Kasanom a Maipakita nga Agyamyamanka iti Subbot?

1-2. Ania ti kayattayo nga aramiden gapu iti subbot? (2 Corinto 5:14, 15) (Kitaen met ti ladawan.)

NO NAPUPOKKA iti narba a building ket adda nangisalakan kenka, ania ngay ti mariknam? Sigurado la ketdi nga agyamyamanka unay kenkuana. Isu nga uray no adda dagiti kakaduam a naisalakan, umasidegka a mismo tapno iyebkasmo ti panagyamanmo. Kayatmo ngamin nga ipakita a maap-apresiarmo unay ti inaramidna ken saanmo a pulos malipatan dayta.

² Kas nailawlawag iti napalabas nga artikulo, saantayo a kaya nga isalakan ti bagitayo manipud kadagiti epekto ti natawidtayo a basol. Ket dayta ti inaramid ni Jehova para kadatayo. Impaayna ti Anakna tapno (1) mapakawan dagiti basoltayo, (2) adda namnamatayo nga agbalin a perpekto, ken (3) maikappiatayo iti Dios. Gapu iti dayta, adda namnamatayo nga agbiag iti agnanayon iti baro a lubong ni Jehova. Impakita ni Jesus nga ay-ayatenna unay dagiti tattao idi insakripisiona ti biagna para kadatayo. Ti agpayso, ay-ayatennan dagiti tattao uray sakbay pay nga immay ditoy daga. (Prov. 8:30, 31) Insurat ni apostol Pablo a ‘tignayennatayo ti ayat ti Kristo.’ (Basaen ti 2 Corinto 5:14, 15.) Kayatna a sawen, gapu iti ayat ni Jesus kadatayo, matignaytayo met a mangipakita iti ayat. Kayattayo nga ipakita a ditay pulos malipatan ti inaramidna para kadatayo.

3. Apay a mabalin nga agduduma ti panangipakitatayo iti panagyamantayo iti subbot?

³ Kasanom a maipakita nga agyamyamanka iti subbot? Mabalin a naiduma ti sungbatmo iti sabali. Kasla kastoy dayta. Adda tallo a tao a mapan iti maymaysa a destinasion ngem agduduma ti naggapuanda. Siempre, normal laeng nga agduduma ti rutada. Kasla kasta met laeng ti rutatayo a mapan iti destinasiontayo: Ti panangipakita iti panagyamantayo iti subbot. Ngem mabalin nga agduduma ti panangipakita iti dayta depende iti kasasaad ti relasionmo ken Jehova ita, kas no maysaka a (1) mayad-adalan iti Biblia, (2) bautisado a Kristiano, ken (3) karnero nga immadayo iti arban. Dagita ti pagsasaritaantayo iti daytoy nga artikulo.

MAYAD-ADALAN ITI BIBLIA

4. Ania ti makitkita ni Jehova kadagiti mayad-adalan iti Biblia?

⁴ No agad-adalka iti Biblia ita, laglagipem koma daytoy: Gapu ta kayatmo ti agsursuro maipapan ken Jehova, ipakitana a maysaka kadagiti iyas-asideg ni Jehova kenkuana. (Juan 6:44; Ara. 13:48) Ibagbaga ti Proverbio 17:3 a ‘ni Jehova ti mangsuksukimat kadagiti puso.’ Kaipapanan dayta a makitkitana ti amin nga ar-aramidem para kenkuana. Maragragsakan met a makakita iti panagrang-aymo ken kadagiti ar-aramidem a panagbalbaliw tapno masurotmo dagiti estandartena. (Prov. 27:11) Gapu iti subbot, posible nga agbalinka a gayyem ni Jehova. (Roma 5:10, 11) Saanmo koma a pulos liplipatan dayta.

5. Kasano a maaramid dagiti mayad-adalan iti Biblia ti ibagbaga ti Filipos 3:16?

⁵ No maysaka a mayad-adalan iti Biblia, kasanom a maipakita nga agyamyamanka iti subbot? Surotem ti balakad ni apostol Pablo kadagiti taga-Filipos: “Aniaman ti nagrang-ayantayon, itultuloytayo ti naurnos a panangsurot iti dayta iti isu met la a pamay-an.” (Fil. 3:16) Kastoy met ti sabali a pannakaipatarus dayta a teksto: “Masapul nga agtultuloytayo iti dalan a pagturturongantayo.” Kayatna a sawen, dimo ipalubos nga adda asinoman wenno aniaman a mangpasardeng kenka nga agtultuloy a magna iti dalan nga agturong iti biag.—Mat. 7:14; Luc. 9:62.

6. Ania ti mabalin nga aramiden dagiti mayad-adalan iti Biblia no marigatanda nga agbalbaliw? (Deuteronomio 30:11-14) (Kitaen met ti ladawan.)

