Medikal a Wayawayayo​—Agsao dagiti Korte!

DAGITI tallo a nabiit pay a kaso iti korte ti mabalin a mangapektar iti biagyo ken ti medikal a pannakaagasyo. Dagiti mangngagas, kamkameng iti ospital, hues, ken dagiti Saksi ni Jehova ti nangipaay iti adu nga atension kadagiti kaso. Amin dagiti makaammo kadagiti kinapudno mabalin nga agyamanda iti pakainaigan dagitoy a kaskaso iti kalintegan ti tao, dagiti legal a pannalaknib, ken ti panagraem kadagiti linlinteg ti Dios.

Ti Kaso ni Randolph​—Natay Kalpasan Panangyalison

Ti umiso a pannakaawat iti umuna a kaso mabalin a narigatyo a magun-odan. Apay? Agsipud ta adu a pagiwarnak ken medikal a publikasion ti nangipaay iti di umiso a ladawan iti dayta. Kinapudnona daytoy a di umiso a pablaak ti nalawag a di nangay-ayo ken Judge Bambrick, iti Korte Suprema iti Estado ti Nueva York, isu a nangtaming iti kaso. Isut’ nagsurat iti mangilawlawag a 53-panid a kapanunotan.¹

Iti dayta kinuna ni Judge Bambrick a “ti maikapat a sanga iti gobierno, ti periodista,” kasta unay ti di umiso a panangiparangda iti kaso ta masapul a “lintegenna ti rekord, ket saritaenna manen ti linteg iti kaso kas iti pannakaiparangna iti hurado.” Nakalkaldaang ta ti periodista ti nagulimek maipapan iti daytoy nakapatpateg a kapanunotan a naisentro iti saanda a panagballigi. Ngem maragsakankami a mangiraman kadakayo iti nasken nga impormasion maipapan iti insurat ni Judge Bambrick. Ti umiso a salaysayna mabalin nga adda pakainaiganna iti medikal a wayawayayo, dakayo man ket maysa a doktor, maysa nga abogado, wenno basta umili a maseknan maipapan iti bukodyo a kalintegan a ramanenna ti medikal a panangagas.

Mangalatayo manipud iti naipablaak a kapanunotan ti hues kadagiti kangrunaan a kinapudno, nga isuratmi iti italiko dagiti napapateg a punto: Idi Hulio 1975, ni Mrs. Bessie Randolph (edad 45) naawat iti ospital iti Siudad ti Nueva York tapno ipasngayna ti maikapat nga anakna, babaen iti cesarean. Naammuan manipud iti dokumento iti ospital, a kas maysa kadagiti Saksi ni Jehova, isu saan nga umawat iti dara.a Ti mangngagasna inawatna ti nainget a relihiuso a pammatina, ta inaramidna ti pangngeddengna kas sipapanunot, mapagtalkan a nataengan. Kalpasan ti naballigi a panagpasngay, ti kasasaad ti matris ti nangiturong iti naan-anay a pannakaikkat ti matris. Ngem ni Judge Bambrick kinunana: “Gapu agpadpada iti kasasaad ni Mrs. Randolph ken ti pamay-an ti panagopera [ti doktor], adda nakaro unay a panagpadara.”

Bayat ti sumaganad a maysa nga oras wenno nabaybayag pay napukawna ti adu unay a dara. Idi alas 12:45 t.r. ti doktor rinugianna ti nangyalison iti maysa a yunit a dara, ket idi 1:30 t.r. ti maikadua a yunit. Nupay kasta, simmardeng ti puso ni Mrs. Randolph, ket isut’ naipakaammo a natayen idi 2:00 t.r. Kalpasanna, ti asawana (saan a maysa kadagiti Saksi ni Jehova) indarumna dagiti mangngagas ken ti ospital. Maysa a doktor ti nagbayad laengen. Kalpasanna idi Pebrero 1984 ti hurado ti nangipaay iti pangngeddeng a pabor ken Mr. Randolph. Dagiti damdamag iti daytoy ti ad-adda a mangbabalaw. Maysa a legal a publikasion kinunana: “Ti hurado naingipaay iti $1.25 milion iti asawa a lalaki ti maysa a Saksi ni Jehova a pasiente a natay kalpasan ti panagkedkedna nga umawat iti panangyalison iti dara.” Dagiti kakasta a report ti mangipaay iti impresion a dagiti dodoktor ti nangpadayaw iti pili ti pasiente a Saksi, ngem kaskasdi a naidarumda. Kas banag iti di umiso a panangipablaak ti pagiwarnak, dagiti dadduma a mangngagas pampanunotenda no masapul a makitinnulongda kadagiti Saksi ni Jehova. Sumagmamano nga ospital ti nangipasdek pay iti pagalagadan a saan a mangawat kadagiti pasiente a saan nga umanamong nga umawat iti dara. Dagiti kakasta a pagalagadan ti saan a nainsiriban iti legal ken iti pinansial agsipud ta ti pederal a linteg ti mangsalaknib a maibusor iti panangidumduma a maibatay iti rasa, relihion, wenno kolor.

