“Napilitan a Bannuar”

Ti kukutel ket maysa a nakaam-amak a sakit a mangapektar iti 15 milion a tattao, nangnangruna idiay Africa, India, Burma, Thailand, ken dagiti paspaset iti Sud America. Itan ti siam ti gulisna nga armadillo ti maitantan-ok kas “ti napilitan a bannuar” iti pannakidangadang ti tao a maibusor iti sakit.

Ngem kasano a daytoy bassit nga animal nga agarup dua a pie ti kaatiddogna (61 cm), nga agdagsen iti 15 libra (6.8 kg) ken addaan iti natangken a balay, a pinidaso a kasla tulang, mairaman iti daytoy a pannakidangadang?

Bueno, nasarakan a dagiti laeng an-animal a maakaran iti kukutel ti tao isu dagiti utot ken dagiti armadillo. Gapuna dagiti sientista us-usarenda ti armadillo a mangaramid iti umuma a bakuna a panglaban iti kukutel, ta bassit laeng ti patauden dagiti utot a mabalin nga usaren. Maysa nga agsakit nga armadillo ti mangipaay iti 750 a bakuna. Itan, dagiti naisangsangayan a talon ti naipasdeken idiay Estados Unidos ken Britania a mangtaraken kadagiti naarmasan a mamalia.