Dominican Republic

IDI 1492, napan ni Christopher Columbus iti kontinente ti America wenno ti maaw-awagan a “Baro a Lubong,”—napipintas a baro a daga nga aduan iti kinabaknang. Pinanagananna ti maysa kadagiti isla a nagsangladanna iti La Isla Española, wenno Hispaniola, a ti agarup 66 a porsiento dayta ket sakup itan ti Dominican Republic. Ngem iti nabiit pay, adda naidumduma a nadiskobre ti rinibu nga agnanaed iti Dominican Republic—ti um-umayen a baro a lubong nga iturayan ti Pagarian ti Dios ken addanto agnanayon a kinalinteg. (2 Ped. 3:13) Dagiti sumaganad a salaysay ket maipapan iti makapagagar a pakasaritaan dagiti nalinteg-panagpuspusoda a tattao a nakadiskobre iti daytoy nakapatpateg a banag.