
2. Apay a siaanep a sapulentayo dagiti saan pay a nakangngeg iti naimbag a damag?
2 Biag ti Nairaman: Minilion a tattao iti sangalubongan ti saan pay a nakangngeg iti naimbag a damag a mabalin a pakaisalakananda. (Roma 10:13-15; 1 Tim. 4:16) Adu a napudno ti panagpuspusoda a tattao ti masarakan iti teritoria a kanayon a makasabaan. No baliwantayo ti aldaw wenno oras ti panangasabatayo, mabalin nga adda makasaotayo a dipay nakasabaan. No kasta ti kinaaneptayo, nadalus ti konsiensiatayo ken awan sungsungbatantayo a dara.—Ara. 20:26.
3. Kasanotayo a nainsiriban a mausar ti orastayo iti ministerio?
3 Nupay naipasangoda iti narungsot nga ibubusor, dagiti Kristiano idi umuna a siglo ‘pinunnoda ti Jerusalem iti sursuroda.’ (Ara. 5:28) Kasta met kadi ti determinasiontayo a ‘mangipaay iti naan-anay a panangsaksi’? (Ara. 10:42) No addatayo iti ministerio, nainsiriban kadi nga us-usarentayo ti oras? No ur-urayentayo dagiti kakaduatayo a napan nagsarungkar, makisasaotayo kadi kadagiti aglabas a tattao?
4. Kasano a makatulong ti sigaganetget a panangasaba iti panagtalinaedtayo a siririing?
4 Pagbalinennatayo nga Ad-adda a Nasalukag: Yantangay asidegen ti panungpalan daytoy sistema ti bambanag, masapul nga agtalinaedtayo a nasalukag, a kanayontayo a siririing. (1 Tes. 5:1-6) No kanayon a sawentayo ti namnama nga itden ti Pagarian, saantayo a madagsenan iti daytoy sistema ti bambanag. (Luc. 21:34-36) Pagangayanna, bayat nga agtultuloytayo a “silalagip unay” iti aldaw ni Jehova, matignaytayo nga ad-adda a makiraman iti mangispal-biag a trabaho a panangasaba.—2 Ped. 3:11, 12.
5. Kasano a ti panagraem iti biag gutugotennatayo a rumegta iti ministerio?
5 No mangasabatayo a sigaganetget, mayanninawtayo daytoy a panangmatmat ni Jehova iti biag: “Saanna a tarigagayan a madadael ti asinoman no di ket tarigagayanna a makagteng ti isuamin iti panagbabawi.” (2 Ped. 3:9; Ezeq. 33:11) Agingga a posible, determinadotayo koma a mangsapul iti adu a tattao iti teritoriatayo, a mangyeg iti pakaidayawan ni Jehova!—Sal. 109:30.