Gapuna kaawatan a ni Judge Bambrick tarigagayanna a “lintegen ti rekord.” Iti kapanunotanna impaganetgetna a ti darum saan a gapu iti ipapatay a nagtaud iti panangpadayaw iti naipakaammo a panagkedked ti maysa a pasiente. Imbes ketdi, ti darum ket maipaay iti di umiso a panangagas. Inlawlawagna:

“Di masuppiat a ni Bessie Randolph ket maysa a mapagtalkan a nataengan a nalawag nga impamatmatna kadagiti naidarum nga isut’ agkedked iti aniaman a maisingasing a panangyalison iti dara a panangagas iti sidong ti aniaman a kasasaad. Ti legal a kalintegan nga agkedked iti maysa a kita ti panangagas, kunana, ket paset iti gagangay a kalintegan iti linteg a mangikeddeng a mismo wenno ti kalintegan a maipaay iti kinatarnaw ti bagi. . . .

“Masapul a laglagipen a daytoy saan a maysa a kaso iti ‘kalintegan a matay.’ Maisupadi ketdi, ni Bessie Randolph tarigagayanna unay ti agbiag. Ngem agsipud ta ti relihiuso a pammatina iparitna ti panangawatna iti mangisalakan-biag a panangyalison iti dara, ti naespirituan a ‘kalintegan iti biag nga agnanayon’ ni Bessie Randolph ad-adda a napatpateg kenkuana. . . . Ti maysa mabalin pay nga irasonna a manipud iti panangmatmat ti maysa a Saksi ni Jehova, ti panangawat ti maysa a manamati iti panangyalison iti dara ken ti panangbaybay-a iti biag nga agnanayon kaipapananna ti ‘naespirituan a panagsusaid’.”

Mabalin nga apresiarenyo a dagiti dodoktor addada iti nagrikut a kasasaad idi makitada a mabalin a matay ti pasienteda. Ngem kinuna ni Judge Bambrick: “Ti agdama a linteg ilasinna ti kalintegan ti pasiente a mangikeddeng ti pamay-an ti bukodna a pannakaagas a maibatay iti pammalubosna a nangnangruna ngem ti mabalin a rebbengen dagiti dodoktor a mangipaay iti kasapulan a medikal a pannakaagas. . . . Ti nainkalintegan a kinatarnaw ti medikal a propesion saan a marugitan no ti maysa a mapagtalkan a nataengan agkedked nga umawat iti naisingasing a pamay-an ti panangagas, uray pay ti makaisalakan-biag a panangagas, ket ti mangngagas padayawanna ti naipakaammo a pili ti pasientena.”

Ti ngay kalintegan ti Estado a dagiti annak iti pamilia saanda a mabaybay-an? Kuna ni Judge Bambrick a ni Mr. Randolph ket maysa a polis ket adda iti saad a mangsuportar ken mangaywan kadagiti annakna. Gapuna insurat ti hues: “Iti sidong dagiti kasasaad, ni Mr. Randolph addaan iti kabaelan a mangsuportar kadagiti annakna, ket pulos nga awan ti aniaman a parikut iti pannakabaybay-a.”

No maysakayo kadagiti hurado, mabalin a naammuanyo koma dagitoy a kinapudno maipapan ken Mrs. Randolph ken ti legal a kalinteganna nga agkedked iti panangyalison isu a mangwayawaya kadagiti dodoktor iti pammabasol. Naibaga kadagiti hurado: “Ti maysa a mapagtalkan a nataengan addaan iti gagangay a kalintegan iti linteg nga agkedked wenno umawat iti medikal a pannakaagas uray pay no kinapudnona ti pannakaagas mabalin a makagunggona wenno nasken pay a mangitalimeng iti biag ti pasiente. Ti kalintegan ti pasiente a mangikeddeng iti pamay-an wenno ti bukodna a pannakaagas ti nangnangruna a napateg ngem ti mabalin a maisupadi a rebbengen ti doktor a mangipaay iti kasapulan a medikal a pannakaagas.

