Apay nga Agkasar Pay?
NI Jan ken ni Anna nagsabetda iti maysa a klab. Kayatda ti maysa ken maysa a dagus. Nabiit pay a pimmanaw ni Anna iti pagtaengan dagiti dadakkelna ket agsolsolo nga agbibiag. Ni Jan makikabkabbalay iti maysa nga agtutubo a lalaki. Maysa a rabii, di nagbayag kalpasan ti panagsabetda, kinuyog ni Jan ni Anna iti apartmentna. Isut’ nagpatnagen sadiay. Iti sumaganad nga aldaw intugotnan ti guitarana ken sipiliona ket nagpatnag manen sadiay. Nagin-inot inyakarnan dagiti amin nga alikamenna iti apartment ni Anna, ket nangrugin a nagkabbalayda. Ni Jan ken ni Anna dida makita a nasken pay ti panagkasar.
Kas ken ni Jan ken ni Anna, minilion nga agassawa iti amin nga edad ti agkabkabbalay a saan a nagkasar. Kunada: Apay nga agkasar pay? Mabalintay met ti agkabbalay iti nasaysayaat a pamay-an uray awan ti legal a singgalut a papeles—maysa a lisiensia ti kasar.
Kinapudnona, kadagiti adu a luglugar ti panagkabbalay nga awan ti kasar nagbalinen a naan-anay a maawat ken gagangay. Idiay Sweden, kas pangarigan, ti bilang dagiti panagkasar bimmaba iti ngangngani 40 porsiento idi napalabas a duapulo a tawen. Duapulo a tawenen a napalabas, ngangngani maysa iti walo nga ubing iti dayta a pagilian ti maipasngay iti saan a naikasar nga ina. Itan ti bilang ket addan iti nagbaetan iti maysa iti tallo ken maysa iti dua. Kuna ti managsirarak a ni J. Trost iti Uppsala University, Sweden: “Iti pannakammomi daytoy ti kangatuan a bilang dagiti ubbing a naipasngay iti ruar iti panagasawa a naammuan pay laeng iti industrialisado a sosiedad.”
Idiay Denmark, ti panagkabbalay nga awan ti kasar irepresentarna ti pagannurotan a sangngakabbalayan a maipaay kadagiti agtutubo nga edukado iti kolehio nga agassawa, sigun iti International Herald Tribune. Dagiti kakasta a di nagkasar nga agassawa ti nagtaudan iti nasurok ngem maysa iti kada tallo a maipasngay sadiay. “Ngangngani awan ti ammomi a naikasar,” kuna ti maysa a 31-años a Danes a lalaki. “Tunggal maysa ti simrek iti awagantayo iti awanan papeles a panagasawa.”
Ti kasta nga awanan ti papeles a panagasawa umad-adu met kadagiti dadduma a pagilian. Kas pangarigan, sigun iti nabiit pay a bilang nga inruar ti United States Census Bureau, adda dua a milion a saan a nagkasar nga agassawa idiay Estados Unidos nga agkabkabbalay, nasurok a mamitlo a daras ti bilangda ngem idi 1970.
Apay a ti lalaki ken babai masansan a pilienda ti agkabbalay a saan nga agkasar? Ti kadi awanan ti papeles a panagasawa kas ti kasayaat wenno nasaysayaat pay ngem ti legal a panagasawa?
Ti panagkabbalay nga awan ti kasar nagbalinen a naan-anay a maawat kadagiti adu a luglugar, ngem dayta kadi agbanag iti dakdakkel a kinaragsak ngem ti panagkasar? Ti koresponsal ti “Agriingkayo!” idiay Sweden usigenna daytoy a banag kadagiti sumaganad a tallo nga artikulo.