Ti Astrolohia, Panagkasangay, ken ti Biblia

Sigun kadagiti autor a da Ralph ken Adelin Linton, adda pudno a pakainaigan ti astrolohia ken ti panagkasangay. Kunaenda iti libroda a The Lore of Birthdays: “Ti Mesopotamia ken Egipto, dagiti namunganayan iti sibilisasion, isuda met dagiti immuna a dagdaga a malaglagip dagiti tattao ket padayawanda ti panagkasangayda. Ti panangsalimetmet ti rekord ti panagkasangay napateg idi ugma nangnangruna gapu ta ti petsa ti pannakaipasngay ket nasken iti panangipadles iti horoscope.”

Pudno, dagiti Israelitas sinalimetmetanda met ti rekord ti pannakaipasngay. Ngem daytoy naaramid tapno ipasdek ti edad dagiti lallaki a maipaay iti kinapadi, militar, ken dadduma pay a serbisio. (Numeros 1:2, 3; 4:2, 3; 2 Ar-ari 11:21) Ti Biblia, nupay kasta, saanna nga irekord ti petsa ti pannakaipasngay dagiti nalalatak a lallaki a kas da Noe, Abraham, Moises, David​—wenno ni Jesu-Kristo! “Tapno makasiguroda,” aminen dagiti adda iti ngato nga autor, “addada dagiti rambak ti panagkasangay a nadakamat idiay Biblia, ngem narambakan laeng dayta a panglaglagip kadagiti dakes nga erehes a kas ken Paraon ken ni Herodes. Idi dagiti immuna a Kristiano padpadasenda nga ikeddeng ti petsa ti pannakaipasngay ni Kristo, adu nga Amma ti Iglesia ti nangibilang iti dayta a panaglabsing iti sagrado a banag . . . Inwaragawagda nga awan koma ti panangikagumaan a mangrambak iti dayta, ta daytoy awan panagraemna iti Dios a pagano nga ugali.”