Itultuloymo a Penken ti ‘Naespirituan a Kasapulam’

1. Ania dagiti kangrunaan a kasapulan dagiti tattao? (Mateo 5:3)

PINARSUANATAYO ni Jehova nga addaan kadagiti kangrunaan a kasapulan. Kas pagarigan, tapno agbiagtayo, kasapulantayo ti makan, bado, ken pagtaengan. No awan ti maysa kadagita uray iti apagbiit laeng, rumigat ti biag wenno mabalin pay ketdi a pakatayantayo. Ngem saan laeng a dagita ti kangrunaan a kasapulan dagiti tattao. Ania pay? Pinarsuanatayo met ni Jehova nga addaan iti naespirituan a kasapulan. (Basaen ti Mateo 5:3.) Ket masapul a bigbigentayo a kasapulantayo dayta ken itultuloytayo a penken tapno agbalintayo a pudpudno a naragsak.

2. Ania ti kaipapanan ti panagbalin a ‘sipapanunot iti naespirituan a kasapulan’? Iyilustrar.

² Ania ti kaipapanan ti panagbalin a ‘sipapanunot iti naespirituan a kasapulan’? Iti Griego, dagita a sasao ket tumukoy iti maysa nga agpalpalama kadagiti naespirituan a bambanag. Mabalintayo nga iyarig dayta iti maysa a literal nga agpalpalama. Imadyinem a rutrurutrot ken nakarugrugit ti badona, sa nakadalupisak iti igid ti kalsada. Nakakapkapsuten ta saan pay a nangnangan. Main-initan met ken matudtuduan. Kasta met, ad-adaywanen dagiti tattao gapu iti itsurana. Ammo dayta nga agpalpalama a kasapulanna ti tulong tapno sumayaat ti biagna. Kasla kasta met laeng ti maysa a sipapanunot iti naespirituan a kasapulanna. Ammona a kasapulanna ti tulong wenno arigna agpalama iti espiritu tapno sumayaat ti situasionna. Ania ngarud ti aramidenna? Masapul a gundawayanna nga aprobetsaren dagiti aglaplapusanan a naespirituan a probision nga ipapaay ni Jehova kadagiti mangay-ayat Kenkuana.

3. Ania ti pagsasaritaantayo iti daytoy nga artikulo?

³ Iti daytoy nga artikulo, usigentayo nga umuna no ania ti masursurotayo iti babai a taga-Fenicia a nagpakpakaasi a tulongan ni Jesus. Isuro daytoy a salaysay ti tallo a kualidad a masapul a patanoren dagidiay sipapanunot iti naespirituan a kasapulanda. Kalpasanna, pagsasaritaantayo ti ulidan dagiti tallo a naespirituan a lallaki a da apostol Pedro, apostol Pablo, ken ni Ari David.

IPAKITATAYO TI KINAPAKUMBABA, PANAGREGGET, KEN PAMMATI

4. Ania ti impakpakaasi ti babai a taga-Fenicia ken Jesus?

⁴ Adda idi gundaway nga immasideg ti maysa a babai a taga-Fenicia ken Jesus. Ngamin, marigrigatan ti balasangna ta “linuganan ti demonio.” (Mat. 15:​21-28) Nagparintumeng ken nagpakpakaasi a tulongan ni Jesus. Nagsasayaat dagiti kualidad nga impakitana idi inasitganna ni Jesus. Usigentayo ti tallo kadagita.

5. Ania dagiti kualidad nga impakita ti babai a taga-Fenicia, ket ania ti inaramid ni Jesus? (Kitaen met ti ladawan.)

⁵ Impakita ti babai a taga-Fenicia ti pudpudno a kinapakumbaba. Kasano? Saan a nagsakit ti nakemna idi impada isuna ni Jesus iti maysa nga uken a gagangay laeng idi a taraken dagiti Gentil. No sika koma ti nakangngeg iti imbaga ni Jesus, mainsultoka kadi ken agpasugnodkan isu a saanmon nga itultuloy ti agpatulong? Bueno, saan a kasta ti babai a taga-Fenicia. Impakitana ti kinapakumbaba. Ngem saan laeng a dayta. Impakitana met ti panagregget. Intultuloyna ti nagpakpakaasi ken Jesus. Apay nga inaramidna dayta? Gapu iti pammatina ken Jesus. Kinapudnona, imbaga ni Jesus a dagiti laeng umili ti Israel a nayarig iti napukaw a karnero ti nakaibaonanna, wenno tulonganna. Ngem gapu iti pammati dayta a babai, natignay ni Jesus a mangtulong kenkuana isu a pinaruarna ti demonio a limmugan iti balasangna.

