Panagballigi iti Panangpasuso iti Anakyo!

NAAN-ANAY a naupay​—dayta ti rikna dagiti dadduma nga inna iti panangikagumaanda a mangpasuso kadagiti annakda iti umuna a sumagmamano nga al-aldaw ken lawlawas kalpasan ti panagpasngayda. Nupay kasta, nasarakak a babaen iti bassit a pannakaammo ken ti panagibtur, ti panagpasuso agpadpada a naballigi ken makaparagsak. Palubosandak, ngarud, a mangiraman ti naammuak babaen iti panagbasa, pannakisarita kadagiti dadduma nga inna, ken personal a kapadasan.

“Kaano ti panangrugik a mangpasuso iti anakko?”

Iti kabiitan a tiempo kalpasan ti panagpasngay. Kadagiti kaaduan a kaso mabalinyo ti mangrugi idiay nagpasngayanyo a lamisaan a mismo. Mabalinyo a dawaten iti doktoryo no maiyurnos daytoy. Maysa kadagiti pagimbagan iti gagangay a panagpasngay, kayatna a sawen, awan ti mausar nga ag-agas, a ta ti ubing maipasngay nga ad-adda nga alerto ket dagus a sumuso.

“Nakiddit ti gatasko!”

Kasta ti kunaen dagiti dadduma a kabbaro nga inna. Pudno, no dadduma ti kabbaro nga ina madanagan iti kaadda ti gatas gapuna a saan a tumbog. Mapasamak daytoy ta dagiti piskel a mangtengtengngel iti pagayusan ti gatas umirtengda, a manglapped iti nawaya a panagayus ti gatas. Gapuna masapul a nainanaankayo. Laglagipenyo, met, a ti itataud ti gatasyo matignay iti panangpasusuyo iti anakyo. No ad-adda nga agpasusukayo, ad-adu met ti mapataud a gatas. Gapuna taraonanyo ti anakyo iti sumagmamano a babassit a panagpasuso imbes a dua a mabayag a panagpasuso. Iti tallo wenno uppat nga aldaw, ti panagpataudyo ti gatas umadu. Ta, uray pay dagiti appo a babbaket napasusoda dagiti appoda no tiempo ti emerhensia! Ken uray pay dagiti agtagibi nga inna makapasusoda babaen ti panangipalubosda iti anakda a sumuso.

“Kayat ti anakko ti mangan iti tunggal dua nga oras!”

Sabali manen a reklamo ti kabbaro nga inna. Maamakda a ti maladagada di mapnek iti gatasda. Ngem naan-anay a gagangayen para iti kappasngay a sumuso iti tunggal dua nga oras. Dadduma a maladaga ti sumuso iti agingga iti sangapulo a daras iti 24 oras! Inton ti ubing dua wenno tallo a bulannan, mabalin a nairuamton iti mamitlo wenno mamimpat a panagpasuso.

“Ania ti aramidek en kaso adda impeksion ti susok?”

Dikay sardengan a pasusuen ti anakyo. Imbes ketdi, iti mamindua a daras kas iti gagangay iti naimpeksion a suso tapno maikkat ti gatas ti suso. Ti impeksion, makitayo ket iti pagayusan ti gatas a saan a ti gatas a mismo. Ti doktoryo ti mabalin a mangiresita iti saan a napigsa nga antibiotiko ket irekomendarna ti panangdengngepyo ken ti panaginanayo. Personal a nagtomarak iti 1,000 miligramo a bitamina C iti tunggal dua wenno tallo nga oras idi damo a nadlawko ti impeksion, ket iti maikadua nga aldaw daytat’ napukawen.

“No ngay maibusanak ti gatas?”

Imposible. Ti suso ket maysa a paktoria nga agtrabaho iti uneg ti 24 oras iti maysa nga aldaw. Ti panagpataud mapabannayat, nupay kasta, gapu iti panagaburido, gurigor, wenno emosion. Ti remedio isu ti inana, saan a panunoten dagiti parikut, ken ipamaysa ti panangywanyo iti anakyo. Agpasuso a masansan agingga nga adu manen ti gatasyo.

“Adda kadi maaramidan ti asawak tapno makatulong?”

Ti kadadakkelan a maaramidan ti asawa isu ti ayatna ken moral a panangsuportar. Masapul a laglagipenna a ti panaganak ket pakakigtotan ti bagi. Alaenna ti sumagmamano a tiempo tapno maimbagan iti dayta. Gapuna masapul nga ipalagipna kenkuana a ti inanana ken ti pagimbagan ti ubing ti napatpateg ngem ti nakadaldalimanek a balay. Mabalin met a makatulong iti panaggatang ken panagugas ti pinggan iti kabayatanna.

Kasano kapaut ti panangpasusok?

Dayta agpannuray kadakayo ken iti bagiyo. Ti gatas ti ina ket kompleto a taraon, ket ti ubing dina kasapulan ti aniaman agingga iti agngudo iti lima a bulan. Ti personal a kalatko a panangpasuso kadagiti annakko ket makatawen. Ni Sara, nupay kasta, inurayna agingga a ni Isaac ket lima a tawen tapno ipusingna!​—Genesis 21:7, 8.

Ti panagpasuso mangipaay iti nakaskasdaaw a gundaway iti babai a maam-ammona ti anakna ken maiyebkas ti ayatna iti dayta. Laglagipenyo, a di agbayag dayta saanton a maladaga. Gapuna gundawayanyo dagidiay a napapateg a bulbulan no bassit pay ti anakyo.​—Naipatulod.