“Ngarud, dagiti naidarum . . . saanda a mapabasol a linabsingda ti aniaman a legal wenno propesional a rebbengenda no pinadayawanda ti kalintegan ni Bessie Randolph a nagkedked iti medikal a pannakaagas, iti espisipiko ti saan a pannakaiyalison iti dara.”

Apay, ngarud, a ti hurado inkeddengna ti panangipaayna ti gunggona?

Nagsurat ni Judge Bambrick: “No koma [ti doktor] sinurotna ti pammilin ni Mrs. Randolph a naan-anay, babaen iti saanna a panangipaay iti aniaman a panangyalison iti dara, saan koma a mapabasol iti saanna a panangyalison kenkuana, uray pay no ti kasta a saanna a panangyalison ti mabalin a makagapu iti ipapatayna. . . Dagiti kinapudno iti daytoy a kaso, nupay kasta, a ta idi 12:45 t.r. idi Hulio 17, 1975 [isu] nangipaay iti panangyalison iti dara ken Bessie Randolph ket dagiti nagbanagan daytoy a pannakibiang ti nagbalin a parikut iti hurado.”

Bayat iti pannakabista, ti hurado dinengngegna dagiti eksperto a pammaneknek maipapan iti kasasaad ken pamay-an iti panangagas a naipaay, idi a rinugian ti doktor ti nangyalison a maibusor iti pagayatan ti pasiente. Gapuna ti nairaman isu ti di umiso a panangagas. Insalaysay ti hues: “Ti interamente a hurado nasarakanna a dagiti naidarum ti nagbalin a . . . naliway iti panangagasda ken Bessie Randolph; ket ti kasta a kinaliway isu ti makagapu iti ipapatayna. . . . Ngarud, ti Korte nagkonklusion a ti interamente a pangngeddeng ti hurado a pabor iti nagdarum [ni Mr. Randolph] maipapan iti pammabasol ket saan a maibusor iti kaadu dagiti pammaneknek ken ti kinaumiso ti linteg.”

Dagiti naidarum nagapelarda iti pangngeddeng. Mabalin nga urayentayo ti pangngeddeng ti korte ti panagapelar. Ngem, aniaman ti pagbanaganto ti panagapelar, ti kapanunotan ni Judge Bambrick ti napateg nga asikasuentayo. Inlawlawagna ti napasamak, ket impakitana a ti di umiso a panangipablaak ti pagiwarnak ti nainkalintegan a nangapektar iti medikal a kapanunotan, iti kasta nakibiang kadagiti kalintegan dagiti awan basolna a pasiente.

Ti Kaso ni Doreen Shorter​—Naiwa, Nasugatan a Matris

Iti ballasiw ti kontinente, ti sabali a kaso ti inkeddeng ti Korte Suprema iti Estado ti Washington idi Enero 11, 1985.² Dayta, met, ramanenna ti di umiso a panangagas. Ngem iti daytoy a tiempo dagiti damdamag iti pagiwarnak umisoda ken positibo. Insentroda ti mannakittulong a kasasaad nga innala dagiti Saksi ni Jehova tapno wayawayaanda dagiti kamkameng medikal iti pannakaseknan maipapan iti mabalin a pannakabasol. Dagiti Saksi nangpirmada kadagiti legal a dokumento a mangibagbaga a saanda a pabasolen wenno pagbayaden dagiti dadduma iti mabalin a pagbanagan iti saanda a panangawat iti dara. Uray pay no saankayo a maysa a Saksi, ti kaso ni Doreen Shorter adda pakainaiganna kadagiti medikal a kalinteganyo.

Ni Doreen ken Elmer Shorter nangpirmada iti kasta a panangwayawaya manipud pannakabasol idi ti babai naawat iti maysa nga ospital. Daytoy a Kristiano nga agassawa naammuanda a ti sikog iti aanakan ni Doreen ti natayen ngem saan a rimmuar. Ti kapanunotan ti Korte Suprema ti Estado ipadamagna a ti mangngagasna, ni Dr. Drury insingasingna ti pannakadalus ti matris babaen iti “dilation and curettage” (D & C), a dayta ramanenna ti naannad a panangkarus kadagiti diding ti matris.