6. Ania ti masursurotayo iti babai a taga-Fenicia?

⁶ Masapul met nga ipakitatayo ti kinapakumbaba, panagregget, ken nabileg a pammati tapno mapennek ti naespirituan a kasapulantayo. No napakumbabatayo, pagreggetantayo ti agpatulong iti Dios. Masapul met nga ipakitatayo ti nabileg a pammati ken Kristo Jesus ken agtalektayo kadagiti us-usarenna a mangiwanwan kadagiti adalanna. (Mat. 24:​45-47) No ipakitatayo dagita a kualidad, sigurado la ketdi a maragsakan da Jehova ken ti Anakna, ken tulongandatayo a mangpennek kadagiti naespirituan a kasapulantayo. (Idilig ti Santiago 1:​5-7.) Ita, pagsasaritaantayo no kasano nga ipapaay ni Jehova dagiti naespirituan a taraon, kawes, ken pagtaengantayo. Kitaentayo met no kasanotayo a matulad da apostol Pedro, apostol Pablo, ken Ari David tapno magun-odantayo dagita a probision ni Jehova.

AGTALINAED A NABSOG ITI NAESPIRITUAN KAS KEN PEDRO

7. Ania ti imbilin ni Jesus ken Pedro, ken ania pay ti masapul nga aramiden ni Pedro? (Hebreo 5:14–6:1)

⁷ Kitaentayo ti masursurotayo ken apostol Pedro. Maysa isuna kadagiti kaunaan a Judio a nakabigbig a ni Jesus ti Mesias, ti imbaon ni Jehova a mangpakan iti ilina iti “sasao a makaited iti biag nga agnanayon.” (Juan 6:​66-68) Sakbay a napan idiay langit ti napagungar a ni Jesus, imbilinna ken Pedro: “Pakanem dagiti babassit a karnerok.” (Juan 21:17) Simamatalek nga intungpal ni Pedro dayta a bilin. Inusar pay ketdi isuna ni Jehova a mangaramid iti dua a surat a paset ita ti Biblia. Ngem adda pay ti masapul nga aramiden ni Pedro. Masapul a penkenna ti bagina iti naespirituan a taraon. Kas pagarigan, inadalna dagiti insurat ni apostol Pablo a paset idin ti Kasuratan. Inamin ni Pedro a ti dadduma kadagita ket “narigat a maawatan.” (2 Ped. 3:​15, 16) Ngem nagregget latta a mangadal kadagita. Pinatina met a tulongan isuna ni Jehova a mangtarus ken mangyaplikar kadagiti “natangken a makan” nga impaisuratna ken Pablo.—Basaen ti Hebreo 5:14–6:1.

8. Ania ti inaramid ni Pedro idi nakaawat iti baro nga instruksion manipud ken Jehova?

⁸ Pinaneknekan ni Pedro nga adda pammatina ken Jehova idi nagtulnog iti instruksion a naawatna. Kas pagarigan, idi adda isuna iti sangladan a siudad ti Joppe, nasirmata ni Pedro ti maysa nga anghel a mangibagbaga kenkuana a partien ken kanenna dagiti animal nga ibilbilang idi ti Mosaiko a Linteg a narugit. Makapakigtot la ketdi dayta para kadagiti Judio. Idi damo, insungbat ni Pedro: “Diak kayat, Apo, ta saanak pay a pulos nangan iti aniaman a maiparit ken maibilang a narugit.” Insungbat kenkuana ti anghel: “Isardengmon nga ibaga a maiparit a kanen ti bambanag a dinalusan ti Dios.” (Ara. 10:​9-15) Ania ti reaksion ni Pedro? Nagtulnog ken binalbaliwanna ti panagpampanunotna. Kasanotayo nga ammo? Sakbay a nakitana dayta a sirmata, saan idi a mapmapan ni Pedro iti balbalay dagiti Gentil. Ibilbilang ngamin dagiti Judio dagiti Gentil a narugit. Ngem di nagbayag kalpasan dayta a sirmata, nangibaon ti maysa a Gentil a ni Cornelio iti tallo a lallaki a mapan ken Pedro tapno awisenda a makisarita kenkuana. (Ara. 10:​28, 29) Ania ti inaramid ni Pedro? Dagus nga inawatna ti baro nga instruksion manipud ken Jehova. (Prov. 4:18) Kinasabaanna ni Cornelio ken ti sangakabbalayanna. Ti resultana? Namatida amin ken Jesus, immawatda iti nasantuan nga espiritu, ken nagpabautisarda. Nakaragragsak la ketdi idi ni Pedro!—Ara. 10:​44-48.

