Iwarasyo Dagiti Magasin Kadagiti Amin nga Interesado
1. Ditoy Pilipinas, ania ti napaliiw maipapan kadagiti maipapaima a magasin ken apay a rumbeng nga ipaayantayo daytoy iti atension?
1 “Makapainteres, naintiempuan, ken makaparagsak.” “Kadagiti amin a pagbasaan, daytoy pay laeng ti nabasak a makapabang-ar unay.” Dagitoy a komento ipakitana no ania ti rikna dagiti mangbasbasa kadagiti Pagwanawanan ken Agriingkayo! iti intero a lubong. Wen, dagiti magasintayo ket napaneknekanen a napateg nga alikamen iti panangidanon iti naimbag a damag kadagiti “amin a kita ti tattao.” (1 Tim. 2:4) Ngem ditoy Pilipinas, napaliiw a bassit laeng ti maipapaima a magasin. Ania ngata ti makagapu ken ania ti mabalintayo nga aramiden tapno ad-adu ti maipaimatayo?
2. Apay nga adda dagiti agkedked a mangala ken mangipaima kadagiti magasin?
2 Urnos Mainaig iti Donasion: Gapu ngata ta awan ti makukuarta dagiti dadduma isu nga agkedkedda a mangala ken mangipaima kadagiti literatura wenno magasin? Nalabit, iti panagriknada ket nasken a mangtedda iti espesipiko a kontribusion para iti tunggal magasin wenno literatura nga alaenda. Gapu ta kastoy ti kapanunotanda ken bassit laeng ti makukuartada, mabalin a bassit laeng wenno saanda pay ketdin a mangal-ala kadagiti magasin. Umiso kadi daytoy?
3. Idi tawen 2000, ania ti naaramid a panagbalbaliw mainaig kadagiti literatura ken magasintayo?
3 Idi Enero 2000, imbilin ti Bagi a Manarawidwid a dagiti magasin ken literatura ditoy Pilipinas ken iti amin a pagilian iti intero a lubong ket maited kadagiti agibumbunannag ken kadagiti interesado babaen ti donasion, kayatna a sawen, awanen ti makiddaw wenno maisingasing nga espesipiko a kontribusion no mangalaka iti literatura. No ipaimayo dagiti literatura, mabalinyo nga awaten dagiti boluntario a donasion kas pangsuporta iti sangalubongan a trabaho a panangibunannag iti naimbag a damag.
4. Ania dagiti bendision nga inyeg ti urnos mainaig iti donasion?
4 Kasano a binendisionan ni Jehova daytoy nga urnos? Insurat ti sanga nga opisina iti Central African Republic: “Kaipapanan daytoy a ti tunggal maysa, aniaman ti pinansial a kasasaadna, ket mabalin a maaddaan kadagiti kasapulanna a literatura tapno agbalin nga adalan ni Kristo. Daytoy nga urnos ket ap-apresiaren unay dagiti agibumbunannag ken dagiti interesado.” Kinuna met ti sanga nga opisina iti Indonesia: “Ti birbiroken itan dagiti kakabsat ket dagidiay interesado a mangbasa kadagiti publikasiontayo saan ket a dagidiay adda pagbayadna para iti pannakayimprenta dagita.” Kastoy met ti kinuna ti sanga nga opisina iti South Africa: “Nasurok a doble ti immaduan dagiti mayim-imprenta a magasin ken adda sumagmamano a lenguahe a nasurok nga uppat a daras ti immaduanna! . . . Amin dagitoy ipasimudaagna a nakaad-adu ita ti maimulmula a “bin-i” ti kinapudno.—Mat. 13:3-8.”
5. (a) Kasano kaadu a magasin ti alaentayo? (b) Siasino dagiti rumbeng a paimaantayo?
5 Gapuna, rumbeng a mangala ti tunggal agibumbunannag kadagiti umdas a literatura ken magasin a kasapulanda iti panangasaba iti binalaybalay, panagsarungkar, ken panangyadal iti Biblia. No mangtedtayo iti kontribusion para iti sangalubongan a trabaho sigun iti kabaelantayo, saan a ti literatura ti baybayadantayo. Imbes ketdi, ti kontribusiontayo ket mausar kadagiti amin nga aktibidad iti organisasion ni Jehova a pakairamanan ti pannakayimprenta dagiti literatura, paggastuan kadagiti pagtaengan a Bethel, pannakaasikaso kadagiti kasapulan dagiti misionero, agdaldaliasat a manangaywan, ken dadduma pay nga umasping nga aktibidad. Sigurado a bendisionan ni Jehova dagidiay siraragsak a mangted sigun iti kabaelanda.—2 Cor. 8:1-4; 9:7.
