No Apay a Kasapulantayo ti Subbot

1-2. Apay a masapul nga adda mangisalakan kadatayo? (Roma 7:22-24) (Kitaen met ti ladawan.)

PANUNOTEM daytoy nga eksena. Narba ti maysa a building ket adda lalaki a napupok wenno na-trap gapu ta napandagan. Sibibiag met ketdi isuna, ngem saan a makaruar. Ti laeng maaramidanna ket agpukkaw iti tulong, ken mangnamnama nga adda mangisalakan kenkuana.

² Kasta met laeng ti situasion ti tunggal maysa kadatayo. Kasano? Idi nagsukir ni Adan ken Jehova, nagbalin a managbasol. Kalpasanna, impatawidna ti basol iti amin nga annakna. Kas resultana, arigna napupok ti intero a sangatauan iti natawid a basol ket awan a pulos ti makalapsut kadagiti epektona. Iti surat ni apostol Pablo kadagiti taga-Roma, imbagana ti marikrikna ti maysa a managbasol. (Basaen ti Roma 7:22-24.) Impakaasina a maisalakan koma ‘iti bagi a mangiturturong kenkuana iti kasta nga ipapatay.’ Narikna ni Pablo a saanna a maliklikan ti natawid a basol a mangiturong iti ipapatay. (Roma 6:23) Kasta met laeng ti mapaspasarantayo ita. Kasapulantayo unay nga adda mangisalakan kadatayo!

3. Ania ti nagbalin a posible gapu iti subbot?

³ Ngem kalpasan a dinakamat ni Pablo ti narigat a mapaspasaranna, imbagana nga adda met namnama. Idi insaludsodna: “Asino ti mangisalakan kaniak iti bagi a mangiturturong kaniak iti kastoy nga ipapatay?” nalawag a sinungbatanna ti saludsodna. Imbagana: “Agyamanak iti Dios baeten ken Jesu-Kristo nga Apotayo!” (Roma 7:25) Ti tuktukoyen ni Pablo ket ti daton a subbot ni Jesus.a Gapu iti subbot, (1) mapakawan dagiti basoltayo, (2) adda namnamatayo nga agbalin a perpekto, ken (3) maikappiatayo iti Namarsua kadatayo. Bayat a pagsasaritaantayo dagita, lallalo nga umuneg ti ayattayo ken Jehova, “ti Dios a mangted iti namnama.” (Roma 15:13) Lallalo met nga agyamantayo ken Jesus a “nangwayawaya kadatayo babaen ti subbot.”—Col. 1:14.

GAPU ITI SUBBOT, MAPAKAWANTAYO

4-5. Apay a kasapulantayo amin ti subbot? (Eclesiastes 7:20)

⁴ Kasapulantayo ti subbot tapno mapakawan dagiti basoltayo. Gapu ta imperpektotayo, agbasoltayo iti man sao wenno aramid. (Basaen ti Eclesiastes 7:20.) Nadagsen ti dadduma a basol. Kas pagarigan, sigun iti Mosaiko a Linteg, madusa iti ipapatay ti asinoman a makikamalala wenno mangpapatay iti sabali a tao. (Lev. 20:10; Num. 35:30, 31) Ngem adu met a basol ti saan a kasta ti kadagsenna. Nupay kasta, maibilang latta a basol. Kas pagarigan, imbaga ni salmista David: “Annadakto ti addangko tapno saanak nga agbasol gapu iti dilak.” (Sal. 39:1) Ipakita dayta a no dadduma, mabalin a makabasoltayo met gapu iti ibagatayo.—Sant. 3:2.

⁵ Panunotem dagiti imbagbagam ken inar-aramidmo iti napalabas. Adda kadi naibagam iti sabsabali a no mabalinmo la koma a sublian ket saanmo latta koman nga imbagbaga? Adda kadi dagiti naaramidam a kamali a pagbabbabawyam? Sigurado nga amintayo ket adda naibaga ken naaramidtayo a nagbabbabawyantayo. Kuna ti Biblia: “No ibagbagatayo, ‘Awan ti basoltayo,’ loklokuentayo ti bagitayo ket awan kadatayo ti kinapudno.”—1 Juan 1:8.

6-7. Ania ti pangibatayan ni Jehova a mangpakawan kadagiti basoltayo? (Kitaen met ti ladawan.)

⁶ Ti subbot ti natibker a pangibatayan ni Jehova a mangpakawan kadagiti basoltayo. (Efe. 1:7) Ngem uray no pakawanen ni Jehova dagiti basoltayo gapu iti subbot, dina kayat a sawen a basta palabsenna lattan dagita a kasla ket tay awan laeng kenkuana no makabasolka. Ti agpayso, kagurgura ni Jehova ti basol. (Isa. 59:2) Gapu iti perpekto a hustisiana, nangaramid iti pangibatayan tapno pakawanenna dagiti basoltayo.

