Dagiti Siit ti Porcupine
Ammoyo Kadi—
◯ No mano ti adda a siit ti porcupine?
◯ No dayta ti mangipana kadagiti siitna iti mangraut?
◯ No apay a dagitoy a sisiit mammano a mangpataudda iti impeksion
iti biktima, ngem no dadduma pataudenda ti ipapatay?
DAGITI 30,000 wenno ad-adu pay a siit a kankanayon a mangsukat iti bagbagida ket pulos a saan a mausar iti kinaagresibo no di ket maipaay iti depensa; ket saan met nga ipana ti porcupine dagiti siitna. Pudno, no ipalladawna ti napno ti siit nga ipusna iti mangraut kenkuana, dadduma a siit ti mabalin a tumayab ngem bassit laeng ti puersana tapno dayta ti maipalok iti aniaman a banag. No ti naipalladaw nga ipus maidekket iti rumaut, dagiti siit ti narigat a maikkat.
Sumagmamano a tawenen a napalabas, maysa a biologo naaddaan iti nasaem a pannangsaranget iti maysa a porcupine. Maysa a siit ti naipalok iti 25 centimetros iti lasag ti takkiagna sakbay a rimmuar dayta dua nga aldaw kalpasanna. Awan ti impeksion. Isut’ nangaramid iti panangsukimat kadagiti dadduma a siit ket nasdaaw a makasarak nga addaanda ti bassit nga antibiotiko. Gapu iti daytoy a rason, dagiti siit mammano a mangpataudda iti impeksion.
Nupay kasta, no ti natirad a siit ti maipalok iti lasag ket matudokna ti nasken nga organo, dayta ti mangpapatay iti biktimana. Ket no ti siit tudokenna ti ngiwat ti animal tapno di makapangan, ti animal mabalin a mabisinan agingga a matay.
Ti mainayon pay a pagimbagan a ta dagiti siitna ti agserbi a pagpatapawna no ti porcupine ikeddengna ti mangan iti paboritona a taraon—dagiti water lilies. Kas iti animal a mismo, dagiti siitna ti pudno a produkto iti maysa a nalaing a Diseniador.
[Picture Credit Line iti panid 31]
Elizabeth Joy/National Park Service