Baro a Peggad iti AIDS?

Nalabit 10 agingga iti 20 milion a tattao iti sangalubongan ti agaw-awit itan iti virus ti AIDS. Idiay probinsia ti Canada a British Columbia, napattapatta a 10,000 agingga iti 20,000 ti naimpektaran, ket dagiti autoridad iti salun-at madanaganda maipapan iti panagsaknap pay ti impeksion. Gapuna ti B.C. Ministry of Health nabiit pay a nangisagana ti maysa a broshur, a mangitukon, kas kunaenna, “ti kaudian a pudno nga impormasion maipapan iti AIDS.”

Ti broshur ulitenna ti kankanayon a nangnangngeganen a pakdaar a maibusor iti pannakidenna kadagiti naimpektaranen a pareha ken ti pannakiraman iti dagum wenno ringilia nga inusar ti naimpektaran a tao. Nupay kasta, ilawlawagna met nga agsipud ta ti virus ket adda iti dara, adda ti naisangsangayan a peggad manipud kadagiti dadduma a pangtudok iti kudil nga alikamen. Kas pangarigan, ti broshur dakamatenna ti alikamen a nausar iti panagtebbeng ti lapayag, iti panagikabil iti tattoo, ken iti acupuncture kas posible a pamay-an ti impeksion. “Napeggad met ti makiraman iti labahas wenno sipilio ti naimpektaran a tao,” kuna pay ti broshur.