Ti Panangmatmat ti Biblia

“Apay nga Innala ti Dios ti Anakko?”

TI IPAPATAY ti maysa nga anak nasaem unay iti asinoman a naganak. Daytat’ nakaro a suot a di kabalinan a punasen ti basta sasao. Ngem no nagsagabakayon iti kasta a pannakapukaw ket mariribukankayo no apay innala ti Dios ti anakyo, iti kasta agbambannogkayo iti sidong ti di umiso a pannakaawat a mangnayon laeng iti rigatyo. Masapul nga ammuenyo ti kinapudno: Ti Dios saanna nga innala ti anakyo.

Kaskasdi, adut’ mamati iti kasunganina. Maysa a babai, kas pangarigan, silaladingit a minatmatanna ti nakalukat a lungon; nga adda sadiay ti 17-años nga anakna a lalaki, a rimmasay ti buokna gaput’ pannakaag-agasna a di met nangpalaing iti kanserna. Bimmaw-ing iti maysa a bisita ket sipipigerger a kunana: “Ti Dios kayatnan Tommy a makikadua Kenkuana sadi langit.” Kas maysa a Romano Katoliko, daytoy ti naisuro kenkuana bayat dagiti tawen a pannakimismisana. Dagiti Protestante nabayag metten a pinabasolda ti Dios gaput’ ipapatay ti annakda. Ni John Calvin a nalatak a repormador a Protestante dinung-awanna ti natay a dua-lawas laeng nga anakna: “Ti Apo insaplitna ti nasaem a sugat iti pannakatay ti maladaga nga anakmi.”

Sigun ti sarsarita dagiti Judio idi ugma, ti singin nga annak a lalaki ti maysa a rabbi natay bayat ti kaawanna. Idi simmangpeten ket kayatna a makita dagiti annakna, ti asawana kunana: “No napabulodankat’ dua a nasudi nga alahas ket naibaga kenka a tagiragsakem ida bayat nga addada pay kenka, agreklamokanto aya inton kiddawenen ti nangipabulod nga isublimon dagita?” Insungbatna: “Pudno a saan!” Idin impakitana ti natayen a dua nga annakna ket basta kinunana: “Kayat ti Dios nga isublimon dagiti alahasna.”

Saan a Makaliwliwa ken Biblikal

Talaga kadi a naulpit unay ti Dios ta iyegnat’ di nainkalintegan nga ipapatay kadagiti ubbing, nga ammona a daytoy ti mangsair kadagiti nagannakda? Saan, saan kastat’ Dios ti Biblia; sigun iti 1 Juan 4:8, “ti Dios isu ti ayat.” Kitaenyo ta dina kunaen a ti Dios addaan ayat wenno ti Dios naayat no di ket ti Dios isu ti ayat. Nakabilbileg, nakasinsin-aw, naan-anay unay ti ayat ti Dios, a daytat’ nangsaknap a nalaing kadagiti personalidad ken tignayna, ta mabalin nga isut’ siuumiso a maikuna a mangibagi a mismo ti ayat. Isut’ saan a Dios a mangpapatay kadagiti ubbing ‘ta kayatna nga alaenen dagiti alahasna.’

Iti kasunganina, nabara ken awan-agumna ti panagayat ti Dios kadagiti ubbing. Ni Jesu-Kristo, a ti tunggal sao ken tignayna insarmingnat’ personalidad ti nailangitan nga Amana, nabarat’ panaginteresna kadagiti ubbing. Naminsan nga inarakupna ti maysa nga ubing ket sinuruanna dagiti disipulona a maaddanda koma met ti arig-ubing a kina-inosente ken kinapakumbaba. (Mateo 18:1-4; Marcos 9:36) Adu a siglo kalpasanna, sinuruan ni Jehova ti ilina a matmatanda dagiti ubbing kas nasudi ket sanayen, sursuruan, ken aywananda ida a naimbag. (Deuteronomio 6:6, 7; Salmo 127:3-5) Tarigagayanna nga agkaykaysa ti pamilia iti panagbiagda, saan a masinasina iti ipapatay.

“No Kasta Apay a Natay ti Anakko?”

