Agimtuod Dagiti Agtutubo . . .

Kasanot’ Panagbiagko iti Biningay ti Relihion a Pagtaengan?

“Narigat ti idadakkelmi. Ni tatang laisenna ti relihionmi. Adda ti kankanayon a suppiat iti balay.”—Terry.

AAGNANAEDKAYO kadi iti biningay ti relihion a pagtaengan? No kasta, ammoyo no kasano a di nasayaat ken narigat ti kasasaad dagiti bambanag. Ni Nanang ken Tatang mabalin a palubosanna ti pammati ti tunggal maysa, ngem kas kunaen ni S. Sandmel iti librona a When a Jew and Christian Marry: “Ti kadi panangipalubos ti maysa a tao iti relihion ti asawana agtultuloy agingga iti pannakapadakkel dagiti annak iti dayta a relihion? Ti napudno a sungbat kadagiti adu a kaso ket saan.”

Usigenyo laengen, kas pangarigan, ania komat’ mapasamak no maysa kadagiti dadakkelyo ket saksi ni Jehova. Dayta a naganak mariknana a serioso nga obligasion ti panangpadakkel kadakayo “iti disiplina ken panangiturong-panunot ken Jehova” ket mabalin a nainget maipapan iti panag-“date,” moral, pannakipaset iti panagay-ayam iti eskuelaan, panangusar iti nawaya a tiempo, ken dagiti karera a kalat. (Efeso 6:4) Ti saan a Saksi a naganakyo, nupay kasta, mabalin a dina ikankano dagitoy a bambanag.

Iti malem ti Domingo kayat ni Nanang a kumuyogkayo kenkuana a mapan kadagiti Nakristianuan a gimong. Ni Tatang kayatna nga agtalinaedkayo iti pagtaengan a kaduana ken agbuya iti ay-ayam ti bola iti TV. “Addada tiempo a maldaanganak ken tatang,” malagip ni Doug. “Isut’ adda iti panaglako, gapuna a dikam makitkita bayat ti lawas, ket iti ngudot’ lawas, ti pamilia ti mangpanaw kenkuana no mapanda iti gimgimongda. Sagpaminsan, lumanganak iti gimong ket agbatiak a kaduana.”

Immunan a nakita ni Jesus a tumaud ti kasta a kasasaad. Kinunana: “Ta immayak a mamagsupadi ti anak a lalaki iti amana, ken ti anak a babai iti inana, ken ti manugang a babai iti katuganganna a babai. Ket dagiti kabusor ti tao isudanto dagiti kabbalayna met laeng.” (Mateo 10:35, 36) Saan a gapu ta ginagara ni Jesus a bingbingayen dagiti pamilia, no di ket dagiti parikut mapataudda no dadduma a miembro ti pamilia awatenda ti pudno a panagdayaw ket dagiti dadduma dida awaten. Ti saludsod ket: Ania ngarud ti aramidenyo no addakay iti kasta a kasasaad?

Dagiti Pakatnagan a Liklikan

Umuna ngem amin, bigbigenyo a ti kalat isu ti mangay-ayo, saan a basta iti maysa kadagiti dadakkelyo, no di ket ti Dios a mismo! Isut’ mangkalikagum iti “panagdayaw iti espiritu ken iti kinapudno.” (Juan 4:24) Ngem ti panangaramid iti kasta iti biningay ti relihion a sangakabbalayan, addada dagiti dadduma a pakatnagan a liklikan.

Pannakikompromiso—Maysa a tin-edyer a lalaki a dagiti dadakkelna nagdiborsio kunaenna maipapan iti ibibisita iti di manamati nga amana: “Padasennak nga allukoyen nga aglabsing iti kinapudno ken iti Dios.” Aramidenna daytoy babaen ti panangpilitna iti anakna a makiraman kadagiti di Nakristianuan a selebrasion. “Daytoy ti mamagbalin kaniak a saan a komportable,” inamin ti ubing a lalaki. Ngem ipalagip ni Jesus kadatayo: “Ti agayat iti ama wenno ina a nangnangruna ngem siak saan a maikari kaniak.” (Mateo 10:37) Gapuna agtakder a natibker iti pammatiyo! No di umdas ti nataktika a panagkedked iti di maitutop nga aramid, siaasi ngem sititibker nga ipakaammoyo iti naganakyo a dikay kayat ti makikompromiso. Bayat ti pannakakita ti naganakyo iti di maisin a determinasionyo, ti panangpilit mabalin a main-inot a mapalukayan.