9. Ania ti dua a magunggonatayo no itultuloytayo ti agipauneg kadagiti natangken a naespirituan a taraon?

⁹ Kas ken Pedro, masapul a kanayon nga agipaunegtayo iti gatas, wenno dagiti kangrunaan a pannursuro ti Biblia. Ngem saan laeng a dagita. Masapul met a magagarantayo nga agipauneg kadagiti natangken a naespirituan a taraon, wenno dagiti pannursuro a mabalin a narigrigat a maawatan. Siguraduentayo koma ti mangiwaya iti tiempo a mangadal iti Biblia. Agreggettayo a mangtarus kadagiti topiko iti Biblia a mabalin a narigrigat a maawatan. Laglagipem a saan a sayang dagita a panagporsegim. Apay? Adda dua a magunggonatayo: Umuna, no ad-adu ti maammuantayo maipapan ken Jehova, ad-adda met nga umuneg ti ayat ken panagraemtayo kenkuana. Ken maikadua, no adda dagiti baro a maammuantayo maipapan kenkuana, ad-adda met a matignaytayo a mangisarsarita iti dadduma iti maipapan iti nakaskasdaaw a nailangitan nga Amatayo. (Roma 11:33; Apoc. 4:11) Adda pay nagsayaat a masursurotayo ken Pedro: No adda maawattayo a baro a lawag wenno instruksion, masapul a dagus a balbaliwantayo ti panagpampanunottayo ken agtulnogtayo. Iti kasta, agtalinaedtayo a nabsog iti naespirituan ken itultuloynatayo nga usaren ni Jehova.

AGTALINAED A NAKAWESAN ITI NAESPIRITUAN KAS KEN PABLO

10. Sigun iti Colosas 3:​8-10, ania ti masapul nga aramidentayo tapno agtalinaedtayo a nakawesan iti naespirituan?

¹⁰ Tapno maparagsaktayo ni Jehova, masapul nga aprobetsarentayo ti sabali pay a probisionna: ti naespirituan a kawes. Ania ti kaipapanan dayta? Insurat ni apostol Pablo a masapul nga ‘uksobentayo ti daan a personalidad’ ken ikawestayo “ti baro a personalidad.” (Basaen ti Colosas 3:​8-10.) Agkasapulan la ketdi iti tiempo ken panagregget tapno maaddaantayo kadagiti personalidad a pakaragsakan ti Dios. Kitaentayo ni Pablo. Idi agtutubo pay, talaga nga inkagkagumaanna nga aramiden ti amin tapno maparagsakna ti Dios. (Gal. 1:14; Fil. 3:​4, 5) Ngem saan nga umiso idi ti pannakaammona maipapan iti Dios, isu a saan met nga umiso ti pamay-an ti panagdaydayawna. Saanna met nga ammo dagiti pannursuro ti Kristo. Malaksid iti dayta, napannakkel ken saan a nasayaat dagiti kababalinna. Kinapudnona, inaminna a mismo nga isu ket ‘natangsit.’—1 Tim. 1:13.

