Alibtak a Tumulong Kadagiti Sabali
BAYAT ti panagtrabahona idiay Dade County Criminal Traffic Courthouse, nagundawayan ti maysa a Saksi ni Jehova ti Miami, Florida, nga ipaay ti naespirituan a tulong kadagiti katrabahuanna. “Maysa nga aldaw,” insurat ni Rafael, “maysa a misis a regular a mangal-ala kaniak iti magasin a Pagwanawanan ken Agriingkayo! kunana nga adda nangitukon kenkuana ti Bible encyclopedia para iti walot’ tawenna a baritona nga aggatad $500 ngem dina kabaelan a bayadan. Dagdagus a kinunak nga itugotak iti maysa a tomo a libro a Ti Librok dagiti Estoria ti Biblia. Intugotko dayta iti kabigatanna, ket nagustuanna dagiti ladawan ket inapresiarna ti libro.
“Imparabawna ti libro iti lamisaanna sana intuloy ti nagtrabaho. Awan pay 15 minutos, inasitgannak ti sabali nga empleado nga awitna Ti Librok dagiti Estoria ti Biblia; kayatna nga ammuen no nangalaak. Inlawlawagko nga imalmaldit ti Watch Tower Society dayta. Kayatnat’ maaddaan ti tallo a kopia para kadagiti annakna. Mangisursuro iti Sunday school ket ti kunana makatulong unay daytoy iti klasena. Maammuakto kano no mano pay a kopia ti orderenna.
“Kaguduat’ oras kalpasanna, sabali manen a katrabahuak ti immasideg nga iggemna ti libro, ket dinamagna no makaorder ti tallo. Idi kuan agorder metten dagiti dadduma, ket di nagbayag, 12 a kopia Ti Librok dagiti Estoria ti Biblia ti orderdan. Binabalawdak pay ketdi no apay diak imbagbaga idi kadakuada dayta a libro! Iti sumuno nga aldaw, intugotko idiay opisina dagita a libro ket inyawatko kadagiti nagorder.
“Iti sumuno a lawas kinuna ti mangisursurot’ Sunday School a 15 a librot’ masapulna para kadagiti estudiantena. Inur-urayna ti anamong ti padi ken ti superintendente ti eskuelaanda. Kunana a nagustuan ti padi ti libro ket inapresiarna dagiti adu a ladawanna. Inanamonganna ti panagorderna iti libro.
“Ti mangisursurot’ Sunday school kayatna nga iregalo ti libro kadagiti ubbing iti Krismas. Kunana nga ammona a diak ramrambakan ti Krismas, ngem daytoy a libro ket nagsayaat kano nga iregalo iti Krismas. Imbagana a nakalaklaka nga umimdeng dagiti ubbing no ibasana kadakuada ti libro.
“Kinuna ti maysa a katrabahuak nga ibasaanna a rinabii dagiti annakna ket uray isu adu met ti maad-adalna. Kas ehemplo, dina idi ammo nga adda dagiti higante idi tiempon Noe. Sabali pay a katrabahuak ti nagkuna a nalaing ti nangaramid kadagiti ladawan ti libro. Kasda la agpaypayso. ‘Maysa a gameng daytoy a libro,’ kunana.
“Ti dagupna amin, kalpasan lat’ sumagmamano nga aldaw, nakaipaimaak ti 32 a kopia Ti Librok dagiti Estoria ti Biblia, ket manaynayonan pay. Tunggal adda pangipakitaak iti libro, damagenna, ‘Nangalaam iti daytoy?’”
Alibtakkay met la kadi a mangpennek kadagiti naespirituan a kasapulan dagiti sabali? Kastoy ti kuna ni Rafael, maysa itan a Kristiano a panglakayen ti kongregasion dagiti Saksi ni Jehova sadi Miami: “Daytoy a kapadasan ti nangted iti leksion kaniak maipapan iti impormal a panangasaba ken ti situtulok a panangtulong kadagiti sabali.”