Historiko a Pakabigbigan—Agbalin nga Assembly Hall dagiti Saksi ni Jehova
IDI naluktan ti kabbaro nga Stanley Theater idiay Journal Square, Jersey City, idi Marso 24, 1928, daytat’ maysa kadagiti kadadakkelan idiay Estados Unidos. Ti kinapintasna ti nakagun-od iti pammadayaw, nangnangruna ti nakapimpintas nga unegna nga addaan iti parupa nga Italiano. “No nakapagbiahekayon idiay Italia, . . . a sadiay dagiti napipintas a villas ken napnuan kolor a korte ti mangipalagip kadatayo iti naarte a dayag iti Roma,” kuna ti maysa nga immuna a reporter, “ngarud mabalin nga addaankayo iti pangripiripan iti uneg daytoy a kabbaro nga Stanley Theater.”
Kalpasan ti adu a tawtawen a panangipabuya iti sine ken dagiti pudno a tattao a managpabuya, ti nakapimpintas nga Stanley bimmaba ti kasasaadna. Dagiti plano a mangretubar iti dayta a pagbalinen a lima a babassit a teatro, uray pay ti panangrebba iti dayta ken mangbangon iti maysa a patakder a pagopisinaan iti lugarna, ti saan a pulos a naibanag. Kalpasanna, idi Mayo 12, 1981, ti Stanley Theater nakagun-od iti kabbaro a kasasaad: Dayta ti naikabil iti New Jersey Register of Historic Places.
Iti dayta a tiempo, nupay kasta, ti Stanley ti saanen a maus-usar ket kasapulanna unay ti pannakatarimaan. Dadduma a paset ti makimbaba nga intablado ti nalayus iti dua a pie (60 cm) a danum. Ti dati a gambang ken suer kadagiti ruangan ken tawtawa ti naabbonganen kadagiti natuontuon a pintura ken rugit. Ti nakapimpintas nga Italiano a parupana nalitemdan babaen iti 50 a tawtawen a pannakaisarang iti nikotina ken tapuk. Namantsaan dagiti tugtugaw, narba, ken napispisang. Ti dadakkel a chandeliers napukawdan ti panagrimatda iti sidong dagiti adu unay nga iro. Idi 1982 ti Stanley mailaklakon. Gaput’ pannakabigbigda a ti pasilidad isu ti kasapulanda a maipaay iti panangaramid iti asemblea sirkitoda, dagiti Saksi ni Jehova ti nanggatang iti dayta idi Nobiembre 1983.
Napataud ti riribuk. Dagiti opisiales iti siudad nagrasonda a ti Stanley ket saan a mabalin nga usaren a maipaay kadagiti narelihiusuan a panggep. Impalubosda, nupay kasta, ti panangtarimaan dagiti Saksi iti atep ken ti boiler. Ngem idi a dagiti Saksi tarigagayanda a sukatan dagiti daan a kubita, barot ti koriente, ken dagiti tubtubo, ti permiso a maipaay iti daytoy a trabaho saan a naipalubos. Ti kaso nakagteng iti pederal a korte idi Setiembre 1984. Inkalintegan dagiti Saksi a ti pudno a makagapu iti suppiat a ta ti mayor iti siudad dina kayat dagiti Saksi ni Jehova idiay Journal Square. Isut’ addaan kadagiti sabali a panggep a maipaay iti sanikua. Ti mayor ken dagiti dadduma pay naidarumda iti pannakibiang iti kalintegan dagiti Saksi iti konstitusion.
Ti naannad a panagrason ni Judge Debevoise kunaenna a ti pannakatarimaan ti barot ti koriente ken tubtubo ti masapul a maaramid ket ti panggep ti Stanley ti “nalawag a maitunos iti naipalubos a pakausaranna a pasilio a pagkumbensionan.” Iti pannakagtengna iti kangrunaan nga isyu iti kaso, isut’ nagsurat: “Mairaman kadagiti sibil a kalintegan a maibilang a nasantuan nga impaay ti Konstitusion ti Estados Unidos isu ti kalintegan a saan a maaddaan kadagiti linlinteg a mangiparit iti wayawaya a panangannurot iti relihion wenno manglapped iti wayawaya nga agsao. . . . Ditoy dagiti nagdarum [dagiti Saksi] sapulenda ti panangannurotda, panangisuro ken panangiwaragawag kadagiti narelihiusuan a pammatida babaen ti panangusarda iti maysa a pasilidad nga ibilangda a maibagay a naimbag iti dayta a panggep.”
Innayon pay ni Judge Debevoise a no ti siudad nagapelar iti kaso, “dagiti nagdarum ti mabalin a mangipasdek iti kamaudianan a bista a ti panangipatarus ken panangiyaplikar ti Jersey City kadagiti Ordinansana iti Zona ti saan a maitunos iti konstitusion ket makibiang iti relihiuso a wayawaya ken pagimbagan dagiti nagdarum.” Kalpasan dayta, dagiti opisiales iti siudad insardengdan ti panangbusorda.
