PANAGBIAG KAS KRISTIANO
No Kasano ti Agbalin a Naanep iti Panagadal iti Biblia
Kayatmo kadi ti agtalinaed a matalek no masubokka a kas idi ken Daniel? Siaanep nga inadalna ti Sao ti Dios a pakairamanan dagiti nakarikrikut a padto. (Da 9:2) Makatulong ti naanep a panagadal iti Biblia tapno makapagtalinaedka a matalek. Kasano? Babaen iti dayta, bumileg ti pammatim a matungpal dagiti kari ni Jehova. (Jos 23:14) Umuneg pay ti panagayatmo iti Dios ket dayta ti mangtignay kenka a mangaramid iti umiso. (Sal 97:10) Ngem pangrugiam? Panunotem dagitoy a singasing.
Ania ti masapul nga adalek? Ti nasayaat a rutina iti panagadal ramanenna ti panangisagana kadagiti gimong. Ad-adda a magunggonaanka iti linawas a panagbasa iti Biblia no iwayaam a sukimaten dagiti punto a dimo maawatan. Adda met dagiti mangadal a naimbag kadagiti padto iti Biblia, kadagiti aspeto ti bunga ti espiritu ti Dios, iti panagmisionero ni apostol Pablo, wenno kadagiti parsua ni Jehova. No adda mapanunotmo a saludsod maipapan iti Biblia, isuratmo dayta ket pagbalinem a proyekto iti sumaruno a panagadalmo.
Pakasarakak kadagiti impormasion? Buyaem ti video a Dagiti Alikamen iti Panagkali Kadagiti Naespirituan a Gameng tapno makitam dagiti mabalinmo nga usaren. Kas pamadasan, sukimatem no asino dagiti kabilgan a turay iti lubong nga iladladawan dagiti animal iti Daniel kapitulo 7.
Kasano kapaut ti panagadalko? Bumileg ti espiritualidadmo no regular ti panagadalmo. No kasapulan, rugiam iti ab-ababa a panagadal sa in-inut a paatiddogem. Ti panagadal iti Sao ti Dios ket kasla panagkali iti nalmeng a gameng; bayat nga umad-adu ti masarakam a gameng, ad-adda met a magagaranka nga agkali! (Pr 2:3-6) Kaykayatmonton nga adalen ti Sao ti Dios ket agbalinton a paset ti biagmo ti regular a panagadal iti Biblia.—1Pe 2:2.
ANIA TI IREPRESENTAR DAGITI ANIMAL ITI DANIEL KAPITULO 7?
KANAYONAN A SALUDSOD:
Kasano a natungpal ti Daniel 7:8, 24?
SUMARUNO A PROYEKTO:
Ania ti irepresentar dagiti animal iti Apocalipsis kapitulo 13?