Panangikondukta iti Progresibo a Panangyadal iti Biblia iti Ruangan ken Babaen ti Telepono
1, 2. Kasanotayo a balbaliwan ti pamay-antayo a mangyadal iti Biblia tapno matulongantayo dagiti okupado a tattao?
1 Okupado dagiti tattao ita. Ngem adu latta ti interesado kadagiti naespirituan a bambanag. Kasanotayo a matulongan ida a mangpennek iti naespirituan a kasapulanda? (Mat. 5:3) Adu nga agibumbunannag ti nakaikondukta iti panagadal iti man ruangan wenno babaen ti telepono. Kabaelanyo kadi a palawaen ti ministerioyo iti kastoy a pamay-an?
2 Tapno makairugitayo iti panangyadal iti Biblia, masapul a nakasaganatayo a mangidemostra iti panagadal kaanoman a posible dayta. Kasano ken sadino a maaramid daytoy?
3. Kasano a maidemostra ti panangyadal iti Biblia iti ruangan?
3 Iti Ruangan: No adda makasabaanyo a mayat a makisarita maipapan iti Biblia, ukagenyo laeng ti publikasion nga insaganayo, nalabit iti panid 16 ken 17 ti kaudian a publiko nga edision Ti Pagwanawanan, wenno ti maitutop a parapo iti libro nga Isursuro ti Biblia, sa pagsaritaanyo dayta. Basaenyo ti parapo, usigenyo ti saludsod, ken pagsaritaanyo ti maysa wenno dua kadagiti naisitar a teksto. Masansan a mabalin nga aramiden daytoy iti ruangan iti uneg ti lima wenno sangapulo a minuto. No magustuan ti bumalay ti saritaanyo, ibagayo nga agsublikayto tapno usigenyo ti maysa wenno dua a parapo.
4. Ania a kapadasan ti mangipakita a kaykayat ti adu nga okupado a tattao ti agadal iti Biblia babaen ti telepono?
4 Babaen ti Telepono: Adda dagiti tattao a kaykayatda ti agadal iti Biblia babaen ti telepono ngem iti personal. Usigenyo ti sumaganad a kapadasan: Bayat a mangaskasaba iti binalaybalay, nakasarita ti kabsat a babai ti maysa nga ina nga okupado iti sekular a trabahona. Idi saanen a madandanon ti kabsat ti babai iti pagtaenganna, inkeddengna nga awagan iti telepono. Inlawlawag ti babai nga awan a talaga ti panawenna a makisarita maipapan iti Biblia. Kinuna ti kabsat: “Iti 10 wenno 15 a minuto, adda baro a masursurom, uray babaen laeng iti telepono.” “No babaen iti telepono, OK lang!” insungbat ti babai. Di nagbayag, naikondukta ti regular a panagadal iti Biblia babaen ti telepono.
5. Apay nga ikagumaantayo nga ibaybayag ti panawen a panangyadaltayo iti ruangan?
5 Panangyadal iti Biblia iti Uneg ti Pagtaengan: Mapnektayo kadin a mangikondukta lattan iti panagadal iti ruangan? Saan. Nupay nainsiriban no saantayo nga agpaut iti damo a panangyadaltayo, mabalin nga ipapauttayo ti mangyadal no naipasdeken ti panagadal ken naparayraytayon ti interes ti bumalay. Napateg daytoy. Kas panangyilustrar, ti mabisin unay nga ubing ket mabalin a pakanen iti bassit laeng a taraon agingga a maisubli ti ganasna a mangan, ngem saantayo a namnamaen a maisubli ti dati a pigsana ken nasayaat ti panagdakkelna no adu a bulan a bassit laeng ti ipakantayo. Umasping iti dayta, ti maysa nga estudiante iti Biblia ket agkasapulan iti pormal ken regular a panagadal tapno agmataengan kas adipen ti Dios.—Heb. 5:13, 14.
6. Ania dagiti pagsayaatan ti panangyadal iti Biblia iti uneg ti pagtaengan wenno iti pribado a lugar?
6 Nasaysayaat ti mangyadal iti pribado a lugar—iti pagtaengan wenno iti sabali pay a maitutop a lugar. Makatulong daytoy tapno maipamaysa ti estudiante ti agadal ken matarusanna a naimbag ti Sao ti Dios. (Mat. 13:23) Makatulong pay daytoy iti mangyad-adal tapno maibagayna ti iyad-adalna a material kadagiti kasapulan ti estudiante. Maysa pay, no napapaut ti panangyadaltayo iti Biblia, ad-adda a makapabileg ken mailawlawagtayo a naimbag ti Sao ti Dios.—Roma 10:17.
7. Ania ti aramidentayo tapno ti panangyadaltayo iti Biblia iti ruangan ket mayalis iti uneg ti pagtaengan?
7 Ania ti aramidenyo tapno ti panangyadalyo iti Biblia iti ruangan ket mayalisyo iti uneg ti pagtaengan? Kalpasan ti sumagmamano nga ababa a panagadal, nasayaat no isingasingyo nga ipapautyo ti agadal, nga espesipiko nga ibagayo no mano a minuto ti panagadalyo. Wenno mabalinyo nga usaren ti saan a direkta a pamay-an kas koma iti panangisaludsodyo iti, “No nawayaka ita, mabalinta kadi ti agtugaw a mangadal iti daytoy?” wenno “Kasano kapaut ti kayatmo a panangadalta iti daytoy a topiko?” No saan a naballigi ti panangikagumaanyo a mangaramid iti daytoy, itultuloyyo ti ababa a panangyadalyo iti ruangan. Padasemto manen nga isingasing nga agadalkayo iti uneg ti pagtaengan iti sabali a gundaway.
8. Ania ti panggeptayo a mangitungpal iti ministeriotayo?
8 Bayat nga itultuloytayo a biroken dagiti maikari, saantayo koma a liplipatan ti panggeptayo, ti panangtulong kadagiti napudno ti panagpuspusona a tattao nga agbalin a dedikado ken bautisado nga adipen ni Jehova. Sapay koma ta bendisionanna dagiti panagreggettayo a mangitungpal iti ministeriotayo nga addaan iti kastoy a panggep.—2 Tim. 4:5.