Napukaw iti Nasurok a 20 a Tawtawen

“Dakayo ti kabsatko a lalaki ken babai. Ur-urayenkayo!”

ANIAN ti ragsak ni Jimmy a nangiyebkas kadagitoy a sasao idi ti asawak ken siak ti nakasabet kenkuana. Bayat iti nasurok a 20 a tawtawen, isut’ naiputputong iti kasla naibalud a kasasaad. Itan, babaen ti panangbisitami idi 1977, maysa a panawen iti bang-ar ti dandanin mangrugi.

Ngem kasano ken sadino a napasamak ti kasta nga edad media a kasasaad iti tiempotayo? Umuna, agsublitayo iti pangrugian.

Nakalkaldaang a Biag Pinaraniag ti Kinapudno ti Biblia

Ni Jimmy Sutera ket naipasngay idi Hunio 13, 1913, ket napadakkel idiay Brooklyn, Nueva York. Ti pudno a naganna ket Vincent, ngem isut’ kankanayon a naawagan Jimmy. Manipud pay kinamaladaga, isut’ sirurungsot a binaldado ti spinal meningitis. Idi ubing pay, isut’ nangrugi iti atiddog nga agsasaruno a pannakaiyospital.

Maysa nga aldaw kalpasan ti panagawidna manipud iti simbaan, ni Jimmy ket nakatugaw iti paraanganna, nga agsangsangit gapu iti panagliday. Maysa a naasi a babai a managan Rebecca ti nasair iti buya ket rinugianna ti nangliwliwa kenkuana. Ti babai ti nangilawlawag a ti Dios ti mangipatpateg kenkuana ket ti Dios addaan iti nagan, Jehova. Ni Jimmy dagus a naawatanna ti aweng ti kinapudno iti napateg a mensahe ti babai. Isut’ maysa kadagiti Saksi ni Jehova (nga idi ket naawagan Estudiante ti Biblia).

Dagiti dadakkel ni Jimmy, dagiti kakabsatna a lallaki, ken amin dagiti kakabsatna a babbai saanda nga anamongan ti kabbaro a nasarakanna a pammati. Gapuna ni Jimmy sililimed nga intultuloyna ti pananggun-odna ti pannakaammo ti Biblia. Dagiti dadakkelna impagarupda nga isut’ mapan iti simbaan, ngem iti kinapudnona isut’ tumabuno kadagiti gimong dagiti estudiante ti Biblia ken makiraman a kaduada iti publiko a ministerio.

Idi 1932, indedikar ni Jimmy ti biagna iti Dios ket insimbolona daytoy babaen iti bautismo iti danum. Makapainteres, ti agdama idi a presidente iti Watch Tower Society, ni J. F. Rutherford, ti nangipalawag iti palawag ti bautismo.

Nupay no marigatan ni Jimmy a magna, isut’ nakiraman iti panangasaba iti pagarian iti balay-balay a mangus-usar kadagiti testimony cards ken ti ponograpo. Ti panangpatokar kadagiti naiplaka a sermon kadagiti ruruangan dagiti tattao isu ti kangrunaan a pamay-an ti panangisaknap iti mensahe iti Pagarian nga us-usaren dagiti Saksi ni Jehova idi 1930’s. Nupay saan a nalaka para ken ni Jimmy ti mangawit iti aniaman, isut’ mapan, a mangawit ti ponograpo iti maysa a sikigan ken ti libro ti bag a napno kadagiti literatura iti Biblia iti sabali.

Naiserrek iti “Nursing Home”

Ngem ni Jimmy nagsakit iti polio ket nagsagaba iti agsasaruno nga istrok, a nagbanag iti saanna a pannakausar iti kannigid a sikiganna. Isut’ nagsakit met iti “Parkinson’s disease” ket marigatan iti kasta unay nga agsao ken pugsa-pugsat. Dagiti dadakkelna, nga idin ket lallakay ken babbaketen, ti nangikeddeng a mangiserrek kenkuana iti panangaywan ti asideg laeng a “nursing home” idiay Brooklyn, Nueva York. Dayta ket idi 1958.

Nakaay-ayat, dagiti miembro iti pamiliana nangipakitada iti pudno a pannakaseknan babaen ti panangbisitada kenkuana iti sumagmamano a daras iti tunggal lawas, nupay no dadduma kadakuada ti bumusor iti relihionna. Daksanggasat, ti administrasion ti nursing home ket napaneknekan a bumusor iti kasta unay. Agsipud ta isut’ pisikal a di makabael a mangusar uray pay iti telepono tapno awaganna dagiti naespirituan a kakabsatna, napukawna ti amin a pannakasabetna iti ili ni Jehova. Adda ditoy, iti maysa a nursing home sumagmamano laeng a milias manipud iti sangalubongan a hedkuarter dagiti Saksi ni Jehova ngem naikulong kas maysa a balud ken naiputputong manipud iti amin a naespirituan a pannakilangen!

