Namnama dagiti Natay, Liwliwa dagiti Agladladingit

Jess Romero a nadakamat iti panglukat nga artikulotayo, kamaudiananna nagasawa manen. No maipapan ken ni Agustín ken ni Valentina Caraballoso, ti nabiit pay nga ipapatay ni Jonathan ket makapaladingit pay laeng, ngem addan kinatalingenngen. Agsangit pay laeng ni Ramón ken María Serrano manipud España 24 a tawtawen kalpasan ti ipapatay ni Paquito. Ngem kadagitoy amin a kaso, ania ti namagtaginayon kadakuada? Sumungbatda: “Ti namnama iti panagungar!”

Ngem ania a talaga ti kaipapanan ti “panagungar”? Siasino dagiti mapagungar? Kaano? Ken kasano a masiguradotayo dayta?

Namnama dagiti Natay​—Kas Insuro ni Jesus

Bayat iti ministeriona ditoy daga, pinagungar ni Jesus dagiti sumagmamano a tattao. (Marcos 5:35-42) Daytoy ti nagserbi a kas pammatalged iti dakkel a panagungar a mapasamakto inton ti daga ti naan-anay nga iturayanto manen ti Dios, kas ti idawdawat dagiti minilion no agkararagda: “Umay koma ti pagariam. Maaramid koma ti pagayatam, kas sadi langit, kasta met ditoy daga.”​—Mateo 6:9, 10.

Maysa nga ulidan iti pannakabalin ti Dios iti daytoy a banag isu idi pinagungar ni Jesus ti gayyemna a ni Lazaro. Iti dayta met laeng a tiempo, ti salaysay lawlawaganna ti kasasaad dagiti natay. Kinuna ni Jesus kadagiti adalanna: “Ni Lazaro a gayyemtayo matmaturog, ngem innak tapno riingek iti turogna.” Gaput’ dida naawatan ti kayatna a sawen, kinuna dagiti adalan: “Apo, no matmaturog, umimbagto.” Impagarupda nga ibagbaga ni Jesus a basta matmaturog laeng ni Lazaro idinto a, ti kinapudnona, isut’ natay. Gapuna, kinuna ngarud ni Jesus a silalawag: “Ni Lazaro natay.”

Pangngaasiyo ta paliiwenyo, a ni Jesus awan tinukoyna nga aniaman nga imortal a kararua nga aglasat iti sabali a kasasaad wenno mapan iti sabali nga ayan. Isut’ di naimpluensiaan iti pilosopia a Griego no di ket iti nalawag a sursuro iti Biblia iti Hebreo a Kasuratan. Ni Lazaro natay idi simmangpet ni Jesus ket addan iti pakalaglagipan a tanem iti uppat nga aldaw. Gapuna, ania a namnama ti adda a maipaay kenkuana?

Idi nakisarita ni Jesus iti kabsat a babai ni Lazaro a ni Marta, imbagana kenkuana: “Agungarto ni kabsatmo.” Kasano ti isusungbat ni Marta? Imbagana kadi a ti kararuana addan idiay langit wenno iti sadinoman a lugar? Ti sungbatna ket: “Ammok nga agungarto inton panagungar iti kamaudianan nga aldaw.” Isu salsalimetmetanna met ti sursuro ti Biblia a panagungar iti biag ditoy daga. Nangipaay ni Jesus kenkuana iti dakdakkel pay a rason iti panamati babaen ti panagkunana: “Siak ti panagungar ken ti biag. Ti mamati kaniak, uray no matay, agbiagto pay.” Ket, tapno paneknekan ti puntona, napan iti yan ti tanem ni Lazaro ket pimmukkaw iti napigsa a timek: “Lazaro, rummuarka!” Aniat’ napasamak?

Kuna ti historikal a salaysay: “Daydi natay rimmuar a sipapatapat dagiti im-ima ken saksakana kadagiti bedbed, ket ti rupana adda a nabungon iti maysa a lupot. Kuna ni Jesus kadakuada: ‘Warwaranyo ket bay-anyo a mapan.’”​—Juan 11:1-44.