Inlawlawag ti Korte: “Ti operasion saan a nasayaat ti pannakaaramidna. Idi ngangngani maysa nga oras kalpasan ti pannakaopera, nangrugin a nagpadara iti uneg ni Mrs. Shorter ket naawananen iti puot. Dagiti panagsirarak iti panagopera iti emerhensia nga inaramid dagiti dadduma a siruhano ipalgakna a ni Dr. Drury ti nakaro ti panangiwana iti matris ni Mrs. Shorter.” Isut’ nagpadara agingga a natay.

“Ni Mr. Shorter kalpasanna indarumna daytoy di umiso a makapapatay a tignay a kunaenna a ti panagliway ni Dr. Drury isu ti makagapu iti ipapatay ni Mrs. Shorter . . . Ti hurado nasarakanna ni Dr. Drury a nagliway ket dayta a kinaliwayna isu ‘ti makagapu iti nakatayan ni Doreen Shorter’. Dagiti daños naammuan a $412,000.” Nupay kasta, ti hurado kunaenna a ti takder dagiti Shorter maysa met a makagapu iti nagbanaganna, gapuna ti babayadan nabaliwan iti $103,000.

Maysa a napateg nga isyu isu ti kinaumiso ti dokumento a mangwayawaya iti pammabasol gapu iti saan a panangusar iti dara, kas ti pinirmaan dagiti Shorter. Mainugot kadi para kadagiti Saksi ni Jehova ti panangpirma kadagiti kakasta a dokumento?b Dagitoy kadi salaknibanna dagiti dodoktor ken dagiti ospital a nairaman? Kasta met, dagiti kadi kakasta a dokumento ti mangwayawaya kadagiti medikal a kamkameng manipud iti amin a pammabasol, agraman ti panagliway (di umiso a panangagas) bayat ti panangopera?

Ti Korte Suprema iti Estado kinunana: “No addaanka iti maysa a partikular a parikut a sanguen no ti maysa a pasiente gapu iti relihiuso a rason agkedked a mangipalubos no kasapulan wenno makalikaguman ti panangyalison iti dara, patienmi a ti panangusar iti panangwayawaya a napirmaan ket mainugot ditoy. . . . Ti pamusposan dagiti mangngagas wenno dagiti ospital nga agkedked a mangagas kadagiti Saksi ni Jehova ket saan a maawat iti maysa a sosiedad isu a mangikagumaan a mangipaay iti medikal a panangagas kadagiti amin a miembrona.

“Patienmi a ti pamay-an a nausar ditoy, ti boluntario a panangpirma ti maysa a dokumento a mangsalaknib iti mangngagas ken ti ospital ken ti pasiente ket maysa a mainugot a pamusposan ket saan a maikontra iti pagimbagan ti publiko.”

Mabalin a panunotenyo, nupay kasta, ‘Ania ngay no ti siruhano nakabasol iti panagliway bayat ti panangopera? Isu kadi ti mapabasol pay laeng iti di umiso a panangagas?’

Paliiwenyo ti kinuna ti Korte: “Nupay no ni Mrs. Shorter inawatna dagiti pagbanagan a maigapu iti panagkedkedna nga umawat iti panangyalison iti dara, saanna nga inawat ti pagbanagan ti panagliway ni Dr. Drury a dayta, ti nasarakan ti hurado, a makagapu iti ipapatay ni Mrs. Shorter.”

Mainugot a maammuanyo nga uppat kadagiti siam a miembro iti Korte Suprema iti Estado patienda a ti naibayad saan koma a napababa iti sidong ti panagrason a “nagramanan a peggad.” Nagsuratda: “Ti porma ti panagkedked a napirmaan dagiti Shorters iparangarangda ti panangipalubosda a mangwayawaya ken ni Dr. Drury iti rebbengenna a mangipaay iti dara no kasapulan iti saan a naliway a panangaramid iti panangagas. . . . No ni Dr. Drury inaramidna ti operasion nga awanan panagliway, ngem kaskasdi a nagpadara agingga a natay ni Mrs. Shorter, ti doktor mabalin a saan a mapabasol iti daytoy a kaso.” Nupay kasta . . .

