Dagiti Milagro ken Aparision​—Apay Saan a Kasapulan

IDI adda ditoy daga, nagaramid ni Jesus kadagiti adu a milagro. Pinagbalinna nga arak ti danum, nangipaay iti taraon kadagiti bunggoy dagiti tattao, nangagas kadagiti sakit, ken nangparuar kadagiti demonio. Ti sursuro ni Jesus ken ti kinapudno a tinungpalna dagiti padpadto ti Biblia maipapan iti Mesias ti nangkumbinsir kadagiti adu a kapatadanna. Dadduma ti nagrason a kas iti sumaganad: “Inton umay ti Kristo, agaramidto ngata ti ad-adda a pagilasinan ngem kadagiti inaramid daytoy a tao [ni Jesus]?”​—Juan 7:31.

Ti Panggep dagiti Milagro

Ania ti panggep dagiti milagro nga inaramid ni Jesus? Ilawlawag ti Biblia a ni Jesus ket agbalin a ‘maysa a mammadto a kas ken ni Moises.” (Deuteronomio 18:15, 18) Inted ni Jehova a Dios ken ni Moises ti pannakabalin a mangaramid kadagiti dadduma a milagro tapno paneknekan nga isut’ pangulo a napili a mangwayawaya kadagiti Israelitas manipud iti pannakakayaw idiay Egipto. (Exodo 4:1-9, 30, 31) ‘Kas ken ni Moises,’ nagaramid ni Jesus kadagiti milagro a mangilasin kenkuana a kas ti Mesias, kas ti naikari a Manangwayawaya kadagiti Judio.​—Aramid 3:22.

Ngem dagiti milagro pinaneknekanda met nga isut’ nakaawat iti naisangsangayan a pannakabalin manipud iti Dios. Inton ti Pagarian ti Dios agturayen a di mabusbusor ditoy daga, usarenton ni Jesus ti naan-anay a pannakabalinna nga impakitana iti bassit a pamay-an idi adda ditoy daga. Tapno iyilustrar, alaentayo ti milagro dagiti tinapay ken ikan. (Lucas 9:12-17) Iti baro a lubong ti Dios, kitaento ni Jesus a ti isuamin a sangatauan addaanda ti umdas a kanen. (Salmo 72:16) Isu agasanna met dagiti amin a saksakit ken an-anayen, ket iti kasta dagiti natulnog a tattao makapagbiagdanto iti agnanayon. (Apocalipsis 21:4) Babaen ti panangaramid kadagiti tallo a nailanad a panagungar, pinaneknekanna ti abilidadna a mangpagungar kadagiti minilion manipud kadagiti natay.​—Lucas 7:11-17; 8:40-56; Juan 5:28, 29; 11:11-44.

Pamay-an a Pakailasinan

Ti sabali pay a rason no apay a nagaramid ni Jehova kadagiti milagro a maigapu iti Israel isu ti panangpaneknek nga awan ti aniaman a panagduadua nga isuda ti pinilina a tattaona. (Deuteronomio 4:32-34) Dagiti magunggonaan isu ti intero nga ili, saan a ti sumagmamano nga indibidual.

Umasping iti dayta, dagiti umuna-siglo a milagro isuda dagiti pammaneknek a ni Jehova inyalisna ti paborna manipud iti nainlasagan nga Israel nga agturong iti immuna a kongregasion Kristiano. (Mateo 21:43; 27:51; Roma 9:6; 11:7) Dagiti adu a milagro nga inaramid dagiti apostoles ket pammaneknek iti pananganamong ti Dios iti kongregasion nga indauluan ti Anak ti Dios, ni Jesu-Kristo.​—Aramid 2:22, 43; 4:29, 30; Hebreo 2:3, 4.

Kasta met, kadagidiay nga al-aldaw, dagiti tattao ipaiddada dagiti masakit kadagiti lugar a sadiay ti laeng anniniwan ni Pedro ti manglinong kadakuada, ket kunaen ti Biblia a dagidiay a naiyeg kenkuana “isuda amin naagasanda.” (Aramid 5:15, 16) Apay, ngarud, nga amin dagidiay mapan kadagiti templo itatta a buyogen iti pammati ket saanda a maagasan?

