Dagiti Aya Cassette a Panghipnotismo ti Solusion?

Dikay kadi makaturog?

Nalukmegkay kadi unay? Parparmekenyo kadi dagiti dakes a kababalin? No wen, daydiay la cassette recorder yo ti kasapulanyo, kuna dagiti agar-aramid iti cassette a panghipnotismo iti bagi.

Maysa a bangir ti cassette naglaon iti bersion para iti aldaw ket ti bangirna para iti rabii. Ti para aldaw naglaon iti musika a naputar para iti dayta problemayo ket masapul a naynayyo a patokaren, kuna dagiti makimprodukto, uray no diyo maisentro ti agdengngeg. Rantana nga isagana ti isipyo iti mensahe para iti bersion a pangrabii.

Ti para rabii, kas naisingasing, mapatokar koma no nakarelakskayo, nasaysayaat no daytay makaturturogkayon. Kalpasan ti sumagmamano a minuto, ti timek ti hipnotista ilibaynakayon tapno nargaan ti turogyo. Saan a pulos a maturog ti subconscious mind (puotyo), sigun iti adbertismen, gapuna awatenna dagiti mensahena uray no nakaridepkayo.

Nupay kasta, insurat ni Alan Baddeley, a direktor ti British Medical Research Council’s Applied Psychology Unit idiay Cambridge, Inglatera, a limitado laeng ti magapuanan ti puotyo. Kunana a pinasingkedan dagiti pannubok a di epektibo dagitoy makunkuna a pannursuro bayat iti pannaturog. Ti konklusionna: “Agparang a no kayatyo ngarud ti makasursuro, maibalakad a siririingkayo iti dayta a tiempo.”

Nasnasken pay a paset nga amirisenyo isut’ pannakainaig dagita a cassette iti hipnotismo. Delikado ti panangitulokyo iti isip ken nakemyo iti sabali a tao, nga iti daytoy a kaso isu daydiay hipnotista. Ti solusion a pangparmek iti pagkapuyanyo saan nga agpannuray iti panangipalubosyo iti isip a maniobraen ti musika ken dagiti timek ti tattao a di makita. Ti solusion agpannuray iti pananggun-odyo iti umiso a pannakaamo iti Saot’ Dios sayonto suroten ti panangiturong ti nasantuan nga espiritu. (Roma 12:2; Efeso 4:22-24) Kangrunaan amin, itdennanto ti namnama ti agnanayon a biag idiay awanan problema a baro a sistema dagiti banag ti Dios nga asidegen.​—Apocalipsis 21:3-5.