“Dagiti peggad iti panangaramid iti D ken C ti pulos a saan a naan-anay a nailawlawag kadagiti Shorters; saanda a napakaammuan nga adda tallo a pamay-an a panangaramid iti daytoy a magun-odan, ket saan met a naibaga kadakuada a ti pamay-an nga implano ni Dr. Drury bga usaren isu ti pamay-an a mabalin nga ad-adda nga agbanag iti pannakasugat ti matris ken ti nakaro a panagpadara.” Gapuna dagitoy nga uk-ukom kunaenda: “Ti kinaliway ni Dr. Drury ti ad-adda a nangpakaro iti panagpadara ni Mrs. Shorter agingga a natay; gapuna, ti ‘kadakkel’ iti peggad ad-adda a kimmaro.” Dagitoy nga uk-ukom mariknada a ti intero a $412,000 ti masapul a maisubli.

Dagiti mangngagas ken autoridad iti ospital makitada a manipud kadagiti kaso ni Randolph ken Shorter dagiti korte bigbigenda a ti panangagas kadagiti Saksi ni Jehova babaen iti panangusar kadagiti dokumento a mangwayawaya iti pammabasol ket “mainugot.” Ti kasta nga addaan dokumento a panagkedked nga umawat iti dara nga inaramid ti maysa a nataengan ti mabalin a mapadayawan uray pay no nairaman dagiti annak a menor de edad ken dagiti kakabagian a saan a Saksi. Ngem kas iti kapanunotan a kinuna dagiti Shorter: “Ti kasta a panangwayawaya dina, nupay kasta, salakniban manipud pannakabasol dagidiay nga agliway iti panangagasda iti pasienteda.” Dayta ket nainkalintegan agpadpada iti doktor ken iti pasiente.

Kadagiti kaso ni Randolph ken Shorter, simmaruno ti ipapatay gapu iti di umiso a panangagas. Ngem iti nabibiit pay a kaso ti nagbanagan ti ad-adda a naragsak.

Ti Kaso ni Jackson​—Nasayaat ti Ina ken Anak a Babai

Ni Ernestine Jackson ket agarup a 26 a lawlawas a masikogen idi a nangrugi a nagpasikal idi Pebrero 1984. Ti kamkameng idiay Mercy Hospital iti Baltimore, Maryland, nasarakanda a gapu iti napalabas a pannakaopera ken ti posision ti sikog adda peggad ti bumtak a matris. Inrekomendarda ti panagpasngay babaen iti cesarean. Ni Mr. ken Mrs. Jackson impalubosda, ngem dinawatda a saan a maipaay ti dara. Inawatda ti Nakristianuan a pammati dagiti Saksi ni Jehova, isu a pakiad-adalanda iti Biblia.

Ti kamkameng ti Katoliko nga ospital ti nangibalakad nga adda ti agingga iti 50-porsiento a gundaway a ni Mrs. Jackson mabalin a masapulnanto ti panangyalison iti dara. Idi a nga isut’ “nabtiker a nagkedked a makikompromiso,” ti ospital dinawatna ken Circuit Court Judge Greenfeld a mangtuding iti maysa nga autorisado a mangipalubos iti panangyalison iti dara. Kalpasan ti pannakabista iti sibay ti kama, ni Judge Greenfeld dina pinalubosan ti dawat ti ospital.

‘Gapuna aniat’ napasamak?’ mabalin a panunotenyo. Bueno, gaput’ awan pammalubos a mangusar iti dara, dagiti dodoktor inaramidda ti cesarean. Awan ti dara a kasapulan wenno nausar. Agpadpada ti ina ken ti anakna a babai nagbiagda let kalpasanna nagawiddan. Dagitoy sibibiagda pay laeng ken nasalun-at.

Dayta mabalin nga ipatingganan ti banag. Ngem saan. Ti ospital nagapelar, a maibatay iti saludsod: “Ti kadi . . . (circuit) court nagbiddut iti panagkunana a ti maysa a mapagtalkan, masikog a nataengan addaan iti kangrunaan a kalintegan nga agkedked a mangipalubos iti panangyalison iti dara a maibatay iti relihiuso a pammatina kadagiti kasasaad a naiparang?”

