Sao Ti Dios—Ti Kasayaatan a Salaknib!
No adda mangpadas nga agtakaw kadakayo, ania ti aramidenyo? Dagus kadi nga itedyo ti sanikuayo wenno lumabankayo iti panangikagumaanyo a mangsalaknib iti sanikuayo? Iti naranggas a lubong ita, adu a tattao ti mamati a ti panangusar iti puersa a mangsalaknib iti sanikua ti maysa ket nainkalintegan. Ti panangtagikua iti paltog wenno panagsanay iti maysa a porma ti martial arts ti mamatmatan kas salaknib a maibusor iti pannakaraut. Ngem pudno kadi a mangyegda ti kasayaatan a resulta? Masansan, dagiti tattao a nagusar iti armas ti nagbabawi kalpasanna. Maisuppadi iti dayta, nupay kasta, ti masirib nga Ari a ni Salomon kinunana: “Dika kunaen: ‘Ibaleskonto ti dakes!’ Agpannurayka ken ni Jehova, ket isalakannakanto.”—Proverbio 20:22.
Nabiit pay, maysa a kameng ti sangalubongan a hedkuarter dagiti Saksi ni Jehova idiay Brooklyn, Nueva York, ti napan iti pagtaengan dagiti gagayyemna idiay Brooklyn. “Idi makagtengak iti sango ti pasdek, maysa a lalaki a nakakagay iti kagay ti buyot ti nangipaturong ti kutsilio kaniak, a kunkunana: ‘Kayatko ti kuartam! Itedmo amin ti kuartam kaniak!’
“Idi makitana a diak nakigtot iti panangrautna, imbilinna: ‘Sumrekka iti pasdek! Diak kayat nga adda asinoman a makangngeg! Sumrekka!’ Idi nakastrekakon, dinawatna ti pitakak. Nakasarak laeng ti $2.00. Idi suksukimatenna ti dadduma a linaonna, inlawlawagko kenkuana a maysaak a Saksi ni Jehova.
“Babaen iti panagpammarangko a diak nangngeg, impilitna ti panangitedko ti ad-adu a kuarta. Kalpasanna, insuksokna ti awan iggemna nga imana iti bulsa ti pantalonko bayat a ti sabali ti nakaiggem iti kutsilio, nakasarak iti 20-doliar nga imbulsak. Iti pananginanama a makasarak pay ti ad-adu, intuloyna ti nagsukimat, nga imbellengna ti aniaman a masarakanna iti bulsak iti datar. ‘Ania ti pangusaram iti kuarta?’ inimtuodko. ‘Maipaay iti droga?’ ‘Wen,’ kunana. Ket inlawlawagko kalpasanna: ‘Ammom kadi a no saanak a maysa kadagiti Saksi ni Jehova, mabalin a natayka koma a tao? Nagsanayak idi iti karate. Saan la a namnaminsan a dika naannad iti dayta a kutsilio.’
“Idi dinakamatko ti Biblia a manglawlawag iti sasaadek kas maysa a Saksi ni Jehova, kinautna ti makinsango a bulsana ket inruarna ti maysa a bassit a libro ket kinunana, ‘Adtoy, adda Bibliak!’ Daytat’ maysa a bassit a maibulbulsa a Biblia.
“‘Nasayaat a tulong dayta kenka,’ kinunak. ‘Ket dika pay iyap-aplikar ti kunaenna dita.’ Innalak ti Bibliana ket binasak kenkuana ti Mateo 6:33 ken ti Juan 17:3 ket impaganetgetko ti kinapateg ti saan laeng a pananggun-od iti pannakaammo iti Biblia no di ket ti panangiyaplikar iti dayta iti panagbiagna.
“Impudnona a dua a bulan sakbayna isut’ nawayawayaan manipud iti pagbaludan. Gaput’ awanan ti trabaho ken kasapulanna ti kuarta, isut’ nagtaktakaw. Babaen ti panangbasak iti 1 Corinto 6:9, 10, impakitak kenkuana a dagiti mannanakaw didanto tawiden ti Pagarian ti Dios. Innayonko pay: ‘Mabalin a maysa nga aldaw mabalin a makasarakkanto ti nasiksikap ngem sika a makidangadang a maipaay iti kuartana, ket mabalin a mapataymo, wenno mabalin a mapataynaka, wenno mabalin a matiliwka ket agsublika manen iti pagbaludan!’ ‘Dika sawen ti kasta!’ kinunana a sibubuteng. Impalagipko kenkuana a ‘dagidiay nga agbiag babaen iti kampilan mapukawdanto babaen iti kampilan.’—Mateo 26:52.
“Nalawag a natignay babaen iti Kasuratan, isut’ nagpakawan. Idi indumogna ti ulona, nadlawna dagiti imbellengna iti datar idi inruarna ti karga ti bulsak. Kasla karnero a naamo, pinidutna ti isuamin ket inyawatna kaniak, ngem indulinna ti kuarta. Idi agturongen iti ruangan, indawatna no isut’ ikararagak. Inlawlawagko, ‘Ti inaramidmo kaniak dakes, ket kangrunaan ngem amin, nagbasolka ken Jehova. Adda dayta iti nagbaetanyo a dua.’
“Idi pumanawen, adda indawatna. Inyawatna ti dakulapna, kinunana, ‘Mabalin kadi nga ibellengmo daytoy para kaniak? Nalpasen ti panagtaktakawko kadagiti tattao.’ Innalak ti kutsilio ket sinukatak iti magasin nga Agriingkayo!”—Kas insalaysay ni Ricky Hanagami.