Manipud Managbasatayo
Ti Biagko nga Addaan “Hemophilia”
Masapul nga iyebkasko no kasano ti pannakasair ti riknak iti salaysay ni John A. Wortendyke a “My Life With Hemophilia.” (Hunio 22, 1987 nga Awake!) Ti pammati nga impakitana ken ni Jehova a Dios ket pudno a nakaskasdaaw. Makipagad-adalak ita iti Biblia kadagiti Saksi, ket ti pannakabasak maipapan ken ni John ti namagbalin kadagiti bukodko a parparikut a kasla nagbassit no idilig ket pinagbalinnak a determinado a saan a kumapuy iti panagserbi iti Dios.
A.C., England
Kadagiti amin a nakaay-ayat a kapkapadasan iti magasinyo, daytoy ti makasair unay iti rikna, makapabileg-pammati nga artikulo a nabasak pay laeng. Kayatko nga ibaga ken ni John Wortendyke a dagiti karkararagko adda kenkuana ken ti natured a pamiliana! Bayat ti panangbasak iti artikulo, mariknak ti panagirteng dagiti piskel ti tianko iti tunggal mapasamak ti panagpadarana. Daytoy ket laglagipekto a kanayon no agsagabaak iti sakit ti ulo gapu iti sinus, migraines, wenno ti atake iti arthritis!
D. S., United States
Dagiti Africano nga Umun-inum ti Gatas
Ti artikuloyo a “Will Africa Ever Be Free From Hunger?” ti nangnangruna a makalawlawag. (Marso 8, 1987 nga Awake!) Nupay kasta maammuanyo koma a ti ladawan ti agtutubo iti akkubyo nga addaan ti mansanas ken ti sangabaso a gatas ket saan nga isu ti kayatmi a makita idiay Africa. Agarup 70 porsiento iti negro a populasion ti di mangikankano iti lactose. Dikam agserbi kadagiti katutubo nga Africano babaen ti panangparegtami kadakuada nga uminum iti gatas.
G.H., M.D., Hawaii
Ti koresponsaltayo idiay Sud Africa kunaenna: “Sinukimatmi dagiti sumagmamano nga Africano, ket kinunada nga imminumda amin iti gatas idi ubbingda pay. Ti panangusarda kadagiti baka ken ti gatasda ket napateg iti panagbiag dagiti negro iti makin-abagatan nga Africa manipud idi kaaldawan ti panangsakop ti Europa. Kinapudnona, ti pagsasao a Zulu addaan iti sao nga, ‘ukukleza,’ a mangdeskribir kadagiti Africano a papastor a manggatgatas iti baka a direkta nga inumenda ti gatasna. Siempre, ti kasasaad mabalin a nadumaduma kadagiti dadduma a paspaset iti Africa.”—ED.
Ilalapsut iti Droga
Kayatko ti agyaman kadakayo maipaay iti artikulo nga “Agimtuod dagiti Agtutubo . . . Kasano a Makalapsutak iti Droga?” (Pebrero 22, 1986) Sumamagmano a tiempon ti napalabas, nagsagabaak iti sakit gapu iti panagdanag ken panagaburido, ket ti doktorko ti nangiresita iti nakapuy laeng a pangpakalma kaniak. Di nagbayag simmayaaten ti riknak ket agyamanak iti pannakaagas. Kalpasanna, kalpasan ti pannakaammok iti peggad dagitoy a droga ken ti pannakabigbigko a diakon kasapulan dayta, inkeddengkon ti panangisardengko nga agtomar iti dayta. Kalpasan ti uppat ket kagudua a tawen a panagpannurayko iti dayta, ammok nga addanto ti epekto ti panangisardengko iti dayta. Ngem babaen ti kankanayon a panangiyaplikarko ti maitutop a panangiwanwan ken balakad iti artikulo, nagballigiak kamaudiananna.
G.O., England
Aniat’ Mapaspasamaken kadagiti Kabakirantayo?
Agyamanak iti ruar maipapan iti “Aniat’ Mapaspasamaken kadagiti Kabakirantayo?” (Hunio 22, 1987) Gapu ti panagsagana a maipaay iti oral examination iti geography maipapan iti parikut iti ekolohia, inusarko dagitoy nga artikulo, isuda a dakkel a tulong. Nakagun-odak ti nasayaat a resulta iti panangsubok. Nakausarakon kadagiti artikulo a naipablaak iti Agriingkayo! idi a maipaay iti panagsirarak idiay eskuelaan. Naimpusuan unay ti panagyamanko!
G.C., Italy