Ti Court of Special Appeals iti Maryland³ inaminna a ti isyu ket saanen a naganat gapu ta ni Mrs. Jackson ken ti anakna nalasatanda ti operasion nga awan a pulos ti nausar a dara. Ngem ti korte inkeddengna ti panangusig iti panagapelar, agsipud ta dadduma a kaso ti mabalin a tumaud.

Ti Korte napaliiwna a ti Mercy Hospital inrasonda a dayta ti imatmatonan ti maysa nga orden a Katoliko ket dayta ti “naidedikar a mangisalakan iti biag.” Ngem ti Korte kinunana a ti Mercy Hospital “dina mabalin ti umiso nga agreklamo a ti relihiuso a pammati ni Mrs. Jackson ti naitandudo a maipaay a pagdaksan ti ospital . . . Ti wayawaya iti relihion kaipapananna ti kalintegan a mangitultuloy iti relihiuso a pammati ti maysa a tao nga awan ti pannakibiang manipud iti aniaman a sabali a relihion, kinaawan relihion wenno ti gobierno.”

Ti ngay pagimbagan ti Estado? “Ti Estado ti Maryland . . . nakiraman iti daytoy a panagapelar babaen iti panangipaayna iti naisurat nga ababa a surat kas iti amicus curiae wenno surat ti tao a maawagan a mangipaay iti kapanunotan maipapan kadagiti legal a bambanag, ket nupay maisupadi ti panagrason ti Mercy, intudona nga aniaman a pagimbagan ti Estado iti panangitalimeng iti biag ket saan a naan-anay.” Kasta met, ti Korte napaliiwna a ti linteg ti Maryland “naglaon iti inkapilitan a linteg a ti pangngeddeng ti pasiente maipapan iti kita ti panangagas nga awatenna ti kangrunaan a masurot. Ti linteg impakaammona pay nga, iti kamaudianan a panangusig, ti pasiente ti mangikeddeng no maipaay ti aniaman a panangagas.”

Paliiwenyo ti konklusion ti Korte: “Iti saanna a panangipalubos ti dawat ti Mercy a mangaywan ken Mrs. Jackson, kinuna ni Judge Greenfeld: ‘Daytoy a Korte addaan iti kapanunotan a ti mapagtalkan, masikog a nataengan addaan iti kangrunaan a kalintegan nga agkedked a mangawat iti panangyalison iti dara a maitunos iti relihiuso a pammatina no ti kasta a pangngeddeng ti naaramid nga addaan pannakaammo ken boluntario ket saanna a pagpeggaden ti panagpasngay, panagbiag wenno pannakasuportar ti sikog. Daytoy a konklusion ket maitunos iti kalintegan ti pasiente a mangipaay iti pammalubosna iti medikal a pannakaagas . . . ken ti nainkalintegan a pangngeddeng a di mangawat iti dayta a medikal a pannakaagas.’ Umanamongkami. NAPANEKNEKANEN TI PANGNGEDDENG.”​—Abril 4, 1985.c

Dagitoy a kaskaso ti pudno a napateg. Dagitoy ipaganetgetda a tunggal maysa kadatayo addaan iti kalintegan a mangikeddeng iti medikal a pannakaagas ket ti pangngeddengtayo iparangarangna dagiti kaungan a relihiuso a pammati wenno kapanunotantayo a maitunos iti nasayaat a kababalin. Dagiti dodoktor ken ospital makitada pay a mabalin a sitatalged a mangipaayda iti awan-panangidumdumana a medikal a pannakaagas a tarigagayanda para kadagiti isuamin. Bayat ti panangaramidda iti kasta masarakandanto a dagiti Saksi ni Jehova mannakitinnulongda, manangapresiar a pasiente a ti nabileg a pagayatanda nga agbiag ti mangnayon iti nasken a paset iti panagimbagda.

[Reperensia]

1. Randolph v. City of New York, N.Y.L.J., Okt. 12, 1984, idiay 6, col. 4 (N.Y. Sup. Ct. Okt. 1, 1984)

2. Shorter v. Drury, 103 Wash. 2d 645, 695 P.2d 116 (1985)

3. Mercy Hospital, Inc v. Jackson, 62 Md. App. 409, 489 A.2d 1130 (Md Ct. Spec. App. 1985)

4. St. Mary’s Hospital v. Ramsey, 465 So. 2d 666 (Fla. Dist. Ct. App. 1985)

[Dagiti Footnote]