Adda pannakasapul ti kinatimbeng, nupay kasta. Kunaen ti Filipos 4:5: “Maammuan koma dagiti isuamin a tattao ti kinarasonableyo.” Ti kinarasonable ramanenna ti itutulok, ti panagbaliwbaliw. Nalabit maipamusposanyo dagiti bambanag tapno busbosenyo ti ad-adu a tiempo a kadua ti di manamati a naganakyo no mariknana a nabaybay-an. Laglagipenyo met nga addaankayo iti obligasion kadagiti dadakkelyo nga agpadpada.—Efeso 6:1.

Agserbi kas ‘mamagtimbeng’—Gapu iti di umiso a pannakaiturong ti kinanainkalintegan, mabalin a maawiskayo a mangpabor iti dasig ni Nanang maipapan kadagiti relihiuso a bambanag gapu laeng ta ti kabsatyo a lalaki nakidasig ken Tatangyo—wenno ti kabaliktadna. Ngem natibker kadi a pangibatayan dayta iti panangpili no kasano ti panangdayaw iti Dios? Ania ngay no dagiti relihiuso a panangmatmat ni Nanang ket ulbod, di nainkasuratan? “Gatangem ti pudno ket dika lakuen,” ibalakad ti Proverbio 23:23.

Suroten ti pangulo—Nalabit nasingsingedkayo iti natataengan a kabsatyo a lalaki wenno babai ngem ti uray asinoman a naganak. Mabalin nga agannayaskayo ngarud a mangsurot iti aniaman a relihiuso a dalan a pilien a suroten dayta. “Kastat’ mariknak, ta naggapuak iti dakkel a pamilia,” kuna ni Roberto. Isu ngarud ti nagsagaba iti naespirituan a pannakaupay idi ti inauna a kabsatna a lalaki dina inawat ti pudno a panagdayaw nga interamente ket pimmanaw iti pagtaengan. “Makaupay iti kasta unay,” inaminna. Kasano man ti kinasingedyo iti maysa a kabsat, saan kadi a kinamaag ti mangipalubos iti maysa a mangidalan kadakayo nga umadayu iti panagserbi iti Dios?

‘Sumina ken mangparmek’—“Idi agedadak pay laeng iti 19, rinugianen ni Tatangko ti mangparegta kaniak a maki-“date,” malagip ni Doug. “Ni Nanang, a maysan a nabautisaran a Kristiano, busorenna a naimbag dayta. Kellaat nasarakak ti bagik nga uman-ananamong ken Tatang, nupay pagaammok unay nga umiso ni Nanang.” No agduma dagiti moral a pagalagadan dagiti nagannak, adu dagiti gundaway a mapagbinnusor dagiti nagannak. Mabalin a makaawis ti dumasig iti ad-adda a manangipalubos a naganak.

Ti panamagbinnusor kadagiti nagannak, nupay kasta, ad-adda laeng a paaduenna ti riribuk ti pamilia. Ket ti pananggun-od ti pammalubos a mangaramid iti maysa a banag nga ammoyo a di nainsiriban wenno dakes dinakay laksiden iti imatang ti Dios. “Ti makaammo ngarud nga agaramid iti nasayaat ket dina aramiden, basol kenkuana.” (Santiago 4:17) Imbes nga imaniobra ti naganak a mangipapaay kadakayo ti ad-adu a wayawaya, apay a dikay padasen nga ipangag ti naganak a mangiturturong kadakayo “iti dalan iti biag”?—Proverbio 6:23.

Panangaramid iti Bukodyo a Relihiuso a Pili

Nupay kasta, dadduma nga agtutubo mabalin a pudno a mariribukanda no ania a naganak ti surotenda. Kasano a makaikeddengkayo? Ibaga ti Biblia kadatayo ti maysa nga agtutubo a managan Timoteo a dimmakkel iti nabingay iti relihion a pagtaengan. Isut’ nadeskribir a kas “ti anak ti maysa a babai a Judia a namati, ngem Griego ti Amana.” (Aramid 16:1) No dadduma mabalin a di ammo ni Timoteo ti dasiganna kadagiti nagannakna. Kaskasdi, inabrasana ti relihiuso a pammati ni nanangna ket nagbalin nga agbambaniaga a kadua ni apostol Pablo. (Aramid 16:2, 3) Maysa kadi daytoy a kaso iti panagayat a nangnangruna iti ina ngem iti ama? Nikaanoman.