Adda sadiay ti namnama a nangtulong kadagiti adu nga agladladingit a tattao a pinagsaludsodan ti Agriingkayo! Dayta met laeng a namnama ti nangtaginayon kadakuada a manginanama iti asidegen a masanguanan inton ti daga agbalinton a napabaro a paraiso ket matungpalton dagiti makaipaay-namnama a sasao ni Jesus: “Dikay pagsiddaawan daytoy ta umay ti oras a dagiti amin nga adda kadagiti pakalaglagipan a tanem mangngegdanto ti timekna, ket rummuardanto dagiti nagaramid ti naimbag iti panagungar ti biag, ken dagiti nagaramid ti dakes iti panagungar ti pannakaukom.”​—Juan 5:28, 29.

“Ti Paboritok a Teksto Ket . . . ”

Pinagsaludsodan ti Agriingkayo! dagiti nagannak ken agtutubo maipapan iti ipupusay iti anak iti pamilia.a Maulit-ulit, iti panangilawlawagda no kasano a napagballigianda ti panagladingitda, kinunada: “Palubosandak a mangibaga kadakayo iti paboritok a teksto.” No agladladingitka, nalabit dagitoy a teksto makatulongda met kadakayo.

Ti sangapulo-ket-uppat ti tawenna a ni Yunhee, manipud Seoul, Republika iti Korea, natay iti leukemia idi 1985. Ni tatangna, ni Chun Kwang-kook, inlawlawagna iti Agriingkayo! no kasano ti panangliwliwana ken ni Yunhee iti maudi a lawlawas iti panagbiagna: “Imbagak kenkuana ti maipapan ken ni Lazaro. Kinuna ni Jesus a ni Lazaro ket matmaturog, ket kas met kenkuana, inton agpukkawto ni Jesus, ‘Yunhee! Bumangonka!’ isut’ bumangonto met manipud iti pannaturogna.”

Ni Janet Hercock, manipud Inglatera, ket agtawen iti 13 idi natay iti kanser idi 1966. Isut’ inaywanan dagiti dadakkelna ken dua a kakabsatna, da David ken Timothy. Imbaga ni David iti Agriingkayo! no ania a teksto ti nakatulong unay kenkuana: “Dayta isu ti Aramid 17:31, a kunaenna: ‘Agsipud ta ti [Dios] intudingna ti maysa nga aldaw a panangukomnanto a sililinteg iti lubong gapu iti daydiay lalaki a tinudinganna, a pinaneknekanna kadagiti isuamin a pinagungarna iti tengnga dagiti natay.’ Idiay panamompon, impaganetget ti nagpalawag a ti panagungar ni Jesus isu ti mangipanamnama kadatayo iti maysa a masanguanan a panagungar. Daytat’ dakkel a gubuayan ti pammabileg kaniak.”

Idi Disiembre 1975 ni agtutubo a George, a 14 laeng ti tawenna, innalana ti paltog ni tatangna ket pinaltoganna ti bagina met laeng. Kasano ti panangawat ni tatang ni George, ni Russell, iti ipupusay ti anakna a lalaki babaen iti panagbekkel?b

“Dadduma a kasuratan ti nagbalin a sinipete para kaniak. Kas pangarigan, dagiti sasao idiay Proverbio 3:5: ‘Agtalekka ken ni Jehova iti amin a pusom ket dika agtalged iti pannakaawatmo met laeng.’ No dadduma agpampannurayak iti bukodko a pannakaawat iti panangpadpadasko a mangitunos iti bagik iti napasamak.”

Ti pamilia ti Morgan, manipud Inglatera, addada idiay Sweden idi ti anakda a ni Darrall ti kellaat a nagsakit. Maysa nga operasion nga emerhensia ti naaramid idiay Stockholm. Kamaudiananna isut’ nailugan iti eroplano a naipan idiay Inglatera, a sadiay ti nakatayanna di nagbayag sakbay iti maika-24 a kasangayna. Kuna ni nanangna a ni Nell: “Ti maysa a kasuratan a diak maliplipatan isu ti Mateo 22:32, a sadiay inadaw ni Jesus a kunkuna ti Dios: ‘Siak ti Dios ni Abraham ken ti Dios ni Isaac ken ti Dios ni Jacob.’ Kalpasanna intuloyna a kinuna: ‘Isu saan a Dios dagiti natay no di dagiti sibibiag.’ Ammok a dagidiay a sasao kaipapananna a ni Darrall ti adda iti pakalaglagipan ti Dios ket agsublinto iti panagungar.”

