Kinadakes ken Panagsagaba—Kasanonto a Maipatinggada?
DAGITI napapait a kapkapadasan masansan a mangparurodda. Ania, nupay kasta, no adda ti nainkalintegan a rason iti panagsagaba ti tao? No panunoten dayta, itultuloytayo ti salaysay maipapan ken ni Job. Kalpasan ti namitlo a panagrikos iti napinget a panagsusuppiat, maysa nga agtutubo a managan Eliu ti nagsao. Kunana ken ni Job: “Ta kunaem, ‘Ti kinalintegko ad-adda ngem ti kinalinteg ti Dios.’” Wen, ni Job agimbubukodan ken ikalinteganna ti bagina met laeng. “Adtoy!” kuna ni Eliu. “Sungbatankanto, iti daytoy saanka nga apag-isu; ta ti Dios dadakkel ngem ti tao.”—Job 35:2; 33:8-12.
Ti Dios addaan kadagiti nawadwad a pammaneknek nga isu ket naimbag. (Aramid 14:17; Roma 1:20) Gapuna ti kadi kaadda iti kinadakes ket rason iti panangkarit iti kinaimbag iti Dios? Simmungbat ni Eliu: “Adayu koma nga ipagarup a ti Dios aramidenna ti kinadangkok, ken iti Mannakabalin-amin nga isu aramidenna koma ti kinadangkes!”—Job 34:10.
Ti Dios—Awan Pannakabalinna a Maibusor iti Kinadakes?
Mabalin kadi, ngarud, a ti Dios ket basta awan pannakabalinna a makibiang ken Job wenno iti siasinoman? Maisuppadi ketdi! Manipud iti nakaam-amak nga alipugpug agsao ni Jehova a maipaay iti bagina met laeng, a sibibileg a patalgedanna ti kinamannakabalin-aminna. “Sadino ti yanmo idi inkabilko ti pamuon ti daga?” inkiddawna ken ni Job. Ta, imbes nga isut’ limitado ti kabaelanna, saritaenna ti bagina a kas Daydiay mangtengngel kadagiti baybay ken mangituray kadagiti langlangit ken dagiti sibibiag a parparsuana.—Job 38:4, 8-10, 33; 39:9; 40:15; 41:1.
Pudno, saan nga ilawlawag ti Dios ken Job no apay a pinalubosanna ti panagsagabana. Ngem “ti managdillaw makisusikto aya iti Mannakabalin-amin?” inimtuod ti Dios. “Wen, aw-awanemto laeng aya ti panangukomko? Pabiddutennakto aya tapno mapalintegka koma?” (Job 40:2, 8) Anian a kinatangsit, ngarud, ti panangpabasol iti Dios kadagiti amin a kinadakes wenno mangparbo kadagiti napilosopiaan a panangikalintegan a maipaay kenkuana! Kas ti nakatignayanen ni Job nga aramiden, dagita ket nasayaat no “ibabawidan” dagiti agsusupadi a teoriada.—Job 42:6.
Dagiti Isyu a Marisotto
Saan a nabigbig ni Job a dagiti panagsagabana ket ramanenna ti adu a dadakkel nga isyu a naibangon sakbay la unay ti pannakaparsua ti tao. Iti dayta a tiempo maysa a managalsa nga espiritu a parsua a managan Satanas (“Manangsuppiat”) ti nangiturong iti tao iti basol. Imbilin ti Dios ken Adan ken Eva a liklikanda ti pannangan manipud “iti kayo iti pannakaammo iti naimbag ken dakes.” Masapul ti panangraemda iti kalintegan ti Dios a mangikeddeng iti naimbag wenno dakes para kadakuada. Ti Manangsuppiat, nupay kasta, nangimula iti panagduadua iti isip ni Eva, a kunkunana: “Pudno aya a kinuna ti Dios a saankay a mangan iti amin a kayo iti minuyongan?” Sumaganad sinuppiatna ti Dios: “Saan a pudno a mataykayonto. Ta ti Dios ammona nga iti aldaw a pannanganyonto iti dayta dagiti matayo maluktandanto ket kaslakayton iti Dios.”—Genesis 2:17; 3:1-5.