⁷ Ikalkalikagum idi ti Mosaiko a Linteg nga agdaton dagiti Israelita iti animal tapno maabbongan dagiti basolda. (Lev. 4:27-31; 17:11) Ngem ipakita dagita a daton a kasapulan dagiti tattao ti nasaysayaat pay a daton. Ania dayta? Isu ti panangidaton ni Jesus iti biagna a mangyeg kadagiti nagsasayaat a bendision kadagiti tattao. Dayta ti legal a pangibatayan ni Jehova a mangpakawan kadagiti basoltayo. Naawatan ni Pablo ti kinapateg ti panangidaton ni Jesus iti biagna, kas makita iti suratna kadagiti Kristiano a taga-Corinto. Kalpasan a dinakamatna dagiti dakes nga ar-aramidenda idi, imbagana kadakuada: “Nadalusankayon; napagbalinkayon a nasantuan; naideklarakayon a nalinteg babaen ti nagan ni Apotayo a Jesu-Kristo ken ti espiritu ti Diostayo.”—1 Cor. 6:9-11.

8. Ania ti mabalinmo nga utoben bayat nga agsagsaganaka a maki-Memorial ita a tawen?

⁸ Bayat nga agsagsaganaka a maki-Memorial ita a tawen, iwayaam nga utoben ti kaipapanan ti panangpakawan kenka ni Jehova. Kas pagarigan, gapu iti subbot, saanmon a kasapulan ti makonsiensia wenno maladingitan unay gapu kadagiti basol a nagbabawyamon. Ngem kasano no marigatanka a mamati a talaga a pinakawannakan ni Jehova? Baka ibagbagam iti bagim, ‘Ammok a napakawannakon ni Jehova, ngem diak mapakawan ti bagik.’ No kasta ti marikriknam, tantandaanam daytoy: Ni Jehova ti mangpakawan, ken inikkanna met ti Anakna iti autoridad a mangukom. Ngem saannaka nga inikkan ni Jehova wenno ti asinoman a tao iti karbengan a mangibaga no asino ti pakawanenna wenno saan. Ibaga ti Biblia: “No magmagnatayo iti lawag gapu ta [ni Jehova] ti pagtataudan ti lawag, . . . ti dara ni Jesus nga Anakna ti mangdalus kadatayo iti amin a basol.” (1 Juan 1:6, 7) Makapagtalektayo a pudno dayta a kas iti dadduma pay nga isursuro ti Biblia. Gapu iti subbot, addan legal a pangibatayan ni Jehova a mangpakawan kadatayo. Kuna ti Saona: ‘Sisasagana a mangpakawan.’—Sal. 86:5.

GAPU ITI SUBBOT, ADDA NAMNAMATAYO NGA AGBALIN A PERPEKTO

9. Iti Biblia, ania ti kaipapanan ti sao a basol? (Salmo 51:5 ken footnote)

⁹ Iti Biblia, ti sao a “basol” ket saan laeng a tumukoy iti aramid. Tumukoy met dayta iti imperpekto a kasasaad a natawidtayo sipud idi naiyinawtayo. (Basaen ti Salmo 51:5 ken footnote.) Gapu iti natawidtayo a kinaimperpekto, adda tendensiatayo a makapanunot ken makaaramid kadagiti di umiso. Saan metten a perpekto ti bagitayo a kas iti panangdisenio ni Jehova, isu nga agsakittayo, lumakay ken bumakettayo, ken mataytayo. Dayta ti rason no apay nga uray dagiti kayyanak ket mabalin nga agsakit ken matay uray no awan ti inar-aramidda a basol. Dayta pay ti makagapu no apay nga agrigat ken matay agpadpada dagiti naimbag ken dakes a tattao. Natawid ngarud ti amin nga annak ni Adan ti imperpekto a kasasaad.

10. Ania ti narikna da Adan ken Eva kalpasan a nagbasolda?

¹⁰ Panunotem ti narikna da Adan ken Eva kalpasan a nagbasolda ken nagbalinda nga imperpekto. Naapektaran unay ti emosionda. Kalpasan a nagrebelde da Adan ken Eva, dagus a napadasanda dagiti dakes nga epekto ti panangsalungasingda iti linteg ti Dios a “naisurat iti pusoda.” (Roma 2:15) Adda nariknada a saan a nasayaat a panagbalbaliw iti bagida. Isu a napilitanda a mangabbong iti dadduma a paset ti bagida ken aglemmengda a kas kriminal manipud iti Namarsua kadakuada. (Gen. 3:7, 8) Iti kaunaan a gundaway, narikna da Adan ken Eva ti pannakakonsiensia, panagbain, ken panagdanag. Ket saanda a naliklikan dagita agingga a natayda.—Gen. 3:16-19.

