Manipud Managbasatayo

Panagsugal Naigamerak iti panagsugal idi agtawenak iti 23. Daytat’ namagbalin a nakaay-ay-ay ti panagbiagko iti adu a tawtawen. Kasla awan ti makabael a mamagsardeng kaniak. Nupay kasta naiparna a nabasak ti magasinyo. (Setiembre 8, 1987) Daytat’ nangtulong kaniak a mangisardeng iti nakarugrugit nga ugali. Agyamanak kadakayo.

T. M. E., Zambia

Preemies Addaak laeng iti pagtaengan, a mangay-aywan ken nanangko, a nagsagaba iti istrok iti nabiit pay. Gapuna, bassit laeng ti maar-aramidak iti panangasaba iti balaybalay. Nupay kasta, inramanko ti Pebrero 22, 1989, a bilang iti maysa a bumisbisita a nars. Isut’ nagyaman iti kasta unay iti dayta. Isut’ agtartrabaho iti pagaywanan kadagiti maladaga ket inramanna dagiti artikulo iti tallo kadagiti uppat a katrabahuanna. Kasta unay ti panangtagiragsakda amin kadakuada. Maysa kadakuada ti nagkuna, “Dagitoy ti dadduma kadagiti parikut a sangsanguentayo, ngem diak pay nakita ida a naiprenta idi.”

V. G., Estados Unidos

Panagrayo iti Kasekso Maysaak a 14-años ket mariknak ti bagik nga agrayo iti kaseksok. Pampanunotek ti bagik a naan-anay a saan a normal ket awanen ti sabali a kasta ti parikutna. Ti artikulo (Abril 8, 1989) tinulongannak a makakita a dadduma nga agtutubo ket kasta met ti kasasaadda ket intudona dagiti addang nga alaen tapno maliklikan ti homoseksualidad.

H. M., Austria

Idi agtawenak iti walo wenno siam, nakilinnailoak iti kasingedan a gayyemko. Idi pagarupek a saan a makadangran dayta. Ngem idi agmatmataenganakon, nakitak a kasta unay a biddut ken nakababain dayta, ket mariknak a nakabasolak. Agyamanak ta daytoy a tema ket naisalaysay. Nakatulong ti pannakaammo a ni “Jehova mamakawan iti dakkel unay” a mangbang-ar iti adu unay a nabayagen a biddut. Itultuloyko ti mangsalimetmet iti panagteppel.

E. G., Estados Unidos

AIDS Iti Marso 8, 1989, a bilang, nangipablaakkayo iti maysa a surat manipud iti maysa a managbasa a mangisingsingasing a mabalin a “mangiyakar ti lamok iti AIDS.” Ti komentoyo iti editorial dina nagduaduaan daytoy a sasao. Nupay kasta, maysa a broshur a nasaknap nga inwaras ti siruhano heneral iti E.U. kunaenna, “Dikay makaala iti AIDS manipud iti kagat ti lamok . . . wenno kagat dagiti dadduma nga insekto.” Dadduma a managbasa iti dayta a bilang iti Agriingkayo! ngarud ti mabalin nga agamaken kadagiti lamok a kas managawit iti AIDS.

P. G., Estados Unidos

Kaaduan a managsirarak a maipaay iti AIDS umanamongda a posible a mangbiag ti maysa a virus ti maysa a lamok babaen ti panangsisipna ti dara manipud iti naimpektaran a biktima. Nupay kasta, awan ti pammaneknek nga umadu ti virus ti AIDS iti uneg ti insekto, a kas iti “yellow fever” ken kadagiti dadduma a virus. Gapuna, ti lamok kasla dina maiyakar ti AIDS. Nupay kasta, dayta a banag ket saan pay a naan-anay a napaneknekan kas impamatmat ti maysa a report iti magasin a “Science” (July 1987), isu a nagimtuod: “Maiyakar kadi dagiti insekto ti virus ti AIDS? Kasla saan ti sungbat ngem saan nga interamente a saan. Kasla agduadua pay laeng dagti sientista a mabalin. Ngem ipilitda a no ti panangiyakar ti insekto ti maysa a mangisaknap iti AIDS, bassit laeng dayta.”​—ED.

Panagliday Agedadakon iti 20-años, ket kayatko laeng ti agyaman kadagiti artikuloyo. (Oktubre 22, 1987) Nalasatak dagiti naririkut a tiempo, ket dagiti artikulo adut’ naitulongda kaniak.

C. W., Estados Unidos

Panaginnarem Ti artikuloyo (Pebrero 22, 1989) impasagepsepna iti isipko ti kinaserioso ken ti rebbengen iti pannakiinnarem. Agar-aremakon, ket inanamaek a daytat’ agtungpalto iti naballigi a panagasawa.

G. V., Mexico