Dagiti makapardaya a sasao ni Satanas nangibangonda kadagiti dadakkel nga isyu: Agul-ulbod kadi ti Dios idi inkeddengna ti ipapatay gapu iti pannangan iti naiparit a bunga? Uray pay no kasta, ania ti kalintegantayo a mangikkat iti wayawaya dagiti parparsuana ken ti mangipabaklay kadagiti pagalagadanna kadakuada? Saan kadi nga isu ket maysa a naagum a Dios, nga inkedkedna ti naimbag kadagiti parparsuana? Ti kadi panagwaywayas a naisina iti Dios matarigagayan unay?
Ti panangpapatay kadagiti managalsa mabalin a nakapataud laeng ti ad-adu pay a salsaludsod. Babaen laeng ti panangipalubos iti panagwaywayas a naisina iti Dios a saan a malaplapdan iti umdas a kawatiwat iti tiempo a mabalin a mapaneknekan dayta—iti namimpinsan—a ti tukon ni Satanas a panagwaywayas ket maysa nga awis nga agturong iti didigra. Wen, “ti isuamin a lubong adda iti babaen ti dakes,” ni Satanas a Diablo, ket saan nga iti babaen ti pannakabalin ti Dios. (1 Juan 5:19) Ti sakit, kinaawan iti kinahustisia, panangadipen iti ekonomia, rigrigat—amin dagitoy isu ti bunga ti panangpili ti tao iti panagwaywayas a naisina iti Dios ket adda iti sidong ti panangituray ni Satanas! Ket nupay adda ti irarang-ay ti teknolohia, agtultuloy a kumaro ti kasasaad ti lubong—masansan gapu iti moderno a teknolohia.
Ti panangipalubos ti Dios kadagitoy amin a di mailadawan a panagrigrigat, nupay kasta, di mamagbalin kenkuana a saan a nalinteg. Maisuppadi ketdi, ti kinaawan ti kinalinteg ti tao ‘ti nangipalgak ketdi iti kinalinteg ti Dios.’ (Roma 3:5) Kasano?
Mapukawen ti Panagsagaba—iti Agnanayon!
“Ti sangaparsuaan agsasaibbekda ken agrigrigatda agingga ita,” kinuna ni apostol Pablo. (Roma 8:22) Wen, 6,000 a makadidigra a tawtawen iti panagwaywayas ti tao ti nangipakita a pudno dagiti sasao iti Jeremias 10:23: “Saan nga agtaud iti tao a magna iti panangiturong kadagiti addangna.” Din agbayag, nupay kasta, ti Dios makibiangto a sililinteg ket rugianna ti panangiturong kadagiti ar-aramid ti sangatauan.
Babaen ti pannakaibutaktak ti makadidigra a nagbanagan iti panagwaywayas ti tao, iti kasta mabalinen a pukawen ti Dios dagiti amin a bambanag a nangpataud iti panagsagaba: gubgubat, sakit, krimen, kinaranggas—uray ti ipapatay a mismo! (Salmo 46:8, 9; Isaias 35:5, 6; Salmo 37:10, 11; Juan 5:28, 29; 1 Corinto 15:26) Dayta ti kas iti nangngegan ni apostol Juan iti sirmata: “Ti Dios . . . punasennanto dagiti amin a lulua kadagiti matada, ket awanton ni patay, ket awanto metten ti sasaibbek wenno sangsangit wenno rigrigat. Ta dagiti immuna a bambanag napalabasdan.”—Apocalipsis 21:3, 4.
Makapainteres, impatingga ti Dios ti panagsagaba ni Job babaen ti panangisublina iti salun-atna ken ti kinabaknangna ken babaen ti panangbendisionna kenkuana iti maysa a dakkel a pamilia. (Job 42:10-17) Umasping iti dayta, ikarkari ti Biblia kadatayo: “Dagiti sagsagabaen itoy agdama nga aldaw saanda a maikari nga ipadis iti dayag a maipanayagto kadatayo . . . A ti met laeng sangaparsuaan maluk-atanto iti pannakaadipen ti panagrupsa a maipaay iti nadayag a wayawaya dagiti annak ti Dios.” (Roma 8:18, 21) Ti kinadakes ti pudno a mapukawto manipud kadagiti pakalaglagipantayo!—Idiligyo iti Isaias 65:17.