Namnama dagiti Natay​—Mabiiten a Matungpal

Ti padto ti Biblia ipamatmatna nga asidegtayon iti tiempo inton agtignayen ti Dios a mangisubli iti talna ken ti biag nga agnanayon kadagiti natulnog a sangatauan. Ikarkari ti Dios: “Ta pagbalinekto ti leddaangda a rag-o, ket liwliwaekto ida ket manipud iti leddaangda pagragsakekto ida.” “‘Medmedam dayta timekmo iti panagsangit, ket dagita matam kadagiti luluam, ta dayta aramidmo magunggonaanto,’ kuna ni Jehova, ‘ket umaydanto manen manipud iti daga ti kabusor [ipapatay].’”​—Jeremias 31:13-17.

Iti dayta a tiempo isublinto ni Jehova iti biag babaen iti panagungar dagidiay a natnatay bayat iti isuamin a historia ti tao. Iti sidong ti nainlangitan a gobierno iti baro a sistema ti Dios, maaddaandanto ti gundaway a mangpili iti biag nga agnanayon babaen iti panagtulnogda iti bilbilin ti Dios a maipaay iti biag iti dayta a tiempo. Gapuna, no agturongtayo iti Biblia, masarakantayto nga adda ti pudno a namnama a maipaay kadagiti natay ken ti pangliwliwa kadagiti amin a sibibiag.​—Aramid 24:15; Apocalipsis 20:12-14; 21:1-4.

[Dagiti Footnote]

[Kahon iti panid 14]

Ni Diane Krych, isu a nangisalaysay iti ipapatay ti anakna a lalaki a ni David iti maikadua nga artikulo, nagsagaba iti nakaro a panagliday ken ti panangilibak kadagiti panagtignayna. Daytoy ti napaneknekan babaen kadagiti sursurat nga insuratna ken David, ket indulinna, bayat iti 13 a tawtawen. Simmardengen a nagsurat idi inawatnan ti kinapudno iti ipapatay iti amana, isu nga inaywananna. (Ti Agriingkayo! dina irekrekomendar ti panagsurat a kas porma iti pannakabang-ar. Nupay kasta, inadawmi ti umuna a surat tapno mangiyilustrar no kasano a ti namnama iti panagungar ti nagserbi a sinipete ket dayta ti nangtaginayon kenkuana nanipud pay idi.)

Patgek Unay a David,

Matmaturogkan iti uneg ti 46 nga al-aldaw. Kasla adun a tawtawen ti napalabas nanipud idi pannakakitak kenka ken iniggamanka. Ngem limitado dagiti al-aldaw ti pannaturogmo. Tarigagayak koma a maammuan ti bilang dagiti al-aldaw tapno mamarkaak ket makissayko ti tunggal aldaw. Kadakami, daytat’ nakapapaut, narigat, naliday a panaguray, ngem para kenka daytat’ kasla sumagmamano a minutos. Agyamanak maipapan iti dayta. Inanamaenmi ti aldaw inton riingennakanto ni Jehova manipud iti turogmo iti baro nga urnos. Maaddaantayonto iti kadadakkelan a padaya nga ita pay laeng a makitam. Daytanto ti agpaut iti agarup tallo nga aldaw. Tunggal maysa nga am-ammom maawisto. Addaakto iti dayta a padayam. Ket inanamaek a saankami koman nga aguray iti mabayag. Diakon makauray a mangiggem kadagiti takkiagmo, David. Mail-iliwkami amin kenka. Kasla awan nagyan ti balay no awanka. Saanton a kasla idi dagiti bambanag agingga a makasublikanton iti pagtaengan a kaduami.

Gapuna, ingungotek unay nga anak, padasenmi ti aganus ket urayenmi ni Jehova a maipaay iti panagsublim, ket kabayatanna, mangisuratkaminto kadagiti ababa a sursurat tapno mangipakaammo kenka iti mapaspasamak bayat iti pannaturogmo.

Buyogen iti isuamin nga ayatko,

Mommy

[Dagiti ladawan iti panid 15]

Ikarkari ti Biblia a ti natay, kas kada Maria ken David, agungardanto