Manipud Managbasatayo

“Leap Second”

Bayat ti panangbasak iti artikulo a “Leap Second“ iti “Panangmatmat iti Lubong” a (Mayo 22, 1988), nadlawko ti pammatalged ni Dr. Dennis McCarthy a ti maysa nga eroplano mabalin a malabsanna ti runway iti 300 metros [“kakalima ti maysa a milia”) iti maysa a segundo ket di umiso. Kas pangarigan, ti napno a Jumbo nga agturong ditoy daga ket agtaytayab iti agarup 150 knots, gapuna ti pudno a kapartakna ket 78 metros iti tunggal segundo.

Agsipud ta maysaak a piloto ti eroplano ken mangipatpatayab kadagiti Boeing 747, pagarupek a rebbengek ti mangitudo iti daytoy a biddut.

B. C., Italy

No ti pampanunoten ni Dr. McCarthy ket ti kapartakna nga agdisso, ngarud ni B. C. ket umiso. Ti eroplano malabsanna ti pagdissuanna iti agarup 80 metros imbes a 300 metros.​—ED.

“Bodybuilding”

Rinugiakon ti panagehersisio a maipaay kadagiti piskel tapno maaddaanak iti nasayaat a pisikal nga itsura. Rinugiak ti agtomar kadagiti hormones tapno napartak ti panagdakkelko (maysa a gagangay a banag kadagiti weight lifters). Agsanayak iti uppat nga oras iti inaldaw. Ngem bayat ti panagdakkelko, nagbalinak met a mennel. Kalpasanna nabasak ti artikulo a (“Young People Ask . . . Should I Go In For Bodybuilding?” December 22, 1986). Diak pagarupen a maidianko dayta nga ay-ayam, ngem itan mabigbigkon ti pannakasapul ti panangpabilegko iti panunotko ket saan laeng a ti bagik. Gapuna indianko dayta. Agyamanak iti kasta unay.

C. P., Brazil

Natalged a Panagmaneho

Tarigagayan ti asawak ken siak ti mangiyebkas iti nauneg a panangapresiarmi iti artikuloyo a “Natalged a Panagmaneho​—Ti Naganat a Kasapulan.” (Enero 8, 1988) Addaankami iti eskuelaan ti panagmaneho ditoy Ireland, ket dakami, kas mannursuro, interesadokami unay iti panangipasagepsep kadagiti amin nga estudiantemi ti pannakasapul iti panagbalin a saan laeng a nalaing a tsuper no di ket ti natalged a tsuper. Daytoy nga artikulo ti nangtulong nga agpadpada kadakami iti dakkel unay, ket nabaelanmi nga inyallatiw daytoy a nagpateg nga impormasion kadagiti estudiantemi.

P. ken A. B., Ireland

Glaucoma

Tinagiragsakko ti panangbasbasa iti artikuloyo maipapan iti glaucoma iti Mayo 8 nga Agriingkayo! Ngem nakasarakak ti maysa a paset a di umiso. Ti bagi dina sukatan ti vitreous humor solution. Masansan no madangran dagiti tattao ti matada ket agwayaway daytoy a pluido, mapukawen nga agnanayon ti panagkita wenno dayta ti madadaelen iti agnanayon.

C. R., EMT Paramedic, Estados Unidos

Ti tuktukoyen ti artikulo ket saan a ti vitreous humor, isu nga umiso ni G. R., no di ket ti aqueous humor, maysa a nadanum a pluido a masarakan iti makinsango a paset iti mata iti aglawlaw ti iris.​—ED.

Naaddaanak ti panawen ita a mangbasa ti artikulo maipapan iti glaucoma, a nagparang iti Mayo 8, 1988, a bilang ti Agriingkayo! Kayatko a komendarankayo iti panangipablaakyo iti kasta a makaipaay ti impormasion ken umiso nga impormasion.

R. J. G., M.D., The Eye Institute of California, Estados Unidos

Nasarakak ti artikulo maipapan iti glaucoma nga umiso ken makapainteres ti pannakaisuratna. Dagiti nalaka a maawatan nga artikulo a kas itoy ket dakkel a tulong kadagiti pasiente, ket maragsakanak a makakita itoy a kita ti artikulo kadagiti magasin.

R. S. L., M.D., Estados Unidos