Imadyinem Dagiti Salaysay iti Biblia

Naglaon ti Biblia iti adu a salaysay maipapan kadagiti pudno a pasamak a pakasursuruantayo kadagiti nagpapateg a leksion. No iladawantayo dagita iti panunottayo, nalaklakatayo a maawatan ti basbasaentayo ken ad-adu ti masursurotayo iti dayta. Kitaentayo ti dadduma a makatulong tapno maimadyintayo dagiti salaysay iti Biblia.

• Basaem iti napigsa. Basaem ti Biblia iti napigsa tapno nalawlawag a maimadyinmo dagiti eksena. No basaenyo ti Biblia kas pamilia, agbalin a mas nabiag ti salaysay no adda espesipiko a karakter a basaen ti tunggal miembro.

• Imadyinem ti eksena. Ikagumaam nga ammuen ti pampanunoten ken marikrikna dagiti karakter iti salaysay. Kas pagarigan, isaludsodmo iti bagim: ‘Apay a kasdiay ti imbaga wenno inaramidna? No siak koma ti adda iti situasionna, ania koma met ti mapanunot wenno mariknak?’

• Idrowing wenno i-sketch-mo dagiti eksena. Nalaklakam a maimadyin ken matandaanan dagiti eksena wenno salaysay iti Biblia no idrowing wenno i-sketch-mo dagita. Saan a kasapulan a nakapimpintas ti drowingmo.