Agimtuod Dagiti Agtutubo . . .

Sisasaganaakon Aya a Mabautisaran?

Patgek a Watchtower Society:

Ti naganko ket Sharon ket 13 ti edadko. Pampanotek no sisasaganaakon a mabautisaran. Pagarupek a sisasaganaakon, ngem diak pay sigurado. Siguradoaak a daytoy ket pampanunoten met dagiti agtutubo a Kristiano. Mabalin kadi a mangisuratkayo iti artikulo a makatulong kaniak a maaddaan iti umiso a pannakaawat?

UMISO ni Sharon. Pudno a pampanunoten dagiti adu a managbuteng-Dios nga agtutubo ti bautismo. Kadagiti Saksi ni Jehova, mabigbig dagiti agtutubo a masapul a mangaramidda iti bukodda a pangngeddeng nga agserbi iti Dios, a saan a mabalin nga aramiden dagiti dadakkelda ti pangngeddeng a maipaay kadakuada. Apresiarenda met a ni Jesu-Kristo imbilinna kadagiti pasurotna nga isimboloda ti dedikasionda iti Dios babaen iti panagbautisar iti danum.—Mateo 28:19, 20.

Ti panangipaduyakyak kas maysa a dedikado nga adipen ti Dios ket maysa a dakkel a responsabilidad. Pudno a dikay tarigagayan ti agapura iti dayta tapno ay-ayuenyo laeng dagiti gagayyem ken dadakkelyo. Kasta met, awan koma ti mangpilit kadakayo nga agbautisar. (Salmo 110:3) Nupay kasta, pudno a binalakadan ni Jesus dagiti amin a “kuentaenda ti gastos” iti panagbalin nga adalan. (Lucas 14:28) Daytoy dina kayat a sawen a masapul a tingitingenyo no kayatyo ti agbalin nga adalan wenno saan. Nalawag, daytoy ti umiso nga aramiden. Nupay kasta, masapul a naan-anay nga ammoyo no ania ti nairaman iti panagbalin a Saksi ni Jehova.a Sumaganad, masapul nga ikeddengyo no pudno a sisasaganakayon a mangibaklay itoy a responsabilidad.—Idiligyo ti Proverbio 20:25.

‘Nataenganakon Aya?’

Bayat ti panagmataengan dagiti tin-edyer, masansan a mariknada nga addaandat’ kalintegan a mangtagiragsak kadagiti dadduma a pribilehio ken responsabilidad. Dagus nga ipapilitda ti panagmaneho iti kotse ti pamilia, dawatenda ti pammalubos a maaddaan iti trabaho kalpasan ti panageskuela, tarigagayanda ti mangbusbos iti bukodda a kuarta. Ngem no maipapan iti bautismo, adu nga agtutubo ti mangilaksid iti bagbagida kas ubbing pay unay wenno saan a sisasagana a maipaay iti dayta a responsabilidad. Napaliiw ti maysa nga agtutubo a managan Andre: “Adu nga agtutubo ti aguray aginggat’ makagtengda iti 17 wenno 18 tapno agpabautisarda, a daytat’ nataengan bassiten.” Apay? “Agsipud ta mabayag pay sakbay dayta nataengandan a mangaramid kadagiti dadduma a pangngeddeng a maipaay kadagiti bagbagida met laeng.”

Wen, ti basta kinapudno a tin-edyerkayo pay ket saan a pambar nga ‘agalla-alla iti dua a panunot,’ wenno nainkalintegan a rason iti panagkedked a mangaramid iti takder kas maysa a Kristiano. (1 Ar-ari 18:21) “Lagipem met ti Naindaklan a Namarsua kenka kadagiti aldaw ti kinaagtutubom,” mamalakad ti Biblia. (Eclesiastes 12:1) Ni mammadto a Samuel ket maysa a nagserbi ken Jehova iti nakaub-ubing nga edad. (1 Samuel 3:1-18; 12:2) Mabalin met a kunaen ni salmista David: “Ta sika ti inanamak, O Soberano nga Apo Jehova, pagtalkak manipud kinaubingko.”—Salmo 71:5.