11. Ania ti inkagumaan ni Pablo a balbaliwan?

¹¹ Managpungpungtot idi ni Pablo sakbay a nagbalin a Kristiano. Kinapudnona, adda salaysay iti Aramid a mangibagbaga a nakapungtot unay ni Pablo kadagiti adalan ni Jesus nga uray la kayatnan a papatayen ida. (Ara. 9:1) Ngem idi nagbalin a Kristiano, sigurado la ketdi nga inkagumaanna nga inuksob ti daan a personalidadna. Sinursurona a kontrolen ti kinamanagpungpungtotna, ket nagbalin a naanus ken nasingpet a tao. (Efe. 4:​22, 31) Ngem uray no kasta, idi adda ‘nakaro a saanda a nagkinnaawatan’ ken Bernabe, nakapungtot manen ni Pablo. (Ara. 15:​37-39) Nailaw-an manen ni Pablo ngem saan a simmuko. Intultuloyna a ‘dinanog ti bagina,’ kayatna a sawen, inkagumaanna a labanan dagiti pagkapuyanna tapno maparagsakna ni Jehova.—1 Cor. 9:27.

12. Ania ti nakatulong ken Pablo tapno maikkatna dagiti saan a nasayaat a kababalinna?

¹² Nagballigi ni Pablo a manguksob wenno mangikkat kadagiti saan a nasayaat a kababalinna ken mangisuot iti baro a personalidad gapu ta saan a nagpannuray iti bukodna a pigsa. (Fil. 4:13) Kas ken Pedro, nagdepende ni Pablo iti “bileg nga ipapaay ti Dios.” (1 Ped. 4:11) Nupay kasta, adda latta dagiti tiempo a nagkamali ni Pablo ken nariknana a kasla saannan a kaya ti agbalbaliw. Ngem no kasta ti mariknana, kanayon a pampanunotenna dagiti inaramiden kenkuana ni Jehova. Dayta ti nangpapigsa kenkuana nga agtultuloy nga agbalbaliw tapno maparagsakna ni Jehova.—Roma 7:​21-25.

13. Kasanotayo a matulad ni Pablo?

¹³ Kas ken Pablo, uray no nabayagtayon nga agserserbi ken Jehova, masapul latta nga itultuloytayo nga uksoben ti daan a personalidad ken isuot ti baro a personalidad, ti naespirituan a kawes nga ipapaay ni Jehova. Agkamalitayo amin ken mailaw-antayo no dadduma. Kas pagarigan, mabalin a makapungtottayo wenno makaibaga ken makaaramidtayo iti pakasaktan ti dadduma. Ngem no mapasamak dayta, saantay koma a panunoten a saantayon a makapagbalbaliw ken saantayon a maparagsak ni Jehova. Imbes ketdi, ditay koma sumuksuko a mangbalbaliw iti panagpampanunot ken ar-aramidtayo. (Roma 12:​1, 2; Efe. 4:24) Panunotem daytoy. No nalawa unay ti badom, ipa-repair-mo tapno maisakto iti rukodmo. Ti bado ti mai-adjust, saan a sika. Ngem saan a kasta ti naespirituan a kawes. Masapul a datayo ti ag-adjust tapno arigna umanaytayo iti dayta. Nainkalintegan laeng ngarud a datayo ti masapul nga agbalbaliw tapno maitunostayo ti biagtayo kadagiti estandarte ni Jehova. Laglagipentayo koma a kanayon dayta.

AGTALINAED ITI NAESPIRITUAN A PAGTAENGAN KAS KEN DAVID

14-15. Kasano nga ipapaayan ni Jehova ti ilina iti naespirituan a pagtaengan? (Salmo 27:5) (Kitaen met ti ladawan.)

¹⁴ Tapno agbalintayo a pudpudno a naragsak, saan laeng a naespirituan a taraon ken naespirituan a kawes ti kasapulantayo. Kasapulantayo met ti naespirituan a pagtaengan. Ania dayta, ken ania ti masapul nga aramidentayo tapno agtultuloytayo a maprotektaran iti dayta a pagtaengan?