⁶ Kasano ngay no marigatanka a mangakseptar iti kaad-adalmo a pannursuro ti Biblia? I-research-mo ken ikararagmo ken Jehova a tulongannaka tapno mas maawatam dayta. (Sal. 86:11) No ngay marigatanka latta a mangawat? Saanmo pay laeng unay a pampanunoten. Ti napateg ket itultuloymo ti agadal iti Biblia. No ngay marigatanka a mangisardeng iti maysa nga aramid a kagura ni Jehova? Tantandaanam nga ammo ni Jehova nga imperpektoka. Isu a saanna a kiddawen kenka ti saanmo a kaya nga aramiden. Kabaelam a suroten dagiti estandartena! (Basaen ti Deuteronomio 30:11-14.) Ken ikarkari ni Jehova a tulongannaka. (Isa. 41:10, 13; 1 Cor. 10:13) Isu a dika sumuksuko. Saan koma a dagiti pakarigatan ti pagpokusam. Agpokuska ketdi kadagiti inaramiden ni Jehova para kenka, agraman ti subbot. No masursurom a lallalo pay nga ayaten ni Jehova, makitamto a “saan a makapadagsen dagiti bilinna.”—1 Juan 5:3.a

7. Ania ti panunoten a naimbag dagiti napadakkel iti kinapudno?

⁷ Dakayo ngay nga agtutubo a napadakkel iti kinapudno? Mayad-adalankayo met iti Biblia. Ti agpayso, dakayo ti kapatgan nga iyad-adalan dagiti nagannakyo. Kuna ti Biblia: “Umasidegkayo iti Dios, ket umasidegto kadakayo.” (Sant. 4:8; 1 Cron. 28:9) No sika ti umuna nga umasideg ken Jehova, umasidegto met kenka. Laglagipem a para kenkuana, saanka laeng a basta paset ti maysa a grupo. Kitkitaennaka kas indibidual. Ipatpategnaka saan a gapu ta dimmakkelka iti pamilia dagiti Saksi, no di ket kayatna ti makigayyem kenka a mismo. Kasano a nagbalin a posible dayta? Gapu iti subbot. Saanmo koma a pulos liplipatan dayta. (Roma 5:1, 2) Isu a sakbay a maki-Memorial-ka ita a tawen, panunotem a naimbag ti inaramid da Jehova ken Jesus para kenka. Dayta koma ti pagbalinem nga inspirasion a manggaw-at kadagiti naespirituan a kalatmo, aniaman dagita, tapno maipakitam nga agyamyamanka iti inaramid ni Jehova para kenka.b

BAUTISADO A KRISTIANO

8. Kasano a naipakita dagiti bautisado a Kristiano nga agyamyamanda iti subbot?

⁸ No bautisadoka a Kristiano, naipakitamon nga agyamyamanka iti subbot iti nagduduma a pamay-an. Kas pagarigan, binalbaliwam ti biagmo tapno maparagsakmo ni Jehova ken agbalinka a gayyemna. Nagtulnogka met iti bilin ni Jesus a mapan mangasaba ken agaramid iti adalan. Indedikarmo ti biagmo ken Jehova ken nagpabautisarka. Mabalin pay ketdi a binusbusordaka gapu ta pinilim ti agserbi ken Jehova. (2 Tim. 3:12) Ngem kitaem, itultuloymo latta ti agmatalek ken Jehova. Ipakita dayta nga ay-ayatem unay ni Jehova ken agyamyamanka iti subbot.—Heb. 12:2, 3.

9. Ania ti masapul a pagannadan dagiti bautisado a Kristiano?

⁹ Kas bautisado a Kristiano, adda ti masapul a pagannadantayo. Baka iti panaglabas ti tiempo, in-inuten a bumabaaw ti panagyamantayo iti subbot. Kasano a posible dayta? Kitaentayo ti napasamak kadagiti Kristiano idiay Efeso idi umuna a siglo. Idi napagungar ni Jesus, kinomendaranna ida gapu iti panagibturda. Ngem imbagana kadakuada: “Daytoy ti diak kayat kenka: saanen a kas idi damo ti ayatmo.” (Apoc. 2:3, 4) Ania ti ipakita ti imbaga ni Jesus? Posible nga in-inut a bumaaw ti kinaregta ti maysa a Kristiano agingga nga agbalin laengen dayta a rutina. Mabalin met nga agkarkararag, makigimgimong, ken mangaskasaba. Ngem baka ar-aramidenna laengen dagita gapu ta isu ti nakairuamannan, saanen a gapu iti ayat. Ania ngarud ti mabalinmo nga aramiden no panagriknam ket saanen a kas iti dati ti ayatmo ken Jehova?