Ti sumaganad a karit nga adda iti sanguanan dagiti Saksi: panangileppas iti panangretubar iti Stanley a maipaay iti dedikasion idi Setiembre 7, 1985, ken ti graduasion dagiti misionero iti maika-79 a klase iti Watchtower Bible School of Gilead iti sumaganad nga aldaw. Gapuna gaput’ siam a bulan laengen ti panangibanag iti daytoy a nagdakkelan a trabaho, dayta ti “nakaparpartak a maaramid.”
Rinibribo a boluntario a trabahador ti napan idiay Stanley ket kasta unay ti panagtrabahoda. Dagiti nalalaing a tattao intukonda dagiti serbisioda a maipaay iti nasigo a panagpinta, panangsukat kadagiti tubtubo, panagmasilya, panagkarpentero, ken ti elektrikal a trabaho. Gapuna dagiti nakaad-adu a bambanag a masapul a maaramid ti naasikaso a naimbag ta di ipalubos ti espasio ti panangsaklawtayo kadagiti amin a trabaho nga inaramid dagitoy a boluntario, a nangipaay kadagiti adu nga al-aldaw ken rabii ti lawlawas ken bulbulan. Ti naipakuyog a ladladawan ti mangipaay iti pangripiripan iti kasta unay a trabaho a panangbalbaliw a napasamak.
Ti sumaganad a programa ti naiyurnos: Agosto 17 ken 18, 1985: maysa nga asamblea sirkito dagiti Saksi ni Jehova. Agosto 30 ken 31: panangbisita dagiti bisita manipud kadagiti adda iti aglikmut a komunidad. Setiembre 7: dedikasion daytoy 4,300-tugawna a teatro kas ti Assembly Hall dagiti Saksi ni Jehova. Setiembre 8: graduasion ti maika-79 a klase iti Watchtower Bible School of Gilead.
Ti Jersey City mabalinnan a pagtangsit ti maysa kadagiti kapipintasan a pasilio a pagkumbensionan a masarakan iti sadinoman idiay Estados Unidos. Saan laeng a naisubli ti dati a dayagna no di ket napapintas pay. Ti kangrunaan a pakausaranna itan isu ti pannakausarna a mangidayaw iti Soberano nga Apo ken Namarsua iti uniberso, ni Jehova a Dios.
[Kahon iti panid 18]
Surat Manipud iti Managbasa iti The Jersey Journal
“Ti bilang dagiti Saksi ni Jehova iti Jersey City ket nasurok a 4,000. Dagitoy nareregtada, mannakitinnulong a naimbag, managpannuray iti bagida met laeng. Dagitoy boluntarioda amin a maipaay iti panggep a naan-anay a patienda. . . .
“Bayat ti panangbuybuyak iti panagibangon a maar-aramid idiay Stanley Theater idiay Jersey City, nakitak ti determinasion a di magatadan gapu kadagiti naisangsangayan a pagalagadanda.
“Ti Stanley Theater agbalinto a monumento iti kinapasnek a nagtaud iti kinatibker a naigamer iti masansan a pannakabusor. Ti teatro napno iti manangipateg a rikna a mammano a tumaud iti daytoy a panawen ti panagduadua, materialismo ken panagsuspetsa.
“Ti Assembly Hall dagiti Saksi ni Jehova iti Stanley Theater idiay Jersey City ti di bumurong a naikari nga agbalin a maysa a pakabigbigan. Dayta agbalin koma a dayaw iti komunidad.
“Dagitoy dagiti relihiuso a mannakidangadang iti umuna a ranggo ken agsilnag a silaw iti lubong a masansan a makaupay.
“Ti Jersey City pagpannakkelna koma ida; maysa a gameng iti siudad. [C. T. P., Jersey City]”—The Jersey Journal, Hulio 25, 1985, panid 21.
[Dagiti ladawan iti panid 15]
Ladladawan a naala bayat nga umadanin ti pannakaturpos ti panangretubar. Iti kannigid, ti lobby
Iti kanawan, ti kangrunaan nga auditorium kas makita manipud balcony
[Dagiti ladawan iti panid 16]
Dagiti ladladawan iti eksena ti Biblia, nga impinta dagiti miembro iti kameng ti hedkuarter ti Watchtower, ti nangsukat kadagiti ladladawan a nangiparangarang iti mitolohia
Iti ngato isu ti eksena ti isasagpat ni Jehonadab iti karwahe ni Jehu. Iti kannawan isu dagiti managkabayo iti Apocalipsis kapitulo 6
[Dagiti ladawan iti panid 17]
Dagiti chandeliers, namantsaan a sarming ti tawa, ken molding ti insubli dagiti boluntario a trabahador. Ti 50-pie-kangatona a cherry picker ti nausar a mangisubli iti itsura ken pintura ti bubida