Ti Karayan LI​—Sadiay Agkurang dagiti Sasao a Pangdeskribir

MANIPUD kadagiti babassit a wawaigna iti bantay, ti Karayan Li agayus nga agpaabagatan. Inton makagtengen iti okupado ken napusek a siudad iti Guilin iti makin-abagatan a China, dayta ti limmawan ket agayus a sikakalma iti sibay daytoy a kadaanan a siudad a naiwaraswaras iti makinlaud nga igidna.

Ti Guilin ket naiduma manipud kadagiti Makinlaud a siudad. Bayat dagiti or-oras iti panagap-apura dagiti kalkalsadana ti napnapno kadagiti bisekleta. Ti mammano a naiwaraswaras a taxi ken dagiti trak ti lumasat iti kaaduan a tao, nga agbusbusina. Dagiti siklista agpedalda a nakapuspuskol, a pagaammoda a sumagmamano laeng a pulgada ti kaadayuda. Awan ti maupay, awan ti nalaaw a panagriaw, awan ti panagpungtot. Naiduma dayta manipud iti or-oras ti panagap-apura idiay Nueva York wenno Roma wenno Siudad iti Mexico. Daytat’ naiduma, ngem di agkurang dagiti sasao a mangdeskribir iti dayta.

Iti ad-adayu pay iti igid ti Li, adda dagiti babassit a komunidad kadagiti igidna. Iti igid ti karayan, agay-ayam dagiti ubbing ket payapayanda dagiti bilog dagiti turista a lumabas nga agpaabagatan. Dagiti babbai aglabada ken ugasanda dagiti natnateng iti danum. Dagiti lallaki mangipastorda kadagiti nuang kadagiti igidna. Iti saan nga adayu iti uneg, dagiti mannalon agtrabahoda kadagiti taltalon, a dadduma ti agraraep, dadduma ti agarado babaen iti nuang. Naiduma, ngem madeskribir.

Ngem iti igid ti Karayan Li addada dagiti bambantay, a nalinealinea, nga agpangato. Nagpaiduma unay dagiti kabambantayan ken di madeskribir. Kadagiti amin a dadduma a naidumduma a buya iti Karayan Li ti panagbiahe babaen iti bilog manipud iti Guilin nga agturong iti Yang-shuo, adda dagiti pangdeskribir a sasao a mangdeskribir kadakuada, ngem para kadagitoy a nakaskasdaaw a kabambantayan awan dagiti sasao a pangdeskribir kadakuada.

Bayat iti 5 nga oras ken iti 80 a kilometros ti bilog nagbiahe a nagpababa iti karayan Li, ket iti 5 nga oras ken iti 80 a kilometros dagidiay a kabambantayan ti saan a pulos a napukaw iti panagkita. Naglilineada a nakaas-asideg, ken nakaad-adu pay a linea iti likudanda, ken adda pay ad-adu a linea iti sanguanan, agingga a dagitoy ti ngangnganin di makita iti kaadayuna ta kasla saandan a pudno a bantay. Tapno maala dagiti saan a madeskribir dagiti sasao a pangdeskribir, nagklik dagiti kamera ket inibusna dagiti adu a rolio dagiti film. Sigurado, ditoy ti maysa a ladawan ket katupag iti sangaribo a sasao!

Ngem dagiti kamera saanna met a naala ti ragsak a narikna kadagita a karkarna a natatayag a bambantay a naur-urnong agingga iti makita iti mata. Ti trepolante ti bilog nangidasarda iti napudot a taraon a maipaay iti pangngaldaw. Amin ti bimmaba a nangan malaksid daytoy a managpaliiw, isu a nasdaaw iti kasta unay ta dina mapanawan ti makingngato a kubierta. Mabalinna ti mangan iti aniaman a tiempo; daytoy a panangpennekna

iti matana makalabeston di agbayag. Ngem ti saan a naala ti kamerana, masapul

nga agtalinaed iti memoriana.

“Sigun iti geolohikal a surbey,” maysa a folder ti managbiahe ti nagkuna, “ti Guilin ket dati a nakalawlawa a baybay. Kas banag iti maulit-ulit a panagreggaay, ti limestone nga adda iti tukok ti baybay nagpangato ket nagbalin a daga. Babaen iti pannakareggaay gapu iti panniempo ken ti solusion iti tudo, dagiti limestone nagbalinda a nangangato a kabakiran, naiputputong a kabambantayan, karkarayan ken rukib iti uneg ti daga. Daytoy a naisangsangayan a naporma a Karsta ti nangaramid iti landscape wenno napintas a buya ti daga iti Guilin a nakaskasdaaw unay iti lubong.”

No nalabes bassit ti naudi a sao, dayta ket maysa a mapakawan a panaglablabes. Sigurado, daytoy a kabakiran iti natatayag a limestone isu a pagayusan ti Karayan Li ket saan a malipatan. Ditay masigurado no kasano ti itataudna, ngem masiguradotayo no sino ti nangpataud iti dayta. No agkurang dagiti pangdeskribir a sasao a mangdeskribir kadagiti kabambantayan iti Karayan Li, anian a nakarkaro pay ti panagkurang dagiti mangdeskribir a sasao a mangdeskribir iti Nangaramid kadakuada. “Naindaklan ni Jehova ket maikari iti amin a panagdayaw, ket ti kinadakkelna saan a matukod.”​—Salmo 145:3.

[Dagiti Footnote]

[Kahon/Ladawan iti panid 17]

Ti Kangrunaan a Pasetna

Kasla kasta ti pagarupmi. Kalpasan ti panagdaliasat iti Karayan Li napankami iti maysa nga eskuelaan iti nursery idiay Guilin. Iti klase dagiti uppat ti tawenna nga ubbing agay-ayamda kadagiti ay-ayam, nagsalada iti apagbiit, ket kalpasanna nagtugawda ken immimdengda a masmasdaaw bayat a ti bumisbisita nga Americana nagkanta iti kanta ti ubing. Dayta ket maipapan iti maysa nga ubing a babai ken ti ‘inay-ayatna a munieka a naraniag nga asul dagiti matmatana.’ Siempre, saan a naawatan dagiti ubbing dagiti sasaona, ngem nakayawanda babaen iti nalamuyot a timek ken ti naalumamay nga aweng iti simple a tuno, ken ti pannakatulad ti estoria bayat ti pannakakawes ti munieka, ipapanna panagay-ayam, ken kamaudiananna ti ‘pannakaililina a maturog kalpasan ti aldaw.’ Nadlasinda ti rikna. Nagrimat dagiti ruprupada. Nagisemda. Dadduma ti nakataltalna, nasdaaw. Idi pimmanawkami siraragsak a nagpayapayda.

Kinayawanda dagiti puspusomi.