“Pagarupko ti Panangyalison ti Dara ket Biag, Saan nga Ipapatay”

DAGIDIAY a sasao ti inyebkas ni Sal Cirella, ama ti maysa a biktima iti hepatitis, iti programa ti telebision iti E.U. a 20/20 idi Disiembre 11, 1986. Ti anakna a babai a ni Tracy naikkan iti panangiyalison kas “pagalagadan iti ospital,” uray pay no dayta ti maibusor iti pagayatan dagiti nagannak. (Naigiddato, dagitoy saanda a Saksi ni Jehova, nga agkedked iti panangiyalison gapu iti relihiuso a rason.) Isut’ nakaala iti hepatitis, ket ti biagna ti naisalakan laeng babaen iti liver transplant.

Ni Tracy ket inatake ti maysa a porma iti hepatitis a maawagan non-A/non-B hepatitis. Daytoy met laeng a programa iti TV ti nangipadamag: “Nasurok a 190,000 nga Americano ti maakaran iti dayta iti panangiyalison iti tinawen. Dayta pataudenna ti agnanayon a pannakadadael iti dalem wenno papatayenna ti ngangngani 10,000 a tattao iti tinawen. Daytat’ ngangngani nangpapatay ken ni Tracy.”

Maysa a siruhano a nagopera nga awan ti dara kadagiti 14,000 a kaso ti nagkuna met: “Makitak dagiti tattao a mangiyal-alison iti dara kadagiti tattao a di makasapul iti dayta, ket abbunganda ti bukodda a biddut a di panagannad, no awanen ti sabali, babaen ti panangusar iti panangiyalison iti dara. Ket pagarupek a dayta ti naan-anay a di maawat.” Ti sabali pay a doktor, a dati nga opisial iti U.S. Food and Drug Administration, ti nagkuna: “Patiek nga amin dagiti produkto ti dara ti nalabes ti pannakausarda. Pagarupek nga adda ti umdas a pammaneknek a mangpaneknek iti dayta. Ti kababalin a masapul a mabalbaliwan isu ti kababalin dagiti mangngagas, no ania ti ibilinda iti pasiente. Ket mangibilinda iti adu unay a dara.”