Dagiti Aparision Saan a Kasapulan

Ti kangrunaan a rason a ta dagiti pagilasinan ken milagro ket saanen a kasapulan a mangpaneknek a ti Dios inyakarnan ti paborna manipud iti nainlasagan nga Israel a nagturong iti pudno a kongregasion Kristiano. Iti suratna kadagiti Kristiano a kakaduana, ni apostol Pablo nalawag ti panangilawlawagna a dagiti namilagruan a sagsagut ket mapukawto kamaudiananna. Umayto ti tiempo inton dagitoy saanton nga isu ti pamay-an iti panangilasin kadagiti Kristiano.​—1 Corinto 13:8-13.

Uray pay iti panangawag iti nagan ni Jesus saannanto a paneknekan a ti maysa a tao ket pudno a Kristiano. Iti Sermonna iti Bantay, impadto ni Jesus a dinanto awaten dagiti dadduma nga agkunkuna: “Apo, Apo, saan kadi . . . nagaramidkami kadagiti adu a milagro iti naganmo?” Maipaay iti ania a rason a dinto awaten ni Jesus dagitoy a managaramid kadagiti milagro? Isut’ sumungbat: “Dikay am-ammo; umadayokayo kaniak, dakayo nga agar-aramid ti kinadakes!” Nalawag ngarud, dadduma ti agaramid kadagiti milagro iti nagan ni Kristo, ngem iti kinapudnona dagitoy ket mananglimlimo.​—Mateo 7:22, 23, The Jerusalem Bible.

Ti Pudpudno a Pagalagadan

Gapu iti naibagan nga immun-una, kasano a posible nga ilasin dagiti pudno a Kristiano itatta? Nangipaay ni Jesus iti pagalagadan idi kinunana: “Ti nasayaat a kayo saanna a mabalin ti mangted bungbunga a dakes . . . Iti kasta, mailasinyonto dagidiay a tattao kadagiti bungbungada.” Iti aldaw sakbay ti ipapatayna, pinalagipan ni Jesus dagiti apostolesna: “Gapu itoy mailasindanto a dakayo ti adalak, no adda ayatyo iti maysa ken maysa.” Ngarud ti panangaramid kadagiti milagro saan nga isu ti pagalagadan nga agnanayon. Ngem masapul a ti isuamin paneknekanda ti bagbagida nga ad-adalan ni Kristo babaen iti pudno nga ayatda.​—Mateo 7:18-20; Juan 13:34, 35.

Gapuna ti kadi pammatiyo masapul a naisaad, uray iti bassit laeng, kadagiti “milagro” a maar-aramid itatta iti nagan ni Kristo? Wenno dayta kadi ti maisaad nga interamente iti kinapudno iti Sao ti Dios, ti Biblia? Nasken ti panangusig iti lawag ti Sao ti Dios ti kababalin dagidiay nga agkunkuna nga ad-adipen ti Dios.

Iti aglawlaw ti lubong itatta, siasino dagiti mangiwarwaragawag iti Sao ti Dios ken mangikagkagumaan nga agbiag a maitunos iti dayta? Siasino dagiti nalatak iti sangalubongan gapu iti panagkaykaysada? Siasino dagiti awanan iti lapped a nasional, napolitikaan, lapped iti rasa, wenno lapped iti relihion iti nagtetengngaanda? Siasino dagiti sireregta a mangikaskasaba ti naimbag a damag ti Pagarian ti Dios? No kas maysa a napasmek a tao addaankayo ti ad-adu pay a salsaludsod, dagiti Saksi ni Jehova maragsakandanto a mangipaay kadakayo kadagiti kinapudno a kasapulanyo tapno maikeddengyo dayta a mismo. Pangngaasiyo ta siwayawayakayo laeng koma a makiuman kadagiti Saksi iti sangakaarrubaanyo wenno idiay lokal a Kingdom Hall da. Tulongandakayonto a mangikabil iti panagtalekyo ken ni Jehova ken ni Jesu-Kristo, ti Anakna, ta “awan ti sabali a pakaisalakanan.”​—Aramid 4:12.

[Ladawan iti panid 10]

Dagiti milagro iti panangagas saanen a kasapulan iti panangilasin iti pudno a kongregasion Kristiano