Umasping iti dayta, rinibo a Kristiano nga agtutubo itatta—agraman dagiti dadduma a di pay tin-edyer—ti nangpaneknek kadagiti bagbagida a mapagtalkanen a mangaramid iti dedikasion nga agserbi iti Dios. Ipapantayon, dadduma a tin-edyer ti saan a serioso ken saan a mapagtalkan ken saan a nataengan iti emosion tapno mangaramid iti adut’ ramanenna a pangngeddeng a kas ti bautismo. (Proverbio 22:15) Ngem pudno kadi daytoy iti kasoyo? (Awan duadua nga adut’ maibaga dagiti dadakkelyo maipapan iti daytoy a banag.) Saan nga inanamaen ti Dios ti maysa a tin-edyer nga agmataengan a kas iti 40-años. Pagaammona a nalakakay a maawis “iti tarigagay nga inuubingan.” (2 Timoteo 2:22) Ngem no nataengankayo bassiten nga agbalin a serioso ken mapagtalkan, ngarud nataengankayon a mangpanunot iti panangaramid iti dedikasion. Nupay kasta, addada dagiti saludsod a masapul nga imtuodenyo iti bagiyo met laeng.

‘Nagun-odakon Aya ti Umdas a Pannakaammo?’

Ti libro nga The Adolescent, ni F. Philip Rice, kunaenna a ti narabaw, kurang a panamati iti relihion ket masansan a saanto a makapagtakder iti sidong ti pannakabusor ken pannakasubok.” Kaskasdi, kuna ni Mr. Rice: “Addada mangipamatmat a dagiti agtutubo itatta ket nakaay-ay-ay ti saanda a pannakaammo. Maysa a panagadal iti pannakaammo dagiti Protestante ken Judio nga estudiante a sophomore ipalgakna ti pudno a kinaignoranteda iti Daan ken Baro a Tulag.”

Saan koma a pudno daytoy iti maysa nga agbautisar. Ti maysa masapul nga umuna a ‘gun-odenna ti pannakaammo’ tapno agbalin a maysa nga adalan, wenno nasursuruan. (Juan 17:3; Mateo 28:19) Gapuna saan kadi a nainkalintegan nga inanamaen a sakbay ti panagbautisar, siempre ammoyo “dagiti pamunganayan a sursuruen kadagiti sasao ti Dios”? (Hebreo 5:12) Dayta mabalin nga iramanna ti panangammo no ania ti isuro ti Biblia maipapan kadagiti bambanag a kas ti kararua, ti kasasaad ti natay, ti pannakasantifikar iti nagan ti Dios, ti Pagarian, ken ti subbot.

Pudno, adda ammom maipapan iti Biblia gapu ta kimmuykuyogka kadagiti dadaklelmo kadagiti Nakristianuan a gimgimong. Ngem ti pannakaammo a nagun-odan iti kasta a pamay-an mabalin a narabaw ket saan a “makapagtakder iti sidong ti pannakabusor ken pannakasubok.” Masapul a kabaelam ti mangipaay kadagiti dadduma iti “gapu iti inanama nga adda kadakayo.”—1 Pedro 3:15.

Kuna ni Terry nga isut’ mamati kadagiti kinapudno iti Biblia. Kaskasdi ipudnona: “Diak pay pulos napnek ti bagik babaen ti panagsaludsodko ket kalpasanna sinungbatak ida. Nabiit pay, rinugiak nga inaramid daytoy.” Ania ti resulta ti kasta a programa iti panagadal ti Biblia? “Bumilbileg ti pammatik ket kabaelakon ti makisarita kadagiti tattao a buyogen iti pudno a panamati. Ibagak kadagiti amin nga agtutubo a Saksi a saanda nga agamak a mangimtuod iti bagida no daytoy ti kinapudno. Ammuenyo! Agsukimat, agadal. ‘Siguraduenyo dagiti amin a bambanag.’ Kalpasanna kabaelanyonton nga idedikar ti bagiyo a naimpusuan ken ni Jehova.”—1 Tesalonica 5:21.

“Managtungpal iti Sao”

Masapul, nupay kasta, a “managtungpaltay iti sao, a saan laeng a managdengngeg.” (Santiago 1:22) Dikay maiparang ti bagiyo a maipaay iti bautismo ket ‘ilinged ti kinataoyo’ babaen ti panangilemmeng kadagiti nakaro a biddut. (Salmo 26:4) Dagita a biddut iramanna ti seksual nga imoralidad, panagbartek, panangabuso ti droga, wenno dagiti basol a nadakamat idiay 1 Corinto 6:9, 10. No naaddaankay ti parikut kadagitoy, apay a dikay iyurnos ti pannakisarita a kaduayo dagiti dadakkelyo kadagiti dadduma a Kristiano a panglakayen? Manginanamakayo a maipaay ti naasi a tulong kadakayo.—Santiago 5:14, 15.