Nagsurat ni apostol Pablo ken Timoteo: “Ngem, sika, agtalinaedka kadagiti bambanag a sinursurom ken pinatalgedam, nga ammom no siasino ti nangadalam kadakuada ken nanipud idi kinaubingmo naammuam dagiti nasantuan a sursurat, a mabalin a mamagsirib kenka a maipaay iti pannakaisalakan gapu iti pammati ken Kristo Jesus.” (2 Timoteo 3:14, 15) Manipud itoy makunatayo nga inaramid ni Timoteo ti panagpilina a naibatay iti napasnek a panagadal iti Sao ti Dios! Isut’ “naallukoy,” nakumbinsir a mamati iti dayta.

Imbes a mangaramid iti panagpili a naibatay iti sentimiento wenno emosion, usigenyo ti pammati ti nagannakyo sigun iti lawag “ti nasantuan a sursurat.”a Kamaudiananna dakayo, saan a ni Nanang wenno Tatangyo, ti makimbiang iti panagtrabahoyo a maipaay iti pannakaisalakanyo!—Filipos 2:12.

Panangallukoy iti Di Manamati a Naganak

Gaput’ panangikeddengyo iti pusoyo a sumurot iti pudno a relihion, kasano, ngarud, a matmatanyo koma ti di manamati a naganakyo? Pinaregta ni apostol Pablo dagiti Kristiano a padasenda nga allukoyen ti di manamati nga asawada: “Panunotenyo dayta: kas asawa a babai mabalin a dakayo ti pakaisalakanan ti asawayo; kas asawa a lalaki mabalin a dakayo ti pakaisalakanan ti asawayo.” (1 Corinto 7:12-16, The New English Bible) Saan kadi nga agaplikar daytoy, a prinsipio, kadagiti annak dagiti di manamati?

Ti nadalus a kababalinyo ken nauneg a panagraemyo iti naganakyo adut’ maaramidanna a tumulong iti dayta a maaddaan iti paborable nga impresion iti pudno a Kinakristiano. (Idiligyo iti 1 Pedro 3:1, 2.) Laglagipenyo, met, a ti panangala iti takder iti kinapudno dina kaipapanan nga iti aniaman a pamay-an busorenyo ti di manamati a naganakyo. Kinapudnona, babaen ti panangitultuloyyo nga agbalin a naanus, natulnog, ken mannakitinnulong, maipanamnamayo iti dayta ti agtultuloy a panagayatyo.

Adda “tiempo ti panagulimek ken ti panagsao.” (Eclesiastes 3:7) No tumaud ti gundaway nga agsarita maipapan iti pammatiyo iti naganakyo, iti amin a pamay-an saritaenyo dayta! “Dika medmedan ti imbag kadagiti karbenganna,” ipalagip kadatayo ti Proverbio 3:27. Ngem agbalin a naasi, nataktika. Liklikan ti mamagulimek iti naganak gapu ta ad-adu ti ammoyo maipapan iti Biblia. Siasinot’ makaammo, nalabit ti panangikagumaanyo mabalin nga agbunganto. “Nakarot’ panangbusor ni tatangko iti adu a tawtawen,” malagip ni Jay. “Kasla saanen nga agbalbaliw, ngem kamaudiananna isut’ naallukoymi.” Idi natay ni tatang ni Jay sumagmamano a tawenen a napalabas, isut’ agserserbi kas maysa a Kristiano a panglakayen.

No awan ti dumteng a panangipangag, lagipenyo dagiti sasao ni David idiay Salmo 27:10: “No da Ama ken ina baybay-andak, ni ngad Jehova pidutennakto.” Mabalin met a suportarandakayo dagiti nasungdo a gagayyemyo iti kongregasion Kristiano, a mabalin a ‘nasingsinged pay ngem ti maysa a kabsat.’ (Proverbio 18:24) Babaen iti tulongda ken ti tulong ti mamati a naganakyo, makapagtakderkayo a sititibker iti kinapudno.

[Footnote]

[Ladawan iti panid 23]

Ti panamagbinnusor kadagiti nagannak mangipaay iti panangaramidyo ti kaykayatyo, ngem inton agbayag, paaduenna ti riribuk ti pamilia