11. Ania ti epektona kadatayo ti natawidtayo a basol?

¹¹ Gapu ta imperpektotayo amin, makonsiensia, mabain, ken madanagantayo met no dadduma. Gapu iti natawidtayo a basol, agsakittayo ken masaktan ti riknatayo. Isu a kasanoman ti panangikagumaantayo a mangpasayaat iti kasasaadtayo ken mangliklik kadagiti problema, addanto latta dagiti saantayo a masolbar a bukbukodtayo. Apay? Ibaga ti Biblia a ‘nagbalintayo nga awan serserbina.’ (Roma 8:20) Kasta ti mapaspasamak kadatayo kas indibidual ken iti amin a tattao. Kas pagarigan, ikagkagumaan dagiti tattao a pasayaaten ti aglawlaw, pagpatinggaen ti krimen, pukawen ti kinapanglaw, ken pagkaykaysaen ti amin a nasion. Uray no agparang nga adda met maar-aramidanda, didanto pulos masolbar dagita a problema. Kasano a makatulong ti subbot tapno mayaontayo manipud iti nakarigrigat a kasasaadtayo?

12. Ania a namnama ti ipaay ti subbot?

¹² Mangipaay ti subbot iti namnama a “mawayawayaanto . . . ti sangaparsuaan iti nakaadipenanna nga agrupsa a bagi.” (Roma 8:21) Kayatna a sawen nga inton agbalintayon a perpekto iti baro a lubong ti Dios, saantayton nga agsakit iti pisikal, mental, wenno emosional. Saantayto metten a makarikna iti pannakakonsiensia, panagbain, wenno panagdanag. Kanayonanna, iturayannatayton ti nangsubbot kadatayo a ni Jesu-Kristo, ti “Prinsipe ti Kappia.” Tulongannanto dagiti tattao a mangsolbar kadagiti amin a problema a saanda a masolbar a bukbukodda.—Isa. 9:6, 7. 

13. Ania pay ti mabalinmo nga utoben bayat nga agsagsaganaka a maki-Memorial ita a tawen?

¹³ Imadyinem no kasanonto ti biagmo inton perpektokan. Agriingka iti kada bigat a nakasarsaranta ken nakasalsalun-atka. Saanka met a madanagan a baka mabisinan, agsakit, wenno matayka wenno uray dagiti ipatpategmo iti biag. Ngem uray pay itan, agbalin a natalna ti panunotmo no ‘petpetam ti namnama a kas angkla ti kararua a sigurado ken natibker.’ (Heb. 6:18, 19) Makatulong ti angkla tapno saan a mayallo-allon ti bangka iti uray sadino. Makatulong met ti namnamatayo kas Kristiano tapno saan a nalaka a mayallo-allon ti pammatitayo ken maibturantayo aniaman ti problematayo. Makapagtalektayo a ni Jehova “ti manggunggona kadagidiay napasnek a mangsapsapul kenkuana.” (Heb. 11:6) Gapu iti subbot, natalna ti panunottayo uray ita ken sigurado ti namnamatayo iti masanguanan.

GAPU ITI SUBBOT, MAIKAPPIATAYO ITI DIOS

14. Ania ti nagbalin nga epekto ti basol iti relasiontayo iti Namarsua kadatayo, ken apay?

¹⁴ Sipud nagbasol da Adan ken Eva, nayadayo wenno naisina dagiti tattao iti Dios. Ibaga pay ketdi ti Biblia a ti sangatauan ket nagbalin a kabusor ti Namarsua. (Roma 8:7, 8; Col. 1:21) Apay? Gapu iti perpekto a pagalagadan ni Jehova, saanna nga ipalubos nga agtultuloy ti basol. Ibaga ti Biblia maipapan ken Jehova: “Nasin-aw unay dagiti matam a kumita iti dakes, ken saanmo a panuynoyan ti kinadakes.” (Hab. 1:13) Gapu iti basol, nadadael ti nasayaat a relasion ti tao iti Dios. Ket imposible a maisubli dayta no saantayo a maikappia manen kenkuana. Nagbalin laeng a posible dayta gapu iti subbot.