¹⁵ Imbaga ni Ari David ti maipapan iti naespirituan a pagtaengan nga ipapaay ni Jehova. (Basaen ti Salmo 27:5.) Kasano nga ipapaay dayta ni Jehova kadagiti agserserbi Kenkuana? Protprotektaranna ida manipud iti asinoman wenno aniaman a naan-anay a mangdadael iti relasionda kenkuana. Ikarkarina nga awan ti aniaman nga armas a naaramid maibusor kadakuada nga agballigi. (Sal. 34:7; Isa. 54:17) Agpayso a nabileg ni Satanas, dagiti demoniona, ken dagiti mangidaddadanes kadatayo. Ngem ditay koma liplipatan nga adayo a nabilbileg ni Jehova ngem kadakuada. Uray man pay no bilang ta patayendatayo, sigurado a pagungarennatayto ni Jehova. (1 Cor. 15:​55-57; Apoc. 21:​3, 4) Tultulongannatayo met ni Jehova no adda pakadandanagan wenno pakaburburiborantayo tapno saantayo nga agsardeng nga agserbi kenkuana. (Prov. 12:25; Mat. 6:​27-29) Ipapaay met ti naayat a nailangitan nga Amatayo dagiti naespirituan a kapamiliatayo tapno tulongan ken pabilgendatayo. Ipapaayna met dagiti panglakayen a mangisuro ken mangipastor kadatayo. (Isa. 32:​1, 2) No met makigimongtayo, mapalagipantayo kadagiti mabalintayo pay nga aramiden tapno matulongan ken maprotektarannatayo ni Jehova.—Heb. 10:​24, 25.

16. Kasano a prinotektaran ni Jehova ni David?

¹⁶ Idi nagtulnog ni David ken Jehova, tinulongan ni Jehova a makaaramid kadagiti nainsiriban a desision isu a nagbalin a naragsak ni David. Iti kasta a pamay-an a prinotektaran isuna ni Jehova. (Idilig ti Proverbio 5:​1, 2.) Iti sabali a bangir, idi sinukir ni David dagiti estandarte ni Jehova, saan nga inliklik ni Jehova kadagiti resulta dagiti desisionna. (2 Sam. 12:​9, 10) Ngem komusta ngay idi nagrigat ni David gapu iti basol ti dadduma? Imbukbok ni David ti amin a pakadandanaganna ken Jehova babaen ti kararag, isu a prinotektaran ni Jehova. Kasano? Liniwliwana ni David. Impasiguradona nga ay-ayatenna unay ni David ken itultuloyna a tarabayen ken aywanan.—Sal. 23:​1-6.

17. Kasanotayo a matulad ni David?

¹⁷ Matuladtayo ni David no agpaiwanwantayo ken Jehova no agdesdesisiontayo. Masapul met a laglagipentayo a no saantayo nga agtulnog ken Jehova, saannatayo nga iliklik kadagiti dakes a resulta ti desisiontayo. (Gal. 6:​7, 8) Ngem no agrigattayo gapu iti basol ti dadduma, mabalintayo nga ibukbok ti linaon ti pusotayo ken Jehova babaen ti kararag. Makapagtalektayo a liwliwaennatayo ken ipasiguradona nga ay-ayatennatayo.—Fil. 4:​6, 7.

ITULTULOYMO A PENKEN TI NAESPIRITUAN A KASAPULAM

18. Ania ti masapul a pagannadantayo, ken kasanotayo a maitultuloy a mapennek ti naespirituan a kasapulantayo? (Kitaen met dagiti ladawan.)

¹⁸ Ti tinawen a tekstotayo para iti 2026 ket: “Naragsak dagiti sipapanunot iti naespirituan a kasapulanda.” Ad-adda pay a masapul nga iyaplikartayo dayta ita. Apay? Gapu ta agbibiagtayo iti lubong a napno kadagiti saan a managyaman a tattao a mangibagbaga a saanda a kasapulan a penken ti naespirituan a kasapulanda. Adu met dagiti mamati iti Dios ngem saanda nga agdaydayaw iti umiso a pamay-an. Agtaltalekda ketdi iti ulbod a relihion ken agpapaiwanwanda kadagiti tattao. Ditay koma pulos ipalubos a maimpluensiaantayo kadakuada. Ania ngarud ti masapul nga aramidentayo? Itultuloytayo ti agpennek iti naespirituan a taraon nga ipapaay ni Jehova, ikawestayo ti baro a personalidad, ken agtalinaedtayo iti naespirituan a pagtaengan a sadiay a protprotektarannatayo ni Jehova.