Manipud Managbasatayo

Panagsina Naaddaanak ti parikut no itultuloyko ti addaan pagkapuyan a pannakiinnarem idi nabasak ti artikuloyo. (“Masapul Aya nga Agsinakami?” Hulio 22, 1988) Daytat’ balakad a naipaay iti umiso a tiempo. Mariknak a kasla naikkat ti nadagsen nga awitko. Ammokon ti sapulek ken no ania ti aramidek bayat ti pannakiinnarem. Diak pay nakasarak ti aniaman nga organisasion a mangpampanunot kadagiti agtutubona a kas kadakayo. Itultuloyyo dayta.

E. E., Ghana

Maria Nabiit pay ti Agriingkayo! addaan iti artikulo maipapan ken Maria (Nobiembre 8, 1988) ket tinagibassitna ti panangipategmi kenkuana. Kablaawanmi ni Maria a kas ti panangkablaaw ni Gabriel. Awaganmi a ‘bendita’ ken ‘Ina’ kas iti Kasuratan. Maragsakankami ken tarigagayanmi nga agtalinaed a kasta.

M. P. M., Brazil

Kaawatan, ti tema maipapan ken Maria ket nasinged unay iti puso dagiti Katoliko, ket umanamongkami nga impatpateg unay ti Dios ni Maria. Nupay kasta, impakita ti artikulomi a saan a suportaran ti Biblia dagiti adu a tradision a timmaud maipapan kenkuana, kas ti Immakulada Konsepsion, ti Asunción, wenno ti panangibabaetna. (Levitico 12:6-8; Lucas 2:22-24; 1 Corinto 15:50; 1 Timoteo 2:5) Ti isyu a sangsanguen, ngarud, dagiti Kristiano ket saan a ti panagdayawda iti pamay-an a kayatda no di ket no ‘agdaydayawda iti kinapudno.’ (Juan 4:23)​—ED.

Di Panagbiddut ti Papa Nakigtotak iti bilangyo a Pebrero 8, 1989. (“Saan Aya nga Agbiddut dagiti Papa?”) Kasta unay ti panamatik nga amin a pudno a managayat iti Dios ipategda koma ti nagpapadaanda ken ikagumaanda ti agkaykaysa. Ngem daytoy ket nakaro a panangatake, awan nakaibatayanna, nakapuy ti pannakaaramidna, ken kurang ti pannakasirarakna. Ania ti puntoyo?

E. S., Estados Unidos

Kaaduanna, basta ipadamagmi laeng ti ibagbaga met laeng dagiti Katoliko maipapan iti doktrina a saan a panagbiddut ti papa. Kinapudnona, dagiti artikulo ket ngangngani interamente a naibatay kadagiti gubuayan a Katoliko, nga adu kadakuada ti addaan iti pammalubos ti Iglesia Katolika. Kasta met inkagumaanmi a tulongan dagiti managbasami a mangsukimat itoy a doktrina sigun iti lawag dagiti Kasuratan. Ti kasta a napudno a panangusig kadagiti narelihiusuan a pammati, nupay nalabit makapasakit, ket napateg unay iti asinoman a napasnek nga agsapsapul iti kinapudno.​—ED.

Hurricane Gilbert Naammuak ti naisangsangayan nga impresion iti artikuloyo (Marso 22, 1989) a dagiti tulong a naipatulod ket para laeng kadagiti Saksi iti dayta a lugar iti Mexico. Dagiti met ngay kaarruba a saan a Saksi? Adda met ti pamay-an ti ‘panagpalangguad’ idi imbaga ti artikulo no kasano a ‘dagiti kaarruba naawisda’ babaen iti panangikagumaanyo a tumulong.

C. T., Estados Unidos

Pulos a saan a di ikankano dagiti Saksi ni Jehova ti kasasaad dagiti dadduma no mapasamak ti didigra. Dagiti napalabas nga artikulo impakitada no kasano a situtulok dagiti Saksi ni Jehova a tumulong kadagiti kaarrubada bayat dagita a tiempo. Kitaenyo, kas pangarigan, ti artikulo a napauluan “The Levee Has Broken!” (Oktubre 8, 1986 nga “Awake!”) Iti kasta ikagkagumaanmi ti “agaramid iti naimbag kadagiti amin, ngem nangnangruna kadagidiay kabbalay iti pammati.” (Galacia 6:10) Nupay no ti motibomi ket saan a tapno allukoyen dagiti dadduma, dagita a naimbag nga aramid masansan a tignayenna dagiti managpaliiw a mangipaay iti komendasion. (1 Pedro 2:12)​—ED.

Addaan Lapped Inapresiarko unay ti artikuloyo nga “Addaan Lapped Ngem Naballigi.” (Oktubre 22, 1988) Agsipud ta addaanak iti cerebral palsy, no dadduma tratuendak dagiti tattao a kasla awan ti maaramidak. Kunada: ‘Dika maaramid daytoy. Adtoy, palubosannak a tumulong kenka!’ kas ti intudo ti artikuloyo. Makitak, nupay kasta, a no padasek, kabaelak!

C. S., Estados Unidos