Ti Kapatgan a Kualidad ti Nalaing a Mannursuro
1. Ania ti kapatgan a kualidad ti nalaing a mannursuro?
1 Ania ti kapatgan a kualidad a mamagbalin iti maysa a nalaing a mannursuro? Ti kadi sekular nga edukasion? Kapadasan? Paglaingan? Kinapudnona, daytoy ket isu met laeng ti kualidad a kaitungpalan ti Linteg, a mangipabigbig kadagiti adalan ni Jesus, ken dayta ti kapatgan ken makaay-ayo unay kadagiti amin a kangrunaan a kualidad ni Jehova. (Juan 13:35; Gal. 5:14; 1 Juan 4:8) Isu dayta ti ayat. Dagiti nalaing a mannursuro ket mangipakpakita iti ayat.
2. Apay a napateg nga ayatentayo dagiti tattao?
2 Ayaten Dagiti Tattao: Ti Naindaklan a Mannursuro a ni Jesus inayatna dagiti tattao ket daytoy ti nangtignay kadakuada a dumngeg kenkuana. (Luc. 5:12, 13; Juan 13:1; 15:13) No maseknantayo kadagiti tattao, mangasabatayo iti amin a gundaway. Awan ti makalapped kadatayo uray ti pannakaidadanes ken kinaaleng-aleng dagiti tattao. Ipakitatayo ti napasnek a personal nga interes kadagiti makasabaantayo, ken ibagaytayo ti presentasiontayo kadagiti pakaseknanda. Sidadaantayo a mangyadal a saan nga agdardaras ken agsagana a naimbag para iti tunggal panagadal.
3. Kasano a makatulong iti ministeriotayo ti panangayat kadagiti kinapudno iti Biblia?
3 Ayaten Dagiti Kinapudno iti Biblia: Inayat met ni Jesus dagiti kinapudno iti Biblia ken imbilangna dagita kas gameng. (Mat. 13:52) No ay-ayatentayo ti kinapudno, makapagsaotayo a sigaganaygay, ket daytoy ti mangpagagar kadagiti dumdumngeg kadatayo. Ti kasta nga ayat ti tumulong kadatayo a mangipamaysa kadagiti napateg nga impormasion nga iranranudtayo imbes a dagiti pagkapuyantayo, ken mabalin a saantayo unay nga agnerbios iti ministerio.
4. Kasanotayo a mapatanor ti ayat?
4 Patanoren ti Ayat: Kasanotayo a mapatanor ti ayattayo kadagiti tattao? Babaen ti panangutob iti ayat nga impakita ni Jehova ken ti Anakna ken ti nakakaasi a naespirituan a kasasaad dagiti tattao iti teritoriatayo. (Mar. 6:34; 1 Juan 4:10, 11) Rumayray ti ayattayo kadagiti kinapudno iti Biblia babaen ti regular a personal a panagadal ken panagmennamenna. Ti ayat ket maysa nga aspeto ti bunga ti espiritu. (Gal. 5:22) Gapuna, mabalintayo ti agkiddaw ken Jehova iti nasantuan nga espirituna ken kiddawentayo a tulongannatayo a mangparayray iti ayattayo. (Luc. 11:13; 1 Juan 5:14) Aniaman ti naragpattayo nga adal, kapadasan iti kinapudno, wenno paglaingantayo, agbalintayo nga epektibo a mannursuro iti Biblia no iparangarangtayo ti ayat.