15. Kasano a naay-ayo ni Jehova gapu iti subbot, ken ania ti resultana?

¹⁵ Ibaga ti Biblia a ni Jesus “ti pakikappia a daton para kadagiti basoltayo.” (1 Juan 2:2) Ti Griego a sao a naipatarus kas “pakikappia a daton” mabalin a tumukoy iti “pamay-an a pangay-ayo.” Kasano a naay-ayo ni Jehova gapu iti subbot? Siempre, saantayo a panunoten a naay-ayo isuna gapu iti ipapatay ti Anakna. Imbes ketdi, gapu iti subbot, adda itan natibker ken legal a pangibatayan ni Jehova a mangisubli iti relasionna iti tao. (Roma 3:23-26) ‘Imbilangna’ pay ketdi a nalinteg dagiti matalek a nagdaydayaw kenkuana sakbay ti ipapatay ti Kristo. (Gen. 15:1, 6) Apay? Gapu ta sigurado ni Jehova a maipaayto ti Anakna a ni Jesus ti subbot. (Isa. 46:10) Ti subbot ti nanglukat iti dalan tapno maikappia ti tao iti Dios.

16. Ania ti sabali pay a mabalinmo nga utoben bayat nga agsagsaganaka a maki-Memorial ita a tawen? (Kitaen met ti ladawan.)

¹⁶ Panunotem no kasano kasayaat ti biagmo ita gapu ta naikappiakan iti Dios. Kas pagarigan, mabalin nga aw-awagam ni Jehova nga “Amam,” kas imbilin ni Jesus. (Mat. 6:9) Ken no dadduma, baka aw-awagam met ni Jehova kas “Gayyemmo.” No usarentayo dagiti termino nga “Ama” wenno “Gayyem,” masapul nga aramidentayo dayta a nabuyogan iti panagraem ken kinapakumbaba. Apay? Managbasoltayo ngamin. Ti marikriknatayo a kinasinged ken Jehova ket saan a gapu iti bukodtayo a panangikagumaan. Nagbalin laeng a posible dayta gapu iti subbot. Babaen ken Jesus, pinagbalin ni Jehova a posible a “maikappia kenkuana ti amin a banag babaen ti dara [ni Jesus] a naibukbok iti kayo a pagtutuokan.” (Col. 1:19, 20) Isu nga uray no imperpektotayo pay laeng, matagiragsaktayon ti nasinged a relasion ken Jehova.

IPAKITA TI SUBBOT A NAKAAS-ASI NI JEHOVA

17. Kasano nga ipakita ti subbot a nakaas-asi ni Jehova? (Efeso 2:4, 5)

¹⁷ Ipakita ti subbot a ni Jehova ket “napnuan iti asi.” “Pinagbiagnatayo . . . idi naibilang a nataytayo gapu kadagiti kamali.” (Basaen ti Efeso 2:4, 5.) Dagidiay “addaan iti umiso a kababalin nga umawat iti agnanayon a biag” ket kasla iti lalaki a napandagan iti narba a building. Agpukpukkawda iti tulong gapu ta bigbigenda nga arigna napupokda iti natawidda a basol isu a kasapulanda unay ti maisalakan. (Ara. 13:48) Sungsungbatan ni Jehova ti panagpatulongda babaen ti mensahe ti Pagarian tapno maam-ammoda isuna ken ti Anakna a ni Jesus. (Juan 17:3) No ipapan ni Satanas a natungdayen ti panggep ti Dios gapu iti panagbasol da Adan ken Eva, nagdakkel a kamalina.

18. Bayat nga ut-utobentayo ti subbot, ania nga isyu ti masapul a laglagipentayo?

¹⁸ Bayat nga ut-utobentayo dagiti bendision a nagbalin a posible gapu iti subbot, laglagipentayo koma ti nagpateg nga isyu nga imbangon ni Satanas. Impaay ni Jehova ti subbot saan laeng a tapno isalakannatayo no di ket tapno masungbatanna ti karit ni Satanas idiay hardin ti Eden. (Gen. 3:1-5, 15) Babaen ti subbot, santipikaren ni Jehova ti naganna, ken dalusanna manipud iti aniaman a pammadakes. Usarenna met ti subbot tapno isalakannatayo manipud iti basol ken ipapatay a mangpaneknek nga isu ket Dios ti ayat. Ken gapu iti nagpaiduma a kinaimbagna, uray no managbasoltayo, ipalpalubosna a paneknekantayo a kinaulbod dagiti ibagbaga ni Satanas maipapan kenkuana. (Prov. 27:11) Kasanom a maipakita ti panagyamanmo iti subbot? Masungbatan dayta iti sumaruno nga artikulo.