Maibaga ti Buokyo

TI GAGANGAY a pamay-an iti panangsukimat no maus-usar ti droga isut’ panangsukimat iti isbo. Ngem nabiit pay ti National Institute of Justice, maysa a sanga ti panagsirarak iti U.S. Justice Department, ginastuanna ti maysa a panagadal a mabalin a mangusar iti panangsukimat iti buok tapno ikeddeng no ti maysa a tao agus-usar iti droga. Nupay no kaaduanna patien dagiti sientista a kasapulan ti ad-adu pay a panagsirarak sakbay ti panagpannuray iti sample ti buok a mangikeddeng iti panagusar iti droga, ti pamay-an ket nalawag a makagunggona.

Dagiti droga a kas iti cocaine ken heroin, kas pangarigan, saan a masarakan iti isbo uray pay kalpasan ti sumagmamano nga aldaw a panagusar. Ngem dagitoy a droga agparangda iti panangsukimat iti buok kalpasan ti adu a bulbulan. Ti makagapu itoy ket dagiti arinsaed agtalinaedda a maimula iti buok bayat a nga umatiddog ti buok. Ni Bernard Gropper iti National Institute of Justice napaliiwna: “Ti buok napaut ti memoriana. Ti permanente a rekord, kas kadagiti singsing ti kayo.” Ti walo centimetro a linabag ti buok mangipaay iti innem a bulan a historia, ta ti buok ti ulo umatiddog iti agarup 1 a centimetro iti makabulan.

Ti sabali pay a pagimbaganna ket dagiti tattao dida makalisi iti pannakadlaw iti droga iti panangsukimat iti buokda a kas ti kinalaka ti pannakalisi iti panangsukimat iti isbo. Ti pananginum iti adu a danum sakbay nga ited ti sample ti isbo, kas pangarigan, mabalin a baliwanna ti resulta ti panangsubok iti panagusar iti droga. Ngem ti panangsukimat iti buok naiduma. Kinapudnona ti sumagmamano a linabag iti buok a makuna a naggapu iti ulo ti Briton a bumiberso a ni John Keats impalgakna nga isut’ nagusar iti adu nga opium idi arinunosen ti panagbiagna. Dayta isingasingna a ti droga ket nausar a pagagas, ta ni Keats ket matmatayen iti tesis.