10. Kasanom a ‘mautob’ ken ‘maipamaysa nga asikasuen’ dagiti naespirituan nga aktibidadmo? (1 Timoteo 4:13, 15)

¹⁰ Imbaga ni apostol Pablo ken Timoteo a masapul nga ‘utoben’ ken ‘ipamaysana nga asikasuen’ dagiti naespirituan nga aktibidadna. (Basaen ti 1 Timoteo 4:13, 15.) Maaramidmo met dayta no mangpanunotka kadagiti pamay-an tapno agtalinaedka a naregta kadagiti naespirituan nga aktibidad. (Roma 12:11; kitaen met ti study note a “Be aglow with the spirit.”) Kas pagarigan, baka mabalinmo ti ad-adda pay nga agsagana tapno mas makapagpokuska no gimong. No met agadalka iti Biblia, baka makatulong no mapanka iti naulimek a lugar a siksika laeng tapno makapagpanunotka a naimbag ken mautobmo dagiti ad-adalem. Makatulong dayta tapno ad-adda a makasursuroka iti personal a panagadalmo. Panunotem daytoy. Tapno saan a maiddep ti apuy, masapul a kanayonmo a sungrodan. Kasla kasta met laeng no maipapan iti panagyamantayo iti amin nga inaramid ni Jehova kadatayo, agraman ti subbot. Masapul nga arigna kanayontayo a sungrodan tapno saan a maiddep. Kasta met, kadagiti lawas sakbay ti Memorial, baka makatulong no panunotem dagiti naisangsangayan a bendision a maaw-awatmo gapu ta maysaka a Saksi ni Jehova. No aramidem amin dagita, sigurado la ketdi nga arigna kanayon a sumsumged ti panagyamanmo iti subbot—ti rason no apay nga addaanka iti nalagda a pannakigayyem ken Jehova.

11-12. No saanen a kas iti dati ti regtam, kayatna kadi a sawen nga awanen kenka ti espiritu ti Dios? Ilawlawag. (Kitaen met ti ladawan.)

¹¹ No adda tiempo a mariknam a saanen a kas iti dati ti regtam iti panagdaydayaw ken Jehova, saanka koma a maupay wenno saanmo koma nga ipapan nga awanen kenka ti espiritu ti Dios. Kastoy ti imbaga ni apostol Pablo kadagiti taga-Corinto maipapan iti ministeriona: “Uray no mapilitanak, adda latta kaniak ti annongen a naitalek kaniak.” (1 Cor. 9:17) Ania ti kayatna a sawen?

¹² Adda met dagiti tiempo nga awan gaganaygayan ni Pablo a mangasaba. Ngem uray no mariknana ti kasta, determinado latta a mangitultuloy iti ministeriona. Kayam met dayta! Determinadoka koma a mangaramid iti umiso uray no kasla awan ti gaganaygayam. Ania ti makatulong? Ikararagmo a maaddaanka iti ‘tarigagay ken pannakabalin.’ (Fil. 2:13) Basta itultuloymo laeng dagiti naespirituan nga aktibidadmo. Inton agangay, masiguradom a mapasublimto met laeng ti kinaregtam ken ad-addanto pay nga umuneg ti ayatmo ken Jehova.

13. Kasanotayo a maitultuloy a masubok no ‘agbibiagtayo maitunos iti pammati’?

¹³ Makatulong no sagpaminsan a panunotentayo no maar-aramidtayo met laeng ti ibagbaga ti 2 Corinto 13:5: “Itultuloyyo a suboken no agbibiagkayo maitunos iti pammati; itultuloyyo a paneknekan no aniakayo.” Mabalintayo nga isaludsod iti bagitayo: ‘Ti pay kadi Pagarian ti kapatgan iti biagko?’ (Mat. 6:33) ‘Ipakpakita kadi dagiti buybuyaek wenno dagiti ar-aramidek no agrelrelaksak a kagurak ti dakes?’ (Sal. 97:10) ‘Tumultulongak kadi tapno kanayon nga agkaykaysa dagiti kakabsat ken adda talna iti kongregasion?’ (Efe. 4:2, 3) Bayat ti tiempo ti Memorial, nagsayaat nga utobentayo dagita. No ngamin utobentayo ti inaramid da Jehova ken Jesus para kadatayo, matignaytayo a mangipakita iti panagyaman ken Jehova ken maipakitatayo nga agbibiagtayo para ken Kristo, saan ketdi a para iti bagitayo.c

IMMADAYO A KARNERO

14. Apay a mabalin nga umadayo ti dadduma a Kristiano iti kongregasion?

¹⁴ Dadduma a Kristiano ti simmardengen a makikadua iti kongregasion kalpasan ti sumagmamano a bulan wenno tawtawen pay ketdi a matalek a panagserbida ken Jehova. Apay? Dadduma ngamin ti marigrigatan gapu kadagiti “pakaringgoran iti biag.” (Luc. 21:34) Adda met dagiti naitibkol gapu iti imbaga wenno inaramid ti maysa a kapammatian. (Sant. 3:2) Adda met dagiti nakaaramid iti nadagsen a basol ken agpangadua nga agpatulong. Aniaman ti rason nga immadayoka, ania ti mabalinmo nga aramiden? Ania ti pakatignayam nga aramiden gapu iti impaay da Jehova ken Jesus a subbot?