Adut’ makarikna a yantangay mannakabalin-amin ti Dios, konkontrolenna ti amin a mapaspasamak itoy a lubong, agraman ti ipapatay dagiti ubbing. Ngem saan a kasapulan a kanayon a kasta. Idi napukaw ni Job ti sangapulo nga annakna iti maysa a didigra, impagarupna nga inyeg ni Jehova kenkuana ti nakaam-amak a didigra. Dina ammo ti impanayag ti Biblia kadatayo, awan sabali, a ti nabilbileg ngem tao a kabusor ti Dios a ni Satanas isut’ talaga nga adda iti likudan dayta a pasamak, a padpadasenna a parigaten ni Job tapnon tallikudannat’ pammatina iti Namarsua.—Job 1:6-12.

Umasping iti dayta, kaaduan a tattao ita awan ammoda no iti kasaknap ti impluensia ni Satanas iti lubong. Ipanayag ti Biblia a ni Satanas, saan a ni Jehova, ti agturay iti daytoy bulok a sistema ti bambanag. Kas kunaen ti 1 Juan 5:19: “Ti isuamin a lubong adda iti babaen ti dakes.” Saan a ni Jehova ti mapabasol kadagiti amin a nakaam-amak a pasamak itoy a lubong. Saanna nga innala ti anakyo.

Kayat kadi dayta a sawen, ngarud, a ni Satanas ti nangala iti anakyo? Saan a direkta, saan. Idiay Eden, inyeg ti tao ti bagina iti sidong ti turay ni Satanas idi isut’ nagrebelde iti Dios. Napukawna ngarud ti regalo nga agnanayon, nasalun-at a biag maipaay iti bagina ken iti amin nga annakna. (Roma 5:12) Kas resulta, agbibiagtayo iti sistema ti lubong a naisina iti Dios, maysa a lubong a masapul a sanguentayo ti aw-awagan ti Biblia a “panawen ken di mapakpakadaan a pasamak,” dagiti di in-inanamaen ken masansan a nakaam-amak a panagbalbaliw iti biag. (Eclesiastes 9:11) Ni Satanas “al-allilawenna ti intero a mapagnaedan a daga.” (Apocalipsis 12:9) Ti kangrunaan nga interesna isut’ panangiyadayo ti tattao manipud iti Dios. Isut’ gapuna nga agisaknap iti kinaulbod maipapan iti Dios. Maysa kadagita a kinaulbod a ta ti Dios usarenna ni patay tapno maagawna dagiti ubbing manipud kadagiti nagannakda.

“Aniat’ Namnama ti Anakko?”

Imbes a pabasolen ti Dios, dagiti namatayan a nagannak rebbeng a matmatanda ti liwliwa nga itukon ti Dios idiay Biblia. Ti ulbod a relihion binaybay-anna ti adu a mariribukan no maipapan ti yan ken kasasaad dagiti natay nga annakda. Langit, impierno, purgatorio, Limbo—dagitoy a nagduduma a pagturongan saknapanda manipud lugar a di maawatan aginggat’ nakaam-amak unay. Ti Biblia, iti kasumbangirna, ibagana kadatayo a dagiti natay awan puotda, iti kasasaad a maiyasping unay iti pannaturog. (Eclesiates 9:5, 10; Juan 11:11-14) Ngarud, di rebbeng a madanagan dagiti nagannak maipapan iti mapasamak kadagiti annakda kalpasan ti ipapatay, a kas met iti saanda a panagdanag no makitada a nasimbeng a matmaturog ti annakda. Sinao ni Jesus ti tiempo inton “amin dagidiay adda iti pakalaglagipan a tanem” ket “rummuardanto” iti napabaro a biag iti paraiso a daga.—Juan 5:28, 29; Lucas 23:43.

Pudno, dayta a narayray a namnama saanna a maikkat amin a leddaang manipud iti ipapatay. Ni Jesus a mismo nagsennaay ken nagsangit gaput’ ipapatay ti gayyemna a ni Lazaro—ket daytat’ sumagmamano a minuto laeng sakbay ti panangpagungarna kenkuana! Uray no kasta, ngarud, ti ipapatay saan nga agnanayon. Ni Jesus ken ti Amana, a ni Jehova, kagurada ni patay. Ti Biblia awaganna ni patay a “maudi a kabusor” ket kunaenna a daytat’ “mapukawto.” (1 Corinto 15:26) Iti um-umayen a paraiso, inton limmabasen ti panagturay ni Satanas, ni patay napukawton iti agnanayon. Dagiti inosente a biktimana mapasublidanto babaen ti panagungar. Sa, inton maikaykaysa dagiti nagannak kadagiti natay nga annakda, maibagatayto met laengen, ‘Patay, sadino ti yan ti panniludmo?’—Oseas 13:14.