Ti Quebec Mangipakitat’ Panagraem iti Wayawaya
MAYSA a manangibrodkas iti radio idiay Montreal, Quebec, ti nagkuna iti nabiit pay iti pangrabii a damdamag a Dagiti Saksi ni Jehova nabayagen a marirriribuk iti dayta a probinsia ti Canada “agsipud ta naidumada.” Isu impamaysana ti padamagna iti nabiit pay a panangraut babaen iti radio, nga inaramid ni Yvon Picotte, ti ministro maipaay iti ar-aramid ti munisipio. Impadamag ti brodkaster a ni Picotte “inawaganna dagiti Saksi a ‘parasito iti kagimongan’ a, kadagiti adu a kaso, agbibiagda laeng babaen iti tulong. Gapuna, ininsulto ni Picotte saan laeng a dagiti Saksi ni Jehova no di ket siasinoman nga agpampannuray iti tulong ti kagimongan.”
Sinungbatan ti brodkaster ti pammabasol ni Picotte babaen ti panagkunana a ti kaadu dagiti Saksi nga agbibiag babaen iti tulong saan a nangatngato ngem kadagiti dadduma a relihion. “Ad-adda a maitutop nga awagan ni Mr. Picotte a ‘parasito’ ngem isuda,” kinunana. “Kinapudnona, panunotenyo laengen, adda dagiti mangikalkalintegan a ti pudno a parasito iti kagimongantayo isu dagiti politiko.”
“Ti nangsair kaniak nga aginteres iti nakakatkatawa a pananglais ni Picotte,” intuloy a kinuna ti brodkaster, “isu ti pasetna a ‘balandra’ wenno ‘déjà vu.’ Idi naladawen a ’40’s, ni Maurice Duplessis, ti autokratiko a premier iti Quebec ken ti nangtuding iti bagina a manangidepensa iti pammati a Romano Katoliko, inkabilna ti agarup 400 a Saksi ni Jehova iti pagbaludan, saan a gapu iti panangkiriringda kadagiti doorbell—isu a nabileg nga inlaksid ni Picotte—no di ket gapu kadagiti pammabasol a ‘sedision.’ Iti linteg sigun ken ni Duplessis, ti panangiwaras kadagiti relihiuso a polieto ket maysa nga aramid a sedision! Nakandaduan dagiti paggigimongan dagiti Saksi ket naisarangda kadagiti awan-asina a panangidadanes ti polis ti probinsia.”
Ti anunsio ni Duplessis idi 1946 a “Pananggubat kadagiti Saksi ni Jehova nga awan Asina” inatakar met ti prensa. Inyikkis met dagiti paulo dagiti damdamag: “Nagsubli ti Dark Ages Idiay Quebec,” “Nagsubli ti Inkisision,” ken “Ti Buyok iti Fascismo”!
Itatta, 50 a tawenen kalpasanna, kunan daytoy a brodkaster iti Montreal: “Nupay addaantay ti sumagmamano pay laeng a Neanderthal a politiko, saanen a mapalubosan ti nakadakdakes a panagsasaoda. Kinapudnona, ni Picotte, isu a dinaydayaw ni Duplessis, ket binilin ni Mr. Bourassa [ti agdama a premier iti Quebec] nga agpakawan gapu kadagiti sasaona iti National Assembly itatta. Naasian dagiti managayat iti sibil a wayawaya. Nabayagen a tiempo nanipud idi dagiti tattao iti daytoy a probinsia ket naibaludda gapu iti panangparang-ayda iti pammatida.”