Ti Panangasaba Pagtalinaedennatayo a Nabileg iti Naespirituan
1. Ania a gunggona ti itden ti trabaho a panangasaba?
1 Ti aktibo a pannakipaset iti trabaho a panangasaba pabilgennatayo iti naespirituan ken parayrayenna ti ragsaktayo. Siempre, ti panangay-ayo ken Jehova ti kangrunaan a makagapu no apay a makiramramantayo iti ministerio. Nupay kasta, no itungpaltayo ti bilin nga “ikasabam ti sao,” bendisionannatayo ni Jehova ken mabenepisiarantayo iti dadduma pay a wagas. (2 Tim. 4:2; Isa. 48:17, 18) Ngem kasano a ti panangasaba pabilgen ken pagbalinennatayo a naragsak?
2. Kadagiti ania a pamay-an a mapabilegnatayo ti ministerio?
2 Bumileg ken Maparaburantayo: Ti panangasaba paregtaennatayo a mangipamaysa kadagiti bendision nga itden ti Pagarian imbes a kadagiti agdama a pakakumikoman. (2 Cor. 4:18) No ilawlawagtayo dagiti pannursuro ti Biblia, bumileg ti pammatitayo kadagiti kari ni Jehova ken parayrayenna ti apresasiontayo iti kinapudno. (Isa. 65:13, 14) Bayat a tultulongantayo dagiti sabsabali a rumang-ay iti naespirituan tapno saanda nga agbalin a “paset ti lubong,” tumibker ti determinasiontayo nga agtalinaed a naisina iti lubong.—Juan 17:14, 16; Roma 12:2.
3. Kasano a matulongannatayo ti ministerio a mangpatanor kadagiti Nakristianuan a galad?
3 Ti pannakipaset iti ministerio tulongannatayo a mangpatanor kadagiti Nakristianuan a galad. Kas pagarigan, no ikagumaantayo ti ‘agbalin nga amin a bambanag iti amin a kita ti tattao’ agbalintayo nga ad-adda a napakumbaba. (1 Cor. 9:19-23) Bayat a makisarsaritatayo kadagiti tattao a ‘nalalatan ken naiwarawara a kasla karkarnero nga awanan pastor,’ matignaytayo a makipagrikna ken tumulong kadakuada. (Mat. 9:36) Masursurotayo ti agibtur no agreggettayo iti laksid ti kinaaleng-aleng ken ibubusor. Rumayray ti rag-otayo no usarentayo ti biagtayo a tumulong kadagiti sabsabali.—Ara. 20:35.
4. Kasano ti panangmatmatyo iti ministerioyo?
4 Anian a bendision ti pannakiraman iti ministerio a mangidayaw iti Daydiay kakaisuna a maikari a pagdayawantayo! Pabilgennatayo ti ministerio. Mangyeg dayta iti naruay a bendision kadagidiay makipaset a ‘naan-anay iti panangikasaba iti naimbag a damag.’—Ara. 20:24.