Dimmakes ti kasasaad iti nursing home, ket kamaudiananna idi agtengnga iti 1970’s, kinondenar ti estado dagiti pasilidad. Nupay kasta, gapu iti kinakurang iti nursing home idiay siudad ti Nueva York, awan ti masarakan a lugar a pangiyakaran kadagiti pasiente. Dagiti ipes situtured nga agkarayamda iti datar ken kadagiti diding. No dadduma dagiti kamkameng ti mangmalo pay ken ni Jimmy. Isut’ nagibtur, a naiputputong iti dayta a nakurapay a lugar iti nasurok a 20 a tawtawen. Kaskasdi ti Soberano nga Apo Jehova saan nga adayo kenkuana ket tinaginayonna ti pammatina a sibibiag ken nabileg​—maysa a kinapudno a paneknekan ti asawak ken siak. Ngem kasano ti pannakasarakmi kenkuana?

No Kasano a Nasarakanmi ni Jimmy

Idi nasapa pay a 1970’s ti asawak, ni Barbara ken siak nagbalinkami met a Saksi ni Jehova. Idi agangay, immakarkami manipud iti makin-amianan a Nueva York a nagturong iti Queens, siudad ti Nueva York. Bayat nga ipalplanomi ti umakar, nalagip ni tatangko a ti ulitegna iti siudad mabalin a maysa met a Saksi ni Jehova. Kinapudnona, malagipna a ti ulitegna a ni Jimmy ti kankanayon a mangibagbaga kenkuana kadagiti nakaskasdaaw nga estoria maipapan kadagiti babassit nga ubbing a lallaki a makiay-ay-ayam kadagiti leon idiay Paraiso.

Addakamin idiay siudad ti Nueva York iti agarup makatawen idi naammuanmi manipud iti kabsat a babai ni Ulitegko a Jimmy, ti ikitko iti tumeng, a pudno nga isut’ maysa a Saksi ni Jehova, “maysa kadakayo a tattao,” kas ti panagkunana. Intedna kadakami ti direksion, ket iti uneg ti maysa nga oras addakamin idiay nursing home. Maysa a nars ti nangpasardeng kadakami idiay ruangan, ta saan nga oras ti panagbisita. Inlawlawagko nga addakami tapno kitaenmi ti ulitegko iti tumeng ket siak maysaak a ministro, maysa a Saksi ni Jehova.

“Saanak a mangidumduma, ngem dikam palubosan dagiti Saksi ni Jehova ditoy,” silalawag a simmungbat. “Palubosanmi ti padi a Katoliko, ti ministro a Protestante, ken ti Episcopal a padi ditoy, ngem dikam palubosan dagiti Saksi ni Jehova.”

Pinadasko ti nagkalma, inikkak ti dua a pagpilian: (1) Mabalin a pastrekennakami a dagus ken sitatalna, wenno (2) isut’ makisango iti polis. Dagdagus, nagpili a sitatalna.

Diak malagip a nakitak ni Jimmy idin, yantangay uppat laeng ti tawenko idi isut’ simrek iti nursing home. Simrekkami iti kuartona ket imbagami kenkuana dagiti nagnaganmi. Bimmangon iti kama, inyebkasna, “Kabsatko!”

“Saan, pagarupek a dinakami am-ammo,” kinunak, nga inulitko dagiti nagnaganmi.

“Sika ti kabsatko a lalaki,” kinunana manen, “ken sika ti kabsatko a babai. Ur-urayenkayo!” Siempre, kayatna a sawen, a dakami dagiti naespirituan a kabsatna a lalaki ken babai.

Naammuanmi a ti kabsatna a babai, a bumusbusor iti relihionmi, ti nangibaga kenkuana maipapan kadakami. “Ni Al ken ni Barbara nakikaduadan iti relihionmo,” kinunana. Gapuna iti sumagmamano a tawenen isut’ nangur-uray kadakami a mapan mangkita kenkuana, tapno pagramananmi ti pammati a nagpadaanmi.

Pammati a Sibibiag ken Nabileg

Bayat ti panagsaritami, ad-addan a nalawag a daytoy laeng bagi ti tao ti nakaibalayan ti nagdakkelan a puso a napno iti espiritu ken pammati. Bayat ti panangsukimatmi iti memoriana, isut’ nangadaw kadagiti adu a Kasuratan, sinalaysayna kadakami dagiti napateg a padto iti Biblia, ken nagkanta pay iti kanta a pinutarna a nangiyebkas iti panangapresiarna ken ni Jehova. Nagraniag ti rupa ni Uliteg a Jimmy; ti intero a kinataona nangiraniag iti rag-o ken kinabara a naisangsangayan iti maysa a nalawag a tinaginayon ti Dios. Dayta ket maysa a milagro kadakami. Daytat’ kasla, bueno, maysa a panagungar.

