Apay Asul ti Langit?

Naabbungotan ti sipnget dagiti nalawa a luglugar iti law-ang. Ti awagantay a langit isut’ atmospera a nanglikmut iti daga, ti lugar iti law-ang a makita ti mata ti tao. No tumangadtay itoy naglawaan a law-ang, ti langit, adut’ agpanunot, ‘Apay asul ti langit?’ Apay a saan a violeta, berde, amarilio, kolor kahel, wenno nalabaga—dagiti kangrunaan a kolor iti panagkita?

Ti lawag ti init buklen dagiti nadumaduma a kaatiddog dagiti allon, isu a makita kas nagduduma a kolor iti panagkita. Ti kaatiddogan kadagitoy nga allon ti lawag isut’ nalabaga, ket ti kaababaan isut’ asul wenno violeta. Ti molekula ti gas iti atmosperatayo mangiwaras iti ad-adu nga ababa nga allon, ti asul, ngem ti atitiddog nga allon, ti nalabaga. Kas banagna, ti awan ulepna a langit asul ti kolorna. Ti angin a nanglikmut iti daga, nga addaan iti nakaad-adu a nagtutukel a bambanag, kas iti tapuk, mangiwaras iti lawag tapno agparang a, kasla isilnag ti sarming.

Iti kasumbangirna, no asidegen ti init iti horizon, ti silnag ti init ad-adayu ti lasatenna iti atmospera tapno makagteng iti mata, ket ti at-atiddog nga allon ad-adda a sumarot ngem ti ab-ababa, a mamagbalin iti langit a nasudi a kolor kahel ken nalabaga ti itsurana. Dagiti nagtutukel a bambanag iti angin pakaruenna ti kinalabagana. Kasta met, no mapno ti asuk ken napuskol ti ulep iti langit, amin a kolor ti allon ti lawag ket maiwaras. Daytoy ti mangiparang iti langit a kasla dapuen.

Daytoy a nakaskasdaaw a panangiparangarang iti panangusar ti Dios iti lawag iti atmosperiko a langlangit ipalagipna kadatayo dagiti sasao ti salmista: “Dagiti langlangit ipalawagda ti dayag ti Dios; ket ti law-ang ipakitana ti aramid ti imana.”—Salmo 19:1.