Mabalin met a kasapulan dagiti panagbalbaliw iti pannakilangenyo kadagiti dadakkelyo wenno ti panangmatmatyo iti balakad nga aggapu kadagiti Kristiano a panglakayen, uray pay iti panangpili kadagiti gagayyem. (Proverbio 6:20; 13:20; 1 Corinto 15:33; Hebreo 13:17) Mabalin a saan a nalaka ti mangaramid iti kasta a panagbalbaliw, ngem ipalagip ti Proverbio 11:19 kadatayo: “Ti sitatalinaed iti kinalinteg makagtengto iti biag, ngem ti mangsurot iti dakes aramidenna ti pakatayanna met laeng.”

Sapulen kadi ni Jehova nga agbalinkayo a perpekto? Nikaanoman. “Siasino ti makaibaga: ‘Dinalusakon ti pusok; sidadalusak iti basolko’?” iyimtuod ti Proverbio 20:9. Gapu ta imperpekto, agbiddutay pay laeng. Ngem gapu iti subbot ni Kristo, makapagtalinaedtayo iti nasayaat a takder iti Dios. (1 Juan 2:1, 2) Kas pangarigan, maysa nga agtutubo a makidangdangadang iti dakes nga ugali, kas iti narugit nga aramid a masturbesion, dina koma marikna nga isu saan a kualipikado a maipaay iti bautismo.b Kinapudnona, babaen iti sigaganetget a panagkedkedna iti kinakillo, maparagsak ti maysa ti puso ni Jehova!—Proverbio 27:11.

‘Pinagbalinko Aya a Gayyemko ti Dios?’

Ngem, nalabit ti nasken unay a saludsod, ramanenna ti relasionyo iti Dios. Laglagipenyo: Idedikaryo ti bagiyo, saan nga iti trabaho wenno iti maysa a panggep, wenno uray pay iti maysa nga organisasion, no di ket iti Dios a mismo. Kasla arapaap aya, adayo ti Dios? Wenno naam-ammoyo ken inayatyo kas maysa a Persona? (Exodo 34:6, 7) No kasta, masarakanyonto ti bagiyo a masansan a makisarsarita kenkuana, saan a mekanikal, no di ket manipud iti puso.—Salmo 62:8.

Masarakanyonto ti bagiyo a pudno a mapilit a mangisarita kadagiti dadduma maipapan iti Dios. (Idiligyo iti 2 Corinto 5:14.) Kuna ti Proverbio 15:7: “Dagiti bibig ti masirib agiwaras ti pannakaammo.” Ar-aramidenyo kadi ti kasta babaen ti kankanayon a panangasaba kadagiti dadduma? Wenno ipalpalubosyo kadi ti panagwatwat, panaglinglingay, wenno uray pay ti kinasadut a mangtuben kadakayo a tumulong kadagiti dadduma a mangammo iti Dios?—Proverbio 19:24.

Wen, tapno napateg ti bautismo, ti Dios masapul nga isu ti kasingedan a gayyemyo. (Idiligyo iti Santiago 2:23.) No saan a kasta ti kasasaad itatta, saan a basol ti Dios, ta sigaganeget nga awisenna dagiti amin a mangsapul kenkuana. (Aramid 17:27) Ket babaen iti panagtultuloy nga agadal a personal, panagkararag, ken pannakilangen iti ilina, dumtengto ti tiempo a mariknayo a nasingsingedkayo iti Dios. (Roma 12:12; 1 Timoteo 4:15; Hebreo 10:24, 25) Ti bautismo ket gagangay laeng a resulta iti kasta a ‘kinasinged iti Dios.’—Santiago 4:8.

Usigenyo, kas pangarigan, ti maysa nga agtutubo a babai a managan Cindy. Isut’ nagsurat: “Idi agtawenak iti 14 nabautisaranak. Ammok no aniat’ banag ti panagkedked a mangaramid iti dayta. Ngem kayatko nga ibaga a daytat’ kasayaatan a banag nga aramidenyo. Panunotenyo laengen, ti pannakaammo nga inanamongannakayo ni Jehova ken ‘dinakanto panawan wenno dinakanto baybay-an’! (Hebreo 13:5) No addanto asinoman nga agsaludsod kaniak no isut’ masapul a mangidedikar iti bagina ken Jehova, ibagakto ti wen! Ngem dikay ar-aramiden dayta tapno ay-ayuen laeng ti maysa a tao. Aramidenyo dayta gaput’ kayatyo dayta.”

[Dagiti Footnote]

[Ladawan iti panid 16]

Adut’ agtutubo a makakualipikar iti bautismo. Kualipikadokayo kadi?