15. Ania ti mangipakita nga ipatpateg latta ni Jehova dagiti karnero nga immadayo iti arbanna? (Ezekiel 34:11, 12, 16)

¹⁵ Panunotem ti marikrikna ni Jehova kadagiti immadayo. Saan a makaunget kadakuada ken saanna a linipatan ida. Ti agpayso, birbirokenna dagiti napukaw a karnero. Ket inton mabirokanna ida, tulonganna ida nga agsubli kenkuana ken pakanenna ida. (Basaen ti Ezekiel 34:11, 12, 16.) Ar-aramiden met kadi ni Jehova dayta kenka? Sigurado! Ti laengen panangbasam iti daytoy nga artikulo ipakitana a kayatmo latta a maparagsak ni Jehova ken aramiden ti umiso. Adda nakita ni Jehova a kinaimbag iti pusom isu nga inyasidegnaka iti kinapudno. Saan a nagbalbaliw ni Jehova. Kitkitaenna latta ti naimbag kenka. Isu a kayatna nga agsublikan iti pamiliana ita.

16. Ania ti makatulong iti napukaw a karnero tapno makasubli ken Jehova? (Kitaen met ti ladawan.)

¹⁶ Adda makaparegta nga ibaga ti broshur nga Agsublika ken Jehova: “Masiguradom a madadaan ni Jehova a tumulong kenka no agsublika kenkuana. Tulongannaka a mangsango kadagiti problema, mangpaimbag iti nasaktan a riknam, ken maaddaan iti talna ti panunot ken rikna a resulta ti nadalus a konsiensia. Iti kasta, matignayka manen nga agserbi ken Jehova a kadua dagiti kapammatiam.” Laglagipem met a maragsakan dagiti panglakayen a tumulong kenka. Makitamto nga agbalinda a “paglemmengan no agangin, maysa a pagkamangan no agbagyo.” (Isa. 32:2) Kas panangipakitam iti panagyamanmo iti subbot, isaludsodmo iti bagim, ‘Ania ngata ti mabalinko nga aramiden itan tapno makapagsubliak ken Jehova?’ (Isa. 1:18; 1 Ped. 2:25) Kas pagarigan, mabalinmo kadi ti makigimong iti Kingdom Hall? Mabalinmo kadi ti makisarita iti maysa kadagiti panglakayen ken ibagam kenkuana a kayatmon ti agsubli ken Jehova? Posible nga iyurnosda nga adda mangyadal kenka iti Biblia iti sumagmamano a tiempo. Masiguradom a bendisionan ni Jehova dagiti panagreggetmo tapno maipakitam nga agyamyamanka iti subbot ti Anakna.

ANIA TI ARAMIDEM?

17-18. Kasanotayo nga usaren a naimbag ti tiempotayo sakbay ti Memorial ita a tawen?

¹⁷ Imbaga ni Jesus a naipaay ti subbot “tapno saan a madadael ti asinoman a mangipakita iti pammati kenkuana no di ket maaddaan iti biag nga agnanayon.” (Juan 3:16) Babaen ti subbot, insalakannatayo ni Jehova manipud kadagiti epekto ti basol ken ipapatay. Isu a ditay koma pulos liplipatan nga ipakita ti panagyamantayo iti dayta. (Roma 3:23, 24; 2 Cor. 6:1) Kadagiti aldaw sakbay ti Memorial, nagsayaat nga utobentayo ti ayat nga impakita da Jehova ken Jesus kadatayo. Ket dayta koma nga ayat ti mangtignay kadatayo a mangipakita iti panagyaman.

¹⁸ Kasanom a maipakita nga agyamyamanka iti subbot? Mabalin a naiduma ti sungbatmo iti sabsabali. Ngem masiguradom a bendisionan ni Jehova dagiti panagreggetmo bayat a makikaduaka iti dadduma pay nga agdaydayaw kenkuana a ‘saanen nga agbibiag para iti bagida, no di ket para kenkuana a natay maigapu kadakuada.’—2 Cor. 5:15.