Di nagbayag, umas-asidegen ti tiempo a maipaay iti 1977 a kumbension distrito. Nagimtuodkami no mabalinmi nga ikuyog ni Jimmy. Ti administrador pagarupenna a dina palubosan dayta. Iti sabali manen nga isasarungkar, dinawatmi iti maysa a nars no mabalinmi nga ipasiar ni Uliteg a Jimmy a naka-wheelchair iti aglawlaw ti bloke. Agsipud ta saanda nga ugali ti mangiruar kenkuana a pulos, pagarupenna a nasayaat dayta nga idea. Gapuna inruarmi. Nupay kasta, ababa pay laeng a distansia ti nadanonmi idi kinamatnakami ti administrador, nga agririaw a pulos a dikamto iruruar manen.

Nanipud idi immuna nga isasarungkarmi, nangibatikami iti literatura ken ni Jimmy. Idi nagsublikami, awanen. “Sadino ti yan ti literaturam?” inimtuodmi.

“Impaimak,” kinunana.

“Sadino ti yan ti Bibliam?”

“Impaimak.”

Songbook, Yearbook, dagiti isuamin nga ibatimi kenkuana ibatina kadagiti interesado. Isut’ addaan iti kasta unay nga umap-apuy a tarigagay a mangidayaw iti nagan ni Jehova. Ammona met a ti administrasion dadaelenda ti aniaman a literatura a masarakanda.

Naminsan, iti panagsarita maipapan kadagiti paspasamak iti lubong ken ti padto, kinunak: “Uliteg a Jimmy, saan aya a nakaskasdaaw? Din agbayag addanto ditoyen ti panungpalan daytoy a sistema dagiti bambanag a sinarita ni Jesus. Mabiiten ti pannakaipadayagmo kas maysa nga ari ken padi kadagiti langlangit, ket agpatingganton dagiti amin a panagsagabam.”

Awan a pulos ti panagkedked, sipaprangka a simmungbat: “Saan a dayta ti napateg a banag.” Ket buyogen ti naisangsangayan a panangipaganetget, impaganetgetna: “Maitan-okto ti nagan ni Jehova!” Nakaluakami babaen iti nadiosan a panangmatmatna. Isut’ nagsagaban iti kasta unay iti isuamin a panagbiagna, kaskasdi ti kadadakkelan a tarigagayna isu ti pannakaidayaw ti nagan ni Jehova imbes a ti pannakaibanag ti personal a pannakabang-arna.

Ti Maabrasa a Panagbalbaliw

Idi 1978 dagiti empleado ti nursing home idiay siudad ti Nueva York nagwelgada, isu a nangpilit iti pannakaiyakar dagiti pasiente kadagiti ospital. Ti estado pulos a dina pinalubosan ti pannakalukat manen dagiti daanen a nursing home. Gapuna ni Jimmy ket adda itan iti nasaysayaat a pagtaengan iti maysa a paset ti siudad nga asideg iti baybay. Amin dagiti nars ti mangay-ayat kenkuana ken mangay-aywan a naimbag kenkuana. Dagiti ngay naespirituan a kasapulanna?

Dagiti miembro iti lokal a kongregasion dagiti Saksi ni Jehova ti mangip-ipanen ken Uliteg a Jimmy kadagiti gimong ken dagiti asamblea. Isut’ agiwaras iti nasurok a sangagasut a magasin iti makabulan, kaaduanna idiay nursing home. Nupay kasta, dagiti Saksi ti mangala met kenkuana iti ministerio kadagiti ruruangan iti wheelchairna. Sumagmamano a daras dagiti naespirituan a kakabsatna a lallaki ken babbai ti mangipan kenkuana a sumarungkar ken ni Barbara ken siak idiay Watchtower Farms iti makin-amianan a paset ti Nueva York, a sadiay ti nagnaedanmin iti napalabas a sangapulo a tawen.

Kuna ni Uliteg a Jimmy a ti kongregasion ket “nakaskasdaaw, tunggal maysa ti mangay-ayat kaniak.” Pudno dayta. Pudno a dagitoy ti mangay-ayat ken mangay-aywan kenkuana. Ti presiding overseer, ni Joseph Bowers, kunaenna: “Diak pay pulos nangnangngeg dagiti kakabsat a nagreklamo maipapan iti panangaywan kenkuana.” Kalpasanna, buyogen iti pudno a rikna iti timekna, innayonna pay: “Ti biagko napabaknang babaen ti pannakaam-ammok kenkuana.”

Nupay no kadagiti dadduma a pakaibatayan ni Jimmy ket saan unay a nakaadal, isut’ naipamaysa a naimbag a silalawag iti kamudianan nga isyu​—ti pannakaitan-ok ni Jehova kas ti Kangatuan a Soberano iti Uniberso. Daytoy ti kangrunaan iti panunotna. Maragsakan ta sibibiag, isut’ siraragsak nga agserserbi ken Jehova, a naan-anay a mabigbigna a babaen iti simamatalek a wagas ti panagbiagna pampaneknekanna nga ulbod ni Satanas ken makiramraman iti ammona a kapapatgan a trabaho iti amin, ti ministerio iti Pagarian.​—Kas insalaysay ni Albert Caccarile.