6. Apay a rumbeng nga usarentayo a nainsiriban dagiti magasintayo?
6 Usarenyo a Nainsiriban Dagiti Magasin: Ti kangrunaan a pakaseknantayo ket ti panangbirok ken panangtaraon kadagiti napudno ti panagpuspusona a tattao ken tulongantayo ida a makalasat nga agturong iti baro a lubong ni Jehova. Gapuna, saantayo koma nga agkedked a mangipaima kadagiti magasin ken dadduma pay a literatura tapno maibanag daytoy. Nupay kasta, sayang laeng no ibatitayo dagiti magasin kadagiti tattao nga awan panangapresiarna kadagiti naespirituan a bambanag. No kasta, saantayo nga ikkan iti literatura dagiti saan nga interesado, saan a mayat a mangbasa, wenno dagidiay mayat a mangilako iti dayta.—Isa. 26:10.
7. Kasanotayo a mailasin no interesado ti kaskasabaantayo?
7 Ti nabunga a panangipaima kadagiti literatura ket agpannuray iti abilidadyo a mangilasin kadagiti pudpudno nga interesado. Kasanotayo a mailasin no talaga nga interesado ti maysa a tao? Ti maysa a nasayaat a pagilasinan ket no sidadaan a makisarita kadakayo. Wenno no dumdumngeg bayat nga agsasaokayo, sungsungbatanna dagiti saludsodyo, ken no ibagana ti kapanunotanna, pakakitaan dayta nga interesado iti pagsarsaritaanyo. Ti nadayaw a pannakisaritana kadakayo ken ti kinapasigna ipakitana nga isu ket nasingpet. No surotenna ti panangibasayo iti Biblia, kayatna a sawen nga adda panagraemna iti Sao ti Dios. Masansan a nasayaat no damagenyo no kayatna a basaen ti literatura nga itukonyo kenkuana. Mabalinyo met nga ibaga nga agsublikayto tapno maitultuloyyo ti agsarita. No umanamong iti dayta, kayatna a sawen nga isu ket interesado. No mapaliiwyo dagita a pagilasinan ti pudpudno nga interes, mabalin a saan a masayang ti literatura nga ipaimatayo iti maysa a tao.
8. Ania dagiti mabalintayo nga aramiden tapno ad-adu ti maipaimatayo a magasin?
8 Panangipaima iti Ad-adu a Magasin: Dagiti amin nga agibumbunannag ditoy Pilipinas aramidenda koma a kalat ti panangipaima iti ad-adu a magasin. Ania ti mabalintayo nga aramiden tapno maragpattayo dayta?
● Mangipasdekkayo iti kalat no mano a magasin ti ipaimayo iti kada bulan.
● Ibagayo iti Magazine Servant no mano a magasin ti regular nga alaenyo. Siguraduenyo nga agpedidokayo iti umdas a magasin a mausaryo iti panangasabayo iti binalaybalay ken kadagiti panagsarungkaryo.
● Mangyeskediulkayo iti maysa nga aldaw iti tunggal lawas a makipaset iti panagiwaras iti magasin.
● Agpada nga itukonyo Ti Pagwanawanan ken Agriingkayo! uray no maysa laeng a magasin ti itampokyo iti presentasionyo.
● Sipapanunotkayo koma nga agipaima kadagiti magasin. Agipaimakayo no mangasabakayo iti binalaybalay, iti lansangan, iti lugar ti negosio, ken kadagiti publiko a lugar. Mangitugotkayo kadagiti magasin no agbibiahe, aggatgatang, ken no adda papananyo. Gundawayanyo ti tunggal maitutop nga oportunidad a tumulong kadagiti sabsabali a magunggonaan iti Pagwanawanan ken Agriingkayo!
● Ipaimayo dagiti daanen a ruar nga adda pay laeng kadakayo. Uray no naladladaw iti maysa wenno dua a bulan ti petsa a naikabil iti ruar ti magasin, napateg latta dagiti linaonna. Ipaimayo dagita kadagiti interesado.
9. Ania ti determinado nga aramidem kadagiti magasintayo?
9 Inikkannatayo ni Jehova iti adu nga alikamen tapno maibanagtayo ti trabahotayo a panangasaba ken panagaramid iti adalan. Karaman iti daytoy Ti Pagwanawanan ken Agriingkayo! Saantayo koma nga agkedked a mangipaima kadagitoy nga alikamen a makaispal iti biag kadagidiay interesado a mangbirok iti dana nga agturong iti biag. Usarentayo dagitoy a tumulong iti riniwriw pay a tattao a mangammo ken agserbi ken ni Jehova.