Agimtuod dagiti Agtutubo . . .
Kasano nga Agbalinak a Nasinged iti Dios?
‘TAOAK, dibino ti Dios. Agpatinggaak, ti Dios agnanayon. Lasagak, ti Dios espiritu. Ngarud, kasano a mainaigak iti Dios?’ Kasta ti im-imtuoden dagiti adu nga agtutubo maipapan iti Dios ita. ‘No dadduma pampanunotek,’ kuna ti dadduma nga agtutubo, ‘no tarigagayan ti Dios a makisaritaak Kenkuana wenno no Isu kayatna nga agwaywayasak.’ Kaskasdi dadduma ti agreklamo, ‘No agkararagak, diak makangngeg iti aniaman a timtimek a mangibagbaga kaniak no kasanok a tamingen dagiti parikutko.’
Nupay kasta, saan nga amin nga agtutubo ti makarikna iti kastoy. Kuna ni George Gallup, Jr., iti publikasionna a Religion in America 1984: “Agparang a dagiti tin-edyer ad-adda a mariknada ti nasinged a pannakirelasion iti Dios.” Ngem nupay no 95 porsiento kadagiti napagsaludsodan a tin-edyer ti agkuna a mamatida iti Dios wenno iti sapasap nga espiritu, no daytoy laeng dina kayat a sawen nga addaanda iti pannakirelasion kenkuana.
Ti panagbalin a nasinged iti Dios ramanenna saan laeng a ti panamati kenkuana. Dayta kaipapananna ti panagtignay a maitunos iti pammati, a dayta ramanenna ti pannakigayyem iti Dios. Gapuna, ti Biblia saritaenna ti matalek a ni Abraham a naawagan “gayyem ni Jehova.” Pudno, ti panangpataud iti aniaman a pannakirelasion ket trabaho. Ngem ti kadi pannakigayyem iti Dios maikari iti panagbannog?—Santiago 2:23.
No Apay a Napateg
“Ta kenkuana agbiagtayo ken aggunaytayo ket mataginayon ti kinataotayo,” kuna ni apostol Pablo. (Aramid 17:28) Mayatkayo man wenno madikayo, ti biagyo agpannuray iti Dios. Ti angin nga angsenyo, ti taraon a kanenyo, ti danum nga inumenyo—dagitoy ti sumagmamano laeng kadagiti probisionna. Saantay kadi a siuutang kenkuana? Daytoy laeng ket maysan a gapu ti panagtarigagaytayo nga agbalin a nasinged iti Dios. (Genesis 1:27, 28; Salmo 104:14) Ngem, adda pay dadduma a rason iti panagtarigagaytayo a mangaramid iti kasta.
“Saan nga agtaud iti tao a magna ti panangiturong kadagiti addangna,” kuna ti Biblia. Saan a di mabalin a padasen ti tao, no di ket no awan ti panangiturong ti Dios isut’ basta saan a nakabalan a mangaramid iti dayta. (Jeremias 10:23; Proverbio 12:15) Dagiti gubgubat, krimen, kinaranggas, polusion, ken dadduma pay a gagangay a kasasaad ita napaneknekandan a pudno daytoy. Wen, ti saan a panagbalin a nasinged iti Dios ti nangdangran iti kasta unay iti sangatauan. Ngem dakayo ngay kas indibidual?
Ti panagbalin a gayyem ti Dios makatulongto kadakayo iti panagballigi kadagiti personal a parparikut. Ti tao addaan “iti nakaab-ababa a panagbiag ket napnuan iti riribuk,” kuna ti Biblia. (Job 14:1, The Bible in Living English) Ngem, gapu iti panangiturongna babaen iti Saona, ti Dios maiturongnakayo kadagiti daldalan a maipaay iti agnanayon a pagimbaganyo. “Agtalekka ken ni Jehova iti amin a pusom ket dika agtalged iti pannakaawatmo met laeng,” iparegta ti Biblia. “Kadagiti amin a dalanmi isu ti bigbigem, ket isu iturongnanto dagiti desdesmo.”—Proverbio 3:5, 6; Salmo 16:11.
