Nagsayaat a Disenio Dagiti Baro a Tract!
1. Ania nga alikamen iti ministerio ti addaan iti nagsayaat a disenio?
1 Adda lima a baro a tract a nairuar iti 2013 a ‘Ti Sao ti Dios ket Kinapudno!’ a Kombension Distrito. Malaksid iti dayta, adda pay Kingdom News No. 38 a napauluan, “Agbiagto Kadi Manen Dagiti Natay?” Nagsayaat ti disenio dagitoy nga innem a tract. Apay a naaramid daytoy a baro a disenio? No ipaimatayo dagitoy iti binalaybalay, kasanotayo a mausar a naimbag dagiti feature-na?
2. Ania ti panggep ti baro a disenio?
2 Apay a Baro ti Diseniona?: Ti epektibo a panangasaba iti binalaybalay masansan a ramanenna dagitoy nga uppat nga addang: (1) Mangibangon iti saludsod a mangaon iti kapanunotan kas panangirugi iti saritaan. (2) Mangiranud iti teksto manipud iti Kasuratan. (3) Mangitukon iti literatura a basaen ti bumalay. (4) Mangibati iti saludsod a masungbatan iti sumaruno nga isasarungkar, ken yurnos ti panagsubli. Makatulong ti baro a disenio dagiti tract tapno nalaklakatayo nga aramiden dagitoy nga uppat nga addang.
3. Kasanotayo nga ipaima ti maysa kadagiti baro a tract iti ministerio?
3 No Kasano nga Usaren: (1) Kalpasan ti panangkablaawyo iti bumalay, ipakitayo ti saludsod nga addaan iti sungbat a pagpilianna iti sango ti tract, ken saludsodenyo no ania ti makunana. (2) Ukagenyo ti tract sa usigenyo “Ti Kuna ti Biblia.” Basaenyo a direkta ti teksto iti Biblia no ipalubos ti kasasaad. No nawaya ti bumalay, pagsaritaanyo “Ti Maipaayna Kenka No Patiem Dayta.” (3) Ipaimayo ti tract, ken iparegtayo a basaenna ti dadduma pay a linaonna inton adda panawenna. (4) Sakbay nga agpakadakayo, ipakitayo ti saludsod iti likud iti babaen ti “Panunotem” ken makitulagkayo no kaanokayo nga agsubli tapno pagsaritaanyo ti sungbat ti Biblia.
4. No interesado ti bumalay, ania ti ibagatayto inton sarungkarantayo?
4 Nalaka met ti agsarungkar. Ibasayo laeng ti naisitar a teksto iti likud ti tract a mangsungbat iti saludsod nga imbangonyo iti naudi a panagsaritayo. Sakbay nga agpakadakayo, ipakitayo ti ladawan iti broshur a Naimbag a Damag, ipakitayo a mismo ti broshur ken ti maitutop a leksion a naglaon iti kanayonan nga impormasion maipapan iti topiko, sa ipaimayo dayta. No awatenna, ibagayo a pagsaritaanyo ti broshur iti sumaruno nga isasarungkaryo. Nakairugikayon iti panangyadal iti Biblia! Wenno mabalinyo ti mangitukon iti sabali a tract imbes a ti broshur, ken pagtulaganyo no kaanokayo nga agsubli tapno pagsaritaanyo dayta.
5. Kasano kapateg dagiti tract iti ministeriotayo?
5 Nasuroken a 130 a tawen a maus-usar dagiti tract iti ministeriotayo. Nupay nagduduma ti kadakkel ken disenioda, epektibo unay dagita nga alikamen iti panangasaba. Sapay koma ta usarentayo a naimbag daytoy a baro a disenio a mangisaknap iti pannakaammo maipapan iti Biblia iti intero a daga.—Prov. 15:7a.