Panangibtur iti Kinadakes
Agingga a dumteng dayta a wayawaya, masapul nga ibturantayo ti agbiag iti nadangkes a lubong, a di manginanama a ti Dios salaknibannatayo manipud iti personal a didigra. Nangibangon ni Satanas iti ulbod a namnama idi ginargarina ni Jesu-Kristo a tumpuak manipud iti templo, a tiniritirna ti teksto ti Biblia idiay Salmo 91:10-12, a kunana: “Awanto ti aniaman a dakes a dumteng kenka . . . Ta itednanto dagiti anghelesna nga agaywan kenka, tapno aluadandaka kadagiti amin a daldalanmo.” Ni Jesus, nupay kasta, dina inawat ti aniaman a kapanunotan iti panangawat iti namilagruan a pisikal a pannalaknib. (Mateo 4:5-7) Ikari laeng ti Dios ti panangsalaknibna iti naespirituan a pagimbagantayo.
Dagiti pudno a Kristiano ngarud saanda nga “agpungtot a maibusor ken Jehova a mismo,” uray pay no dumteng ti didigra. (Proverbio 19:3) Ta “ti panawen ken gasat mapasamakda” uray pay kadagiti Kristiano. (Eclesiastes 9:11) Kaskasdi, addaantayo iti tulong. Addaantayo ti namnama nga agbiag nga agnanayon iti maysa a nalinteg a baro a lubong, a sadiay ti kinadakes awanton. Mabalintayo a kanayon ti umadani ken ni Jehova a Dios babaen iti kararag, ta ikarina nga ikkannatayo iti sirib a kasapulan tapno makapagibtur iti aniaman a pannakasuot! (Santiago 1:5) Tagtagiragsakentayo met ti panangsuportar dagiti padatayo a Kristiano. (1 Juan 3:17, 18) Ket addaantayo iti pannakaammo a ti kinamatalektayo iti sidong ti pannakasuot ti mamagragsak ken ni Jehova!—Proverbio 27:11.
Kaskasdi, ti panangibtur iti kinadakes ket pulos a saan a nalaka. Gapuna, no mangliwliwatayo iti maysa nga adda iti sidong ti panagsagaba, nasayaat ti ‘makipagsangit a kadua dagiti agsangit’—ket mangitukon iti praktikal a tulong. (Roma 12:15) Ni Ana, a nadakamat iti pangrugian, ti natulongan a makapagballigi manipud iti didigra. Isut’ maysa a Saksi ni Jehova ket nasarakanna a dagiti padana a Kristiano ti situtulok a tumulong kenkuana, a nangitukonda ti temporario a pagtaenganna. Nupay no sagpaminsan isut’ makarikna iti panagliday, isut’ makasarak iti pagkamangan iti namnama nga ipaay ti Biblia. “Ammok nga agsublinto dagiti annakko iti panagungar,” kuna ni Ana. Ti pammatina iti kinaimbag ti Dios ngarud ket bimmileg pay.
No agsagsagabakayo, dawatenyo kadagiti Saksi ni Jehova a tumulong kadakayo kadagiti salsaludsodyo ken panagduaduayo. Manipud kadakuada magun-odanyo met ti libro a Mabalinyo ti Agbiag nga Agnanayon iti Paraiso a Daga, nga addaan iti makatulong a kapitulo nga “Apay a Pinalubosan ti Dios ti Kinadakes?” ken “Nairamankayo iti Nasken nga Isyu.” Pudno, ita a mismo dagiti dakes a bambanag mapasamakda kadagiti naimbag, ngem din agbayag amin dayta mabalbaliwanto. Ammuenyo a mismo ti ad-adu pay a detalye babaen ti pannakiumanyo kadagiti Saksi ni Jehova iti sangakaarrubaanyo wenno agsurat iti manangipablaak itoy a magasin.
[Dagiti ladawan iti panid 9]
Idiay nalinteg a baro a lubong, ti kinadakes malipatanton