Sabsabong—Pagsidsiddaawan iti Panamarsua
ANIAN a nakaskasdaaw ti agmula kadagiti nagduduma a bukbukel iti isu met laeng a daga ket kalpasanna makita dagiti sabsabong a nagdudumaduma ken nagpipintasan! Ti makakayaw unay a panangiparangda kadagiti nakaad-adu a kolor, ken bangloda, ket makaparagsak!
Pudno unay, dadduma ti mabalin nga agkuna a ti kolor ken banglo dagiti sabsabong naskenda tapno mangawis kadagiti insekto a mang-pollinate kadagiti mulmula. Ngem no dagita laeng ti rason iti kasta a kinapintas, panagdudumaduma, ken bangloda, apay ngarud a dagiti sabsabong ket kasta unay a gubuayan iti ragsak dagiti tattao? Apay a dagitoy ket gubuayan met iti talna iti isip ken pagimbagantayo?
Awan duadua, maparagsak dagiti puspuso babaen iti pannakakita kadagiti sabsabong. Ti napnuan kolor a bokey ti dagdagus a mangparagsak iti aldaw iti maysa nga asawa wenno maysa nga ina, mangparagsak iti agsakit a gayyem, paragsakenna ti malmalday a puso, ket pagrusingenna pay iti pannakipagayam ken palasbangenna iti ayat. Ti pannagna iti maysa a talon a naarkosan kadagiti sabsabong ti pudno a makapabaknang. Ken ania a tawa wenno kusina wenno salas ti saan a napapintas babaen iti kaadda dagiti nakaay-ayat, napintas a sabsabong? Anian a saan koma unay a makaay-ayo ti lubong no awan dagiti sabsabong!
Dagiti 250,000 a nagduduma a sabsabong saanda a basta timmaud. Dagitoy ti ebkas iti ayat ti Namarsuatayo, ni Jehova a Dios, a maipaay iti natauan a pamilia. Ket nupay no ti daga itatta ti minulitan ti tao, umayton ti tiempo a dayta ti maisublinton iti Paraiso a pinanggep ti Dios a maipaay iti dayta. Kalpasanna, ti napaltiingan a Sao ti Dios ipadtona: “Ti let-ang ken ti namaga a daga naragsakdanto, ket ti tay-ak a langalang agragrag-onto ken agsabongto; kas iti rosa agsabongto iti nawadwad, ken agrag-onto a buyogen pay iti ragsak ken kankanta.”—Isaias 35:1, 2, Revised Standard Version.
[Dagiti ladawan iti panid 16, 17]
Agrikos kas iti relo manipud makinngato a kannigid: hibiscus, African daisy, hybrid tea rose, water lily