Tuladenyo Dagiti Propeta—Joel
1. Iti panangasabatayo, kasanotayo a matulad ti kinapakumbaba ni Joel?
1 Siasino ni propeta Joel? Kinunana laeng nga isu ket “anak ni Petuel.” (Joel 1:1) Daytoy a napakumbaba a propeta impaganetgetna ti mensahe ni Jehova, saan a ti akemna kas mensahero. Umasping iti dayta, iti panangitungpaltayo iti ministeriotayo, saantayo a kayat ti maidaydayaw wenno mabigbig no di ket iturturongtayo ti atension ken ni Jehova ken iti Biblia. (1 Cor. 9:16; 2 Cor. 3:5) Kanayonanna, mapabpabilegtayo iti mensahe nga iwarwaragawagtayo. Ania dagiti aspeto iti padto ni Joel a mangrubrob iti regta ken mangted iti namnama kadatayo ita?
2. Gapu ta umad-adanin ti aldaw ni Jehova, matignaytayo a mangaramid iti ania?
2 “Asidegen ti Aldaw ni Jehova.” (Joel 1:15): Nupay rinibu a tawenen ti naglabas manipud idi naisurat daytoy a sasao, agbibiagtayo iti panawen ti maudi a kaitungpalanna. Ti dumakdakes a kasasaad iti lubong kasta met ti kinaawan interes ken panangumsi kadatayo dagiti tattao iti teritoriatayo ket pammaneknek nga agbibiagtayon iti maudi nga al-adaw daytoy dakes a sistema ti bambanag. (2 Tim. 3:1-5; 2 Ped. 3:3, 4) No utobentayo ti kinaasideg ti panungpalan, adu ti panggapuantayo a mangipangpangruna iti ministeriotayo.—2 Ped. 3:11, 12.
3. Apay nga ad-adda a napateg ita ti ministerio bayat nga umas-asideg ti dakkel a rigat?
3 “Ni Jehova Isunto ti Pagkamangan Maipaay iti Ilina.” (Joel 3:16): Ti pannakayugayog a nadakamat iti daytoy a bersikulo ket agaplikar laeng iti panangipakat ni Jehova iti panangukomna kabayatan ti dakkel a rigat. Maliwliwatayo a makaammo nga ispalento ni Jehova dagiti matalek nga adipenna iti dayta a tiempo. (Apoc. 7:9, 14) Bayat a makipaspasettayo iti trabaho a panangasaba ken marikriknatayo ti tulong ken pammabileg ni Jehova, rumayray ti pammati ken panagibturtayo, a tumulong kadatayo inton dumteng ti dakkel a rigat.
4. Ania ti panggapuantayo nga agrag-o ken saan nga agbuteng iti masanguanan?
4 Nupay ibagbaga dagiti dadduma a ti mensahe ni Joel ket maipapan iti didigra, mangipaay dayta iti nadayag a namnama ti pannakaispal kadagiti adipen ti Dios. (Joel 2:32) Gapuna, saantayo nga agbuteng iti masanguanan ken sireregta nga iwaragawagtayo ti naimbag a damag ti Pagarian ti Dios bayat a tungtungpalentayo ti sasao iti Joel 2:23: “Agragsak ken agrag-okayo ken Jehova a Diosyo.”