Interesado met ti Dios iti masanguanan a pagimbaganyo. Ti karina a biag nga agnanayon ditoy daga—iti natalna ken nalinteg a kasasaad—kadagidiay a sipapasnek nga agsapul kenkuana pagbalinenna ti panagbalin a nasinged iti Dios nga ad-adda pay a napateg. (Juan 17:3; Salmo 37:9-11, 29; Apocalipsis 21:3, 4) Kasano, ngarud, a mangrugikayo nga agbalin a nasinged kenkuana?
Am-ammuenyo ti Dios
Sakbay ti panangpili iti maysa nga agbalin a gayyemyo, umuna pay nga am-ammuenyo. Basta pilienyo kadi daytoy a gayyem a dikayon panunoten—uray dikay ammo ti naganna, ti personalidadna, dagiti pagayatanna, ken uray pay dagiti nauneg a kapanunotanna ken emosionna? Nalabit a saan. Kasta met, tapno agbalin a nasinged iti Dios masapul nga umuna nga ammuenyo ti maipapan kenkuana. (Juan 17:3) Mangrugikayo babaen iti panagadal iti Biblia. Daytoy ti mangtulong kadakayo a mangam-ammo iti Dios kas maysa a persona. Masursuroyo ti agpanunot ken no ania ti kalikagumanna kadakayo.
Uray pay no ti Biblia naisurat iti pagsasao a nakalaklaka a maawatan ken nalawag, nasken ti disiplina iti panagadal. Daksanggasat, kadagiti adu a tattao, ti Biblia agtalinaed pay laeng a saan a mabasbasa, ganggannaet a dokumento. Sigun iti maysa a Gallup Youth Survey, “ti laeng agarup maysa a tin-edyer kadagiti walo (12%) ti mangbasa nga inaldaw iti Biblia, ket 30% ti saan a pulos a mangukag iti libro wenno dida malagip no kaano ti naudi a panangukagda iti dayta.” Makapainteres, 52 porsiento ti agkuna nga agbasada iti pagiwarnak iti inaldaw. Ngem “ti panangammo no ania ti pagayatan ni Jehova,” ti panangbasa iti Saona a kankanayon ket kasapulan.—Efeso 5:17; Josue 1:8.
Nupay kasta, ti panagbalin a nasinged iti Dios saan laeng a maysa a banag a pananggun-od kadagiti kinapudno maipapan kenkuana. Kas iti aniaman a pannakirelasion ita, nasken ti dadduma a porma ti komunikasion. Ken Jehova a Dios, dayta isu ti kararag.
Makisarita
Kadagiti dadduma nga agtutubo, ti pannakisarita iti Dios babaen iti kararag ti kasla nakarigrigat, nakaskasdaaw wenno saan a napudno. Nupay kasta, kas napaliiw ti 17-años a ni Laverne, “narigat a kunaen a pudno nga addaanka iti personal a pannakirelasion iti siasinoman no dika makisarsarita kenkuana.” Pudno, ti pannakaammo napateg. Ngem kasano man ti kaadu ti pannakaammom maipapan iti Dios, no awan ti kanayon a panagkararag kenkuana, ti panangikagumaanmo ti mabalin nga awan ti mamaayna.
Ni Lynda napadakkel iti maysa a Kristiano a pamilia. Nupay kasta, no pampanunotenna ti tawtawen ti kinatin-edyerna, malagipna, “Kadagidiay amin a tawtawen, mammano a diak makatabuno iti Nakristianuan a gimong, ket diak pay pulos nalabsan ti maysa a bulan a pannakipaset iti panangasaba, ngem pulos a diak nakapataud iti nasinged a personal a pannakirelasion ken Jehova.” Ngem iti maysa a paset iti panagbiagna, idi kumarkaro dagiti parparikut ken rigatna, ania ti nangtulong kenkuana? “Kankanayon ti panagkarkararagko iti adu nga al-aldaw a maipaay iti sungbat dagiti parparikutko.” Idin nabigbigna a ni Jehova ti mangtulong kenkuana kadagiti parparikutna, ket isut’ nagballigi kadakuada.
Mariknayo kadi iti kas narikna ni Lynda, nga ar-aramidenyo dagiti naimbag a Nakristianuan a bambanag, ngem kaskasdi a dikay agbalin a nasinged iti Dios? Pinadasyo kadin ti nangikararag kenkuana maipapan iti dayta? Nalawag a kunaen ti Biblia a “ni Jehova siaarpad kadagiti amin nga umawag kenkuana.” (Salmo 145:18) Dayta ti makagapu no apay a ti Biblia paregtaennatayo nga ‘agkararag a kankanayon,’ “managtalinaed iti panagkararag,” ken ‘agkararag iti isuamin a tiempo.’ (Mateo 26:41; Roma 12:12; Efeso 6:18) Nupay daytoy dina kayat a sawen a busbosenyo ti amin a tiempoyo—24 nga oras iti maysa nga aldaw—nga agkarkararag, dayta dina kayat a sawen a masapul nga agkararagkayo a kanayon. Ngem no agkararagkayo, dumdumngeg kadi ti Dios?
Dumngeg no masabetyo dagiti kalikagumanna iti kararag ken no ikararagyo dagiti umiso a bambanag. Inusar ni Jesu-Kristo ti modelo a kararag kas padron. (Lucas 11:1-4) Ni adalan a Santiago, nupay kasta, imbagana kadagiti dadduma a Kristiano idi kaaldawanna: “Agdawatkayo, ket dikay umawat, ta saan a nasayaat ti panggepyo nga agdawat.” (Santiago 4:3) Gapuna no dagiti karkararagyo inaagum wenno dikay ikankano ti pagayatan ti Dios, dikayto namnamaen a denggen ti Dios ida.
Nupay kasta, ti basta pannakisarita iti Dios saan laeng a basta panagkararag. Ti kararagyo masapul a napasnek, addaan talek, panagraem, ken ti panagpannuray iti Dios. Ibukbokyo ti adda iti pusoyo kenkuana a kas ti aramidenyo iti mannakaawat nga ama. Wen, “kadagiti isuamin maipakaammo koma dagiti dawdawatyo iti Dios gapu iti kararag.” (Filipos 4:6) Kaskasdi, saan laeng a pannakaammo ken kararag ti kasapulan tapno agbalin a nasinged iti Dios. Masapul ti panangikagumaan a mangitunos iti biagyo kadagiti prinsipio iti Biblia.
Sipapasnek nga Ipaayyo ti Bagiyo
Dagiti lallaki, babbai, ken agtutubo mangbusbosda iti adu a tiempo, kasta unay a panagbannog, ken uray pay panagibtur tapno magun-odanda dagiti personal a kalatda. Kas pangarigan, iti nagbaetan ti edad a 9 ken 19, ti bituen iti skating iti Olimpiada a ni Peggy Fleming ti nangbusbos iti nasurok a 20,000 nga or-oras—ti promedio nga agarup lima nga oras iti inaldaw—a mangsanay iti bagina a maipaay iti Olimpiada. Ania ti kalatna? Maysa a balitok a medalia iti Olimpiada. Saan kadi a ti panagtrabaho nga agbalin a nasinged iti Dios kasapulanna ti adu a panagbannog?
Ti Saona ibagana kadatayo ti “pananguksob iti daan a personalidad” ken ti “saan nga iyaabuloy iti daytoy a sistema dagiti bambanag.” (Colosas 3:9;Roma 12:2) Daytoy kasapulanna ti kanayon a panangikagumaan iti biangyo. Ngem dikayto pulos agbalin a nasinged iti Dios no dikay agtignay a mangaramid iti dayta.
Gapuna, tapno agbalinkayo a nasinged iti Dios, masapul ti panangammoyo kenkuana, makisarita kenkuana babaen iti kararag ken sipapasnek nga ipaayyo ti bagiyo babaen ti panangaramidyo iti pagayatanna. Wen, rugianyo a ‘sapulen ti Dios, bareng no iti panagar-arikapyo masarakanyo, uray pay no adda iti saan nga adayo iti tunggal maysa kadatayo.’—Aramid 17:27.
[Blurb iti panid 16]
Ti panagbalin a nasinged iti Dios ramanenna saan laeng a ti basta panamati kenkuana
[Blurb iti panid 17]
Dikayto pulos agbalin a nasinged iti Dios no dikay agtignay a mangaramid iti dayta
[Ladawan iti panid 16]
Adu ti mangipaay iti adu a panagbannog a manggun-od iti kalatda. Basbassit kadi a panagbannog ti kasapulan